1 Samuel 15 - Bible in Tzeltal de Oxchuc y Tenejapa

Ch'aybil c'ot Saúl

¹ Te Samuel jich la yalbey te Saúl: —Te Cajwaltic namey la sticunon yu'un ya cac'bat aceite ta ajol swenta seña te tsabil ya xc'oat, yu'un ya awich' awat'el ta muc' ajwalil ta Israel, ja' te lum yu'une. Yo'tic aiya me awaiy te bi ya yalbat te Cajwaltique.

² Jich ya yal te Cajwaltic te Spisil ya xju' yu'une: “Ya cac'bey castigo te amalequetic, swenta spacol te bi la spasbey te israeletic, ja' te la smac ta be te c'alal yacalic ta talel ta Egipto.

³ Ja' yu'un baan, ac'beya guerra, lajina ta jc'axel soc spisil sbiluc. Ma me ayuc mach'a x'ana'bey yo'bolil sba, milaic winiquetic, antsetic, alaletic soc mero ch'in alaletic te ayinelic to, soc nix te wacaxetic, chijetic, camelloetic, soc burroetic yu'unique”, xi' te Cajwaltic —xi' te Samuele.

⁴ Te Saúl la sticun ta tsobel te soldadoetic yu'une. La yajtay ta lum Telaim lajunwinic ta jmil (200,000) te ya xbeen ta yacanique te winiquetique, soc lajunmil (10,000) winiquetic te talem ta Judá.

⁵ Patil te Saúl jajch' bael, bajt' ta lum yu'un Amalec. C'o yac' sbaic ta xujc' uc'um.

⁶ Jich la yalbey te quenitaetic: —Q'ueja abaic. Loc'anic bael ta yolil te amalequetic, swenta yu'un ma me pajaluc ya awich'ic lajinel soc, melel lec awo'tanic ta stojol israeletic te c'alal yacalic talel ta Egipto a —la yut. Jich te quenitaetic loq'uic bael ta yolil te amalequetique.

⁷ Te Saúl jajch' yac'bey guerra te amalequetic, jajch' ta Havila, c'ot c'alal yochibal Shur te ay ta sti'il sq'uinal Egipto, la stsal te amalequetique.

⁸ La stsaquic bael ta chuquel te Agag, te ja' muc' ajwalil yu'unique. La smilbey ta puñal spisil te soldadoetic yu'une.

⁹ Pero te Saúl soc te soldadoetic yu'un ma ba la smilic te Agag, soc ma ba la smilic te t'ujbil chijetic, wacaxetic soc te bic'tal wacaxetic te buen jujp'enique, soc bic'tal chijetic. Ma ba la slajinbeyic te biluc yu'unic bayal stojole, ja' nax la slajinbeyic te banti amenic, soc te banti ma ba toyol stojole.

¹⁰ Ora c'oponot yu'un Dios te Samuel, jich albot:

¹¹ —Ma lecuc ya caiy te ja' och ta muc' ajwalil te Saúl. Melel la spijt'esix sba, ma ba la xch'uunbon te bi la calbey spase —xi'. Te Samuel mero ma ba lec la yaiy, sjunal ajc'ubal la yalbey bayal wocol te Cajwaltic yu'une.

¹² C'alal sacub, ta buen sab ba sta te Saúl, pero albot te ma ba tey ay a, baem laj ta Carmel. Tey laj baem ta stejc'anel muc'ul ton swenta seña sna'ojibal yat'el, soc sujt' lajix bael ta Gilgal.

¹³ Jich bajt' te Samuel te banti ay Saúl, jich la yal te Saúl: —Ac'a yac'bat bendición te Cajwaltique. C'otix ta pasel cu'un te smandale —xi'.

¹⁴ Pero c'opoj te Samuel: —¿Jich bal? ¿Bi yu'unix a jiche te yacon ta yaiyel yoq'uel chijetic, soc yac ta julel ta jchiquin yoq'uel wacaxetic? —xi'.

¹⁵ La sjac' te Saúl: —Te winiquetic la yiq'uic tel ta sq'uinal amalequetic, melel te winiquetic la yijq'uitayic te banti mero t'ujbilic te chijetic, soc nix te wacaxetic, swenta yu'un ya me yich' aq'uel ta chic'bil smajt'an te Cajwaltic te Dios awu'une. Pero spisil te yantique la yich'ic lajinel ta jc'axel stuquel —xi' xan.

¹⁶ Pero ora jajch' ta c'op te Samuel: —Ch'aban to, aiya awaiy te bi la yalbon ajc'ubey te Cajwaltic —xi'. —Jichuc, c'opojan —xi' te Saule.

¹⁷ Jich la yal jajch'el te Samuel: —¿Ma bal mero peq'ueluc la awaiy aba jiche te ja'ate? Pero ochat ta jwentainwanej yu'un spisil ta jchajp te sts'umbal israeletic, te Cajwaltic la stsaat yu'un ochat ta muc' ajwalil yu'un te israeletique.

¹⁸ Mero bayal sc'oplal te mandal yu'un te Cajwaltic la yalbat bael apase, te ya alajin te jmulawil amalequetic, te mero jc'axel ya alajin ta spisilique.

¹⁹ ¿Bi yu'unix a jiche te la ac'axintaybey te smandale? Tey bajt' awo'tan ta bi la yich' pojel te acontroe. Ma lecuc yo'tan yu'un te Cajwaltic te jich la apase —xi'.

²⁰ La sjac' te Saúl: —La jch'uunbey te smandal Cajwaltic, la jpasix te bi at'el la yac'bon ta jwenta spasele: la quic' tel ta chuquel te Agag te muc' ajwalil yu'un amalequetic, soc la jlajin ta spisil.

²¹ Pero te soldadoetic la yiq'uic tel chijetic, wacaxetic soc te bitic t'ujbil yu'unic te sc'oplal ya xlaje, yu'un ta Gilgal ya yich' aq'uel ta milbil smajt'an swenta yich'el ta muc' te Cajwaltic te Dios awu'une —xi'.

²² La sjac' te Samuel: —Ja' buen lec yo'tan Cajwaltic yu'un teme ya yich' ch'uunel smandal; ma ja'uc bayal sc'oplal teme ya cac'beytic milbil smajt'an soc chic'bil smajt'ane. Ja' mero bayal sc'oplal te ya jch'uunbeytic smandal soc teme ya cac' ta co'tantic te bi ya yale; ma ja'uc bayal sc'oplal te ya cac'beytic milbil smajt'an soc smajt'anin xepuil chije.

²³ Te mach'a ya sta smul ta stojol Cajwaltic ta scaj stoybail, ja' pajal soc te mach'a ya sta smul ta scaj ay bi ya xju' yu'un sna'el ta sc'ope. Ja' pajal soc te mach'a ya xch'uun loc'ombaetic te mach'a ya xc'axintaybey te smandale. Te ja'ate la ach'aybey smandal te Cajwaltic, ja' yu'un ja' nix jich ch'aybil ya xc'oat soc awat'el ta muc' ajwalil —xi'.

²⁴ Patil te Saúl la yalbey te Samuel: —Melel nix a, la jta jmul. Melel la jc'axintaybey te smandal te Cajwaltic soc nix te ac'ope. Scaj te ja' la jxi' stuquel te winiquetique, ja' yu'un la quich'bey ta wenta te sc'opique.

²⁵ Wocoluc, pasbon perdón te jmule. Sujt'ucotic bael, swenta yu'un ya me jch'uuntic te Cajwaltique —xi'.

²⁶ La sjac' te Samuel: —Ma niwan, ma ba ya joinat sujt'el, melel la ach'aybey smandal te Cajwaltique. Yo'tic ja' ni me jich ch'aybil ya xc'oat soc awat'el ta muc' ajwalil ta stojol Israel —xi'.

²⁷ Te Samuel la sut sba swenta yu'un ya me xjajch' ta beel, pero te Saúl la stsac ta sti'il smuc'ul c'u', toj jatsel loq'uel te spaq'ue.

²⁸ Jich c'opoj ta stojol Saúl te Samuel: —Ja' nix jich la yich'ix jatsel loq'uel ta atojol c'oem yu'un Cajwaltic te awat'el ta muc' ajwalil ta Israel. La spojbat swenta yu'un ya yac'bey ta swenta yan ajoy ta israel te ja' lec stuquele, te ma jichuc te bit'il ja'ate.

²⁹ Melel te Diose, te ja' yutsilal te Israel, ma sna' lot soc ma patiluc ya sut sc'op. Melel ma pajaluc soc mach'auc nax winiquil te patil ya sut sc'ope —xi'.

³⁰ La yal xan te Saúl: —La jta jmul. Wocoluc, ich'awon ta muc' jich nix te bit'il muc' ajwalilon a, jich me ya yilic te mamaletic yu'un Israel soc ta spisil te jlumaltique. Ja' yu'un, sujt'ucotic bael, swenta yu'un ya me xba jch'uuntic te Cajwaltic te Dios awu'une —xi'.

³¹ Jich sujt' bael soc Saúl te Samuele, c'o xch'uun te Cajwaltique.

³² La yal mandal te Samuel: —Ic'bonic tel ta jtojol te Agag te muc' ajwalil yu'un te amalequetic —xi'. Te Agag bin nax yo'tan tal ta stojol Samuel, la wan scuy te ma xc'otix ta swenta te xc'uxul te lajele.

³³ Pero te Samuel jich la yalbey: —Ta swenta apuñal te ma'yuc jilel yalatac bayal ta jtul antsetique. Yo'tic ja' ni me jich ya xjil te ame'e —xi'. Te Samuel ora nax la sesen te Agag ta stojol Cajwaltic ta Gilgal.

³⁴ Patil bajt' ta Ramá. Jich te Saúl sujt' bael ta sna ta Gabaa-yu'un-Saúl.

³⁵ Te Samuel tey ma'yuquix bi ora la yilbey xan sit a te Saúl, manchuc me bayal la smel yo'tan yu'un te la sut sc'op te Cajwaltic ta stojol Saúl te la yac' ochel ta muc' ajwalil ta Israel.