1 Samuel 2 - Bible in Tzeltal de Oxchuc y Tenejapa

Sc'ayoj Ana

¹ Te Ana la sc'opon Dios, jich la yalbey: —Cajwal, mero bin nax co'tan ta atojol, melel ja'at ya awac'bon xan yip co'tan. Ya xju'ix ya xc'opojon ta stojol te controetic cu'une, melel ja'at la acoltayonix. Mero bin nax co'tan yu'un.

² Ma'yuc mach'a yan jich ch'ul Dios te bit'il ja'at, Cajwal. Ma'yuc mach'a jich ya xcanantaywan te bit'il ja'at, Dios cu'untic. Jtul ma'yuc mach'a jich te bit'il te ja'ate.

³ Ma me ayuc mach'a xc'opoj soc stoybail, ma me ayuc mach'a ya stoy sba ta jc'axel soc te sc'ope, melel te Cajwaltic, ja' Dios te spisil ya sna' stuquele, ja' te ya stsatay spisil te bitic ya spas te ants-winiquetique.

⁴ Ja' me ya sjinbey yat'ejibic ta guerra te mach'atic ay yipique, ja' me ya yac'bey yipic te mach'atic ma'yuc yipique.

⁵ Te mach'atic ay sobra swe'elic ta neelal to, yo'tic ya xbajt'iquix ta le-at'el swenta jxejt' pan; yan te mach'atic ay swi'nal ta neelal to, yo'tic ma'yuquix swi'nalic. Te ants te ma ba la yac' yal ta neelal to, yo'tic ac'botix tsobol yalatac yu'un Dios; yan te mach'a ay bayal yalatac, yo'tic ma'yuquix yutsil q'uinal ya yaiy.

⁶ Te Cajwaltic ya yac' lajucotic soc ya yac' cuxinucotic; ya yac'otic coel ta muquenal, soc ya yic'otic loq'uel tel ta muquenal.

⁷ Te Cajwaltic ya spasotic ta me'ba o ya spasotic ta jc'ulej; ya yac' yalucotic, soc ya yac' jajch'ucotic.

⁸ Dios ya stam ta lum te me'bae, c'alal ta xch'ayjibal c'a'pal ya sjaches te mach'a ay ta wocole, soc ya yac' snajc'an sba ta yolil te mach'atic muc' sc'oplalic, ya yac'bey ta yawil te mach'atic ich'bilic ta muq'ue. Melel te Cajwaltic ja' yu'un te bit'il ipajem te lumq'uinale, tey la snajc'an a te balumilale.

⁹ Te Cajwaltic ya me scanantay ta beel te mach'atic jun yo'tanic ta stojole; yan te mach'atic amen yo'tanic ya me xlajic ta yijc'al q'uinal stuquelic. Melel ma'yuc mach'a ya xju' ya yaiy tsalaw ta swenta nax te yip.

¹⁰ Te Cajwaltic ya me swuy te scontro; c'alal ta ch'ulchan ya yac'bey coel tel chawuc ta stojolic. Te Cajwaltic ya me yalbey bi yilel yat'el te mach'atic ayic ta swolol te balumilale; ya me yac'bey xan yip te muc' ajwalil tsabil yu'une, ya me yac' muc'ubuc xan te yip yu'ele —xi' te Ana.

¹¹ Patil sujt' bael ta sna ta Ramá te Elcana, pero te alalquerem jilix ta at'el ta stojol Dios, ja' abatinot yu'un te sacerdote Elí.

Amen at'elil yu'un snich'nab Elí

¹² Te snich'nab Elí mero amen yo'tanic, ma ba la yich'ic ta muc' te Cajwaltique,

¹³ soc ni ja'uc lec la spasic te at'el ta sacerdoteil ta stojol te lume. Teme ay mach'a ya yac'bey milbil smajt'an Dios, ora ya xc'ot jtul yabat sacerdote, yich'oj ya xc'ot jun trinche. Te c'alal yac ta tac'ajel a te ti'bale,

¹⁴ ora ya xjij ochel ta perol, o ta oxom, caldera, o ta muc'ul sartén. Spisil te jich yipal te ya sloq'ues a ta trinche, spisil yu'un te sacerdote. Jich ya spasbey spisil israeletic te ya xc'otic ta Silo.

¹⁵ Soc te c'alal ma to ba yich'oj chiq'uel ta scajtijib smajt'an Dios a te xepuile, ya xc'ot te yabat sacerdote. Jich ya xc'o yalbey te mach'a ya sc'an ya yac'bey te milbil smajt'an Dios: —Ac'bon ti'bal, yu'un ya jwobey sti' te sacerdote, melel ma ba ya sc'anbatix teme tac'ajemix a ya awac'beye, stseel me ya sc'anbat —xi'.

¹⁶ Teme ya x'albot yu'un te mach'a ya yac'bey te milbil smajt'an Dios: —Neel ya sc'an ya yich' chiq'uel te xepuile, patil chican awo'tan jich yipal ya awich'ix bael a —teme xie, te yabat te sacerdote jich ya yal: —Maniwan. Puersa ya me awac'bon ta ora. Teme ma ba ya awac'bone, ya me jpojbat bael ta puersa —xi'.

¹⁷ Ja' yu'un te smulic te winiquetic, mero tulan sc'oplal ta stojol Cajwaltic, melel mero ma'yuc swentail ta yo'tanic te majt'aniletic yu'une.

¹⁸ Pero te ch'in querem Samuel jun yo'tan yac'oj sba ta abatinel yu'un te Cajwaltic, sc'u'inej efod pasbil ta lino-pac'.

¹⁹ Ta jujun ja'wil te sme' ya spasbey bael ch'in snajt'il c'u', te c'alal ya xbajt' ta templo soc smamlal ta yaq'uel milbil smajt'an Dios ta swenta te jujun ja'wile.

²⁰ Jich te Elí ya sc'anbey bendición ta stojol te Elcana soc te yiname, jich ya yal: —Dios ac'a yac'bat xan yalatac te awinam swenta sjelol te ch'in querem la yac'bey te Diose —xi'. Patil ya sujt' bael ta snaic.

²¹ Te Cajwaltic la yac'bey bendición te Ana, jich la yic' xan yal. Ayin xan oxeb squerem-alatac soc cheb yantsil-alatac. Jich te alal Samuel, yan yan ta muc'ubel ta stojol te Cajwaltique.

²² Yan te Elí mero mamalix a, pero spisil yaiyoj te bi yacalic ta spasel ta stojol spisil israeletic te snich'nabe, soc yaiyoj te ya xwayic soc te antsetic yac'oj sbaic ta abatinel ta yochibal te Nailpac' te banti ya yich' c'oponel te Cajwaltique.

²³ Ja' yu'un jich la yalbey te snich'nab: —Spisil te yajwal lum ya yalbonic te bit'il mero amen te awat'elique. ¿Bi yu'un te jich ya apasique?

²⁴ Ma jichuc ya sc'an jnich'nab. Mero ma lecuc te bitic yacalic ta yalel ta awentaic te lum yu'un te Cajwaltique.

²⁵ Teme ay mach'a ya sta smul ta stojol te sjoy ta ants-winiquil, ya xchajbanot yu'un Cajwaltic; pero teme ay mach'a ya sta smul ta stojol te Cajwaltique, ¿mach'a c'an coltayotuc yu'un stuquel? —xi' te Elí. Pero te nich'aniletic ma la yich'beyic ta muc' sc'op te statique, melel ja' ay ta yo'tan Cajwaltic te ya slajinbey xcuxlejalique.

²⁶ Pero te querem Samuel yan yan ta muc'ubel. Buen lec sc'oplal ta stojol Dios soc ta stojol te ants-winiquetique.

²⁷ Jich ora c'ot jtul j'alwanej yu'un Dios ta stojol te sacerdote Elí, jich albot yu'un: —Te Cajwaltic jich la yalix: “Te c'alal ayic ta mozoinel ta Egipto yu'un faraón a te antiguo ats'umbalique, mero jamal la cac' jba ta na'el yu'unic.

²⁸ Soc la jtsa loq'uel ta yolil spisil sts'umbal Israel te mach'atic ya x'ochic ta sacerdoteil cu'un, swenta yu'un ya me yac'bonic chic'bil jmajt'an ta scajtijib cu'un, soc ya me xchic'bonic pom, soc ya me slapic tel efod ta jtojol. Soc xan, te antiguo ats'umbalic la cac'bey te majt'aniletic te ya yac' ta chiq'uel te israeletic ta swenta quich'el ta muq'ue.

²⁹ ¿Bi yu'unix a jiche te mero ma'yuc sc'oplal ta awo'tanic te scojt'ol chic'bil jmajt'an soc te yan jmajt'ane, te bit'il jo'on caloj mandal te ya yich' aq'uele? ¿Bi yu'un te ja' bayal sc'oplal ta awo'tan ya awaiy te anich'nab, c'ax jich a te bit'il te jmajt'ane? Melel yacat sjujp'esel ta buen lequil jmajt'an yu'un te israeletic, ja' te lum cu'une”, xi' ac'oplal yu'un te Cajwaltique.

³⁰ Te bit'il jich yaloj te Cajwaltic, te Dios cu'untic te israelotic, te ya apasbey yat'el spisil ora ja'at soc te mach'atic ay awu'une, yo'tic ya yal ta jamal: “Ma'yuc bi ora jich ya xc'otix ta pasel. Te mach'a ya yich'on ta muq'ue, ya me quich' ta wenta; te mach'a ma'yuc jc'oplal ta yo'tan, jc'axel ma'yuc swentail ya xc'ot cu'un. Jo'on Ajwalilon jich caloj.

³¹ Ja' yu'un, nopolix yorail te ya jlajinbat awip, soc nix te yip ats'umbale. Ma me ba ya xjalajiquix ta balumilal, ma ba ya xmamalubiquix.

³² Ya me awil te mero peq'uel ya xc'otiquix te mach'atic ay awu'une. Ya me yaiyic mel-o'tan soc xti'ton me yo'tanic te c'alal ya yilic te ya cac'bey bayal yutsilal te yermano israeletique. Yan te mach'atic ay awu'une, ma'yuc bi ora ya xmamalubiquix ta balumilal.

³³ Pero ya me xjil jtul ats'umbal cu'un ta bay nopol scajtijib te jmajt'ane. Pero swenta yu'un ya xtup' asit yu'un oq'uel soc ya amel awo'tan yu'un, spisil ats'umbal te ya to x'ayinic, ch'iel winiquetic to me a te ya xlajique.

³⁴ Tey me ya ana' a te bila ya xc'ot ta pasel ta swenta anich'nab, ja' te Ofni soc Finees: ta xchebalic ya me xlajic ta jun nax c'aal.

³⁵ Ya me jtsa yan sacerdote te jun yo'tan ta jtojol te ja' ya spas te bila ya jmulan soc te bila ya sc'an te co'tane. Ya me cac'bey sts'umbal ta cajalcaj bael, ya me cac' at'ejuc ta stojol spisil ora te muc' ajwalil te jo'on ya jtsae.

³⁶ Te jayeb xan ats'umbal cuxul ya xjile, ya me xtal bic'tajicuc ta stojol ta sc'anel jsejpuc taq'uin o ta sc'anel jtebuc we'elil. Ya me xtal yalbeyic wocol yu'un ya x'ac'botic at'el ta sacerdoteil swenta yu'un jich ya sta swe'elic a —xi'.