1 Samuel 13 - Bible in Tzeltal de Oxchuc y Tenejapa

La yac'bey sbaic guerra soc filisteoetic

¹ Ayix ya'wilal a te Saúl te c'alal och ta muc' ajwalil yu'un te israeletique. C'alal ayix ja'wil yochel ta muc' ajwalil a,

² la stsa oxmil (3,000) soldadoetic ta sq'uinal Israel. Cha'mil (2,000) jil soc ta lum Micmas soc ta switsul Betel. Te yan jmil (1,000) xane jil soc Jonatán ta lum Gabaa ta sq'uinal sts'umbal Benjamín. Te jayeb xan jil te winiquetic, la sticunlan sujt'el ta snaic te Saule.

³ Te Jonatán la slajin te jchajp soldado-filisteoetic ayic ta lum Gabaa; la yaiyic te filisteoetique. Te Saúl la sticun ta oq'uesinel oq'ues ta spamal nación swenta yu'un ya me yaiyic te hebreoetique.

⁴ Spisil israeletic la yaiyic te bit'il te Saúl la slajin te jchajp soldado-filisteoetic, te ja' swentail te mero jajch'em slab yo'tanic ta stojol hebreoetic te filisteoetique. Ja' yu'un te soldadoetic la stsob sbaic soc Saúl ta Gilgal.

⁵ Jich te filisteoetic la stsob sbaic, swenta yu'un ya me yac'bey sbaic guerra soc te israeletique. Ay lajuneb xcha'winic ta jmil (30,000) carretaetic yu'un guerra te tasbil ta caballoetic, wacmil (6,000) soldadoetic cajajtic ta caballo, soc mero bayalic yantic soldadoetic te ya xbeen ta yacanic te mero bayalic, jich yipalic te bit'il sji'al mar. Tojic bael ta lum Micmas, c'o spas scampamentoic ta stojol sloq'uib c'aal yu'un Bet-avén.

⁶ Te israeletic jajch'ic ta buen wocol yu'un te c'alal tenotic yu'un te filisteoetique. La snac' sbaic ta ch'entiquil, ta lom ch'entiquil, ta nailch'entiquil, ta beja' ch'entiquil soc ta pozoetic.

⁷ Ay tsobolic c'axic ta jejch' ja' Jordán ta sq'uinal Gad soc sq'uinal Galaad, pero te Saúl jil ta Gilgal stuquel. Spisil te soldadoetic yu'un, t'unbil to nix yu'un, pero yacalic ta buen xiwel.

⁸ Tey com juqueb c'aal a te Saúl, jich te bit'il albot yu'un Samuel te ya xmaliywane. Pero ma ba chican ta c'oel ta Gilgal te Samuele. Te soldadoetic yacaliquix ta pujq'uel.

⁹ Ja' yu'un te Saúl la yal mandal: —Ic'bonic tel chambalametic yu'un te milbil smajt'an Dios te ya yich' chiq'uel, soc milbil smajt'an Dios swenta seña lamal-o'tanile —xi'. Ja' nix la smil xchic'bey smajt'anin te Cajwaltique.

¹⁰ Te c'alal yac ta lajel yo'tan ta yaq'uel a te chic'bil smajt'an Dios te Saúl, c'ot te Samuele. Te Saúl loc' tel ta yilel soc ta spatbeyel yo'tan,

¹¹ pero albot yu'un te Samuel: —¿Bistuc te jich la apase? —xi' sc'oplal. La sjac' te Saúl: —La quil te yaquix ta pujq'uel bael te winiquetic, soc te bit'il ma ba yacat ta julel ta yorail te bi c'aalil calojtique. Soc la quil xan te bit'il stsobojix sbaic ta lum Micmas te filisteoetic,

¹² la cal teme ora ya xco tel yac'bonic guerra ta Gilgal. Ja'uc me to, la jna' te ma ba cac'oj jba ta swenta Cajwaltic a teme ma ba ya cac'bey milbil smajt'ane. Melel bayal sc'oplal ta co'tan la caiy, ja' yu'un jo'onix la cac'bey te chic'bil smajt'an te Cajwaltique —xi' te Saule.

¹³ Albot yu'un te Samuel: —Ma x'ana' q'uinal, Saúl, ma ba lec te bi la apase. Te lajuc ach'uun te bi mandalil la yalbat te Cajwaltic, ja'at me atalel muc' ajwalilat ya xc'oat yu'un soc ats'umbal ta stojol Israel te jichuque.

¹⁴ Pero yo'tic, te ochemat ta muc' ajwalile, ma ba ya xjalajat ta ajwalil soc ats'umbal bael. Te Cajwaltic ya me sle winic te lec yo'tan yu'une, ja' me ya yac'bey yich' yat'el ta jwentainwanej ta stojol te lum yu'une, scaj te ma ba la ach'uunbey te smandal la yalbate —xi' te Samuele.

¹⁵ Ora loc' bael ta Gilgal te Samuel, bajt'. Te jayeb xan te soldadoetic bajt'ic soc Saúl ta guerra, jajch'ic ta Gilgal, c'otic ta Gabaa ta sq'uinal Benjamín. Tey c'o yajtay a te soldadoetic yu'un, lajunwinic xcha'bajc' (600) te winiquetic sjoineje.

¹⁶ Saúl soc te snich'an, ja' te Jonatán, soc te soldadoetic sjoinejic jilic ta Gabaa ta sq'uinal Benjamín. Jich te filisteoetic jilic ta lum Micmas.

¹⁷ Pero oxchajp soldadoetic loq'uic jajch'el ta campamento yu'un te filisteoetic: jchajp tojic bael ta Ofra ta sq'uinal Sual,

¹⁸ yan bajt' ta Bet-horón, te yoxebale bajt' ta ch'in wits ta suclej yu'un Zeboim ta stojol muc' taquin q'uinal bael.

¹⁹ Ta spamal sq'uinal Israel ma'yuc jtuluc jten-taq'uin, melel te filisteoetic jich la snop ta yo'tanic te jich ma ba ya xwejt' bit'il ya spas spuñalic soc slanzaic te hebreoetique.

²⁰ Spisil te israeletic toj ya xbajt'ic ta stojol filisteoetic yu'un ya yac' ta tenel staq'uinal ye arado yu'unic, azadonetic, yechejic, soc spicoic.

²¹ Juqueb gramo plata la stojic te la yaq'uic ta tenel staq'uinal ye arado yu'unic, soc yazadonic; soc olil xchaneb gramo plata la stojic te la yac' ta tenel ye yechejic soc sni'il stijibal-wacaxique.

²² Ja' yu'un te jayeb mach'atic la sjoinic ta guerra te Saúl soc Jonatán, ma'yuc yich'ojic puñal soc lanza, ja'ic nax xchebalic te ay yu'unique.

²³ Jchajp soldado-filisteoetic c'otic ta xujc' jemel te banti c'axibal ta nopol lum Micmas.