1 Samuel 19 - Bible in Tzeltal de Oxchuc y Tenejapa

Saúl yo'tan smil David

¹ Te Saúl la spas ta mandal te snich'an, ja' te Jonatán, soc ta spisil te abatetic yu'un te yacuc smilic te David. Pero te Jonatán te bayal c'ux ta yo'tan David,

² c'o smuquen-albey: —Te jtat Saúl yac ta xchapel te ya smilate. Pajel ta sab tsajtaya me aba, nac'a jilel aba.

³ Ya me join loq'uel tel te jtate, tey me ya xtalon soc ta aquiltic te banti ayate. Ya me calbat ac'oplal ta stojol. Ya caiytic bit'il ya xc'ot, patil ya me calbat awaiy —xi'.

⁴ Te Jonatán c'opoj ta stojol Saúl ta swenta xc'uxtayel te David, jich la yal: —Te bit'il muc' ajwalilate, ¿bi yu'un ya ale amul ta yuts'inel te awabat David? Melel ma'yuc bi amen spasojbat; ja' nax bayal bitic lec spasojbat.

⁵ Manchuc me la sna' te ay lajel tey a, pero loc' sba ta yo'tan te ba smil te filisteo. Jich te Cajwaltic jc'axel la scoltay ta sc'abic ta spisil israeletic. Te ja'at la awil, bin nax awo'tan yu'un te jich c'ot ta pasele. ¿Bi yu'un te ya ac'an ya ata amul ta smilel te mach'a ma'yuc bi snopoje, jich te bit'il ya ac'an ya amil te David te ma'yuc bi amen spasoje? —xi' te Jonatán.

⁶ C'alal la yaiybey sc'op Jonatán te Saúl, jich la yal: —Ja' testigo cu'un te Dios te ma ba ya yich' milel te David —xi'.

⁷ Ja' yu'un te Jonatán la yic' tel te David, la yalbey yaiy spisil te bi la yalique. Jich la yic' bael ta stojol Saúl; te David jich nix at'ej xan ta stojol Saúl te bit'il ta neelal toe.

⁸ Cha'jajch' xan yan buelta te guerra. Te David loc' bael, ba yac'bey sbaic guerra soc te filisteoetique. Ja' ju' yu'un te David, mero tsalbil c'otic yu'un, loc' ta anel yu'un te filisteoetique.

⁹ Pero te Saúl cha'jajch' xan ta uts'inel yu'un te bol espíritu ticunbil yu'un te Cajwaltique. Nacal ta sna, stsacoj ta sc'ab te slanza; te David yac ta stijel arpa.

¹⁰ Ya c'an sts'ap ta pajc' ta lanza, pero la sc'ases te lanza te David, te slanza te Saúl ts'apal c'oel ta pajc'. Te c'alal c'ax yu'un te David, jich yorail ta ajc'ubal loc' ta anel.

¹¹ Pero Saúl ora la yalbey tulan mandal te swinictac te ya me xbajt'ic ta sna David, swenta yu'un ya me stsajtay yilic soc ya me smilic ta buen sab ta sacubel q'uinal. Pero te Mical te yinam David la yac'bey sna', jich la yalbey: —Teme ma ba ya acoltay aba loq'uel in ajc'ubal to, pajel lajematix a —xi'.

¹² Te Mical ora la sjijp'an loq'uel ta ventana te David, jich col.

¹³ Te Mical la yich' jun loc'omba, la yac'bey ta swayib, la yac'bey sts'anjolin jun jalbil tsotsil tentsun, la smuc ta sábana.

¹⁴ C'alal la yalbey mandal swinictac te Saúl te ya stsaquic te David, jich albotic yu'un te Mical: —Yac ta chamel —xi'.

¹⁵ Pero te Saúl la xcha'ticun xan bael te swinictac ta sleel te David. La yalbey tulan mandal, jich la yal: —Manchuc me ay ta swayib, ic'aic loq'uel tel tey a. Ic'bonic tel, yu'un ya jmil —xi'.

¹⁶ Te swinictac te Saúl ochic ta sna David, pero ja' nax la staic ta wayibal te loc'omba te sts'anjolinej jalbil stsotsil tentsune.

¹⁷ Te Saúl jich la yalbey te Mical: —¿Bi yu'un la alo'layon? Jich la awac' anuc bael te jcontro —xi'. Jac'bot yu'un te Mical: —Melel tulan la yalbon te ya laj smilon teme ma ba ya cac' anuque —xi'.

¹⁸ Jich ju' yu'un, col te David. C'alal col, bajt' ta ba ay Samuel ta lum Ramá, c'o xcholbey yaiy spisil te bitic pasbot yu'un te Saule. Te Samuel soc te David bajt'ic ta nainel ta Naiot.

¹⁹ Te c'alal la yaiy te Saúl te ay ta Naiot ta Ramá,

²⁰ la sticun bael swinictac yu'un ya xchuquic tel. C'alal c'otic te swinictac Saúl, la yilic jchajp j'alwanejetic yacalic ta aq'uel ta c'op yu'un Dios, ja' neel ta ic'aw te Samuele. Ja' nix jich, ora nax noj ta yo'tanic te yip yu'el Dios te swinictac Saúl, ochic ta aq'uel ta c'op yu'un Dios.

²¹ C'alal la yaiy te Saúl, la sticun xan yan winiquetic, pero ja' nix jich ochic ta aq'uel ta c'op yu'un Dios. Swenta yoxebal buelta, te Saúl la sticun xan yan winiquetic, ja' nix jich c'ot ta swentaic.

²² Patil ja' nix bajt' ta Ramá te Saule. C'alal c'ot ta mero muc' yawil ja' te ay ta Secú, la sjojc'o te Samuel soc David. Ay mach'a albot yu'un te ayic ta Naiot ta Ramá.

²³ Te Saúl tey toj bael a. Pero te yip yu'el Dios wentainot yu'un uuc, jich och ta aq'uel ta c'op yu'un Dios te Saule. Jich bajt' te Saúl asta c'ot c'alal ta Naiot ta Ramá.

²⁴ Soc la xch'oj loq'uel sc'u'-spac', jich yac ta aq'uel ta c'op yu'un Dios ta stojol Samuel, jich la spas sjunal c'aal soc sjunal ajc'ubal. Tey chicnajem tel te c'op te: “¿Ja' bal j'alwanej yu'un Dios uuc te Saule?” te xie.