1 Samuel 12 - Bible in Tzeltal de Oxchuc y Tenejapa

Samuel la yac'bey jilel yat'el te Saúl

¹ Te Samuel c'opoj ta stojol ta spisil te israeletique: —La awiliquix te spisil te bi la ac'anbonic, la quich'beyex ta wenta, soc la cac'beyex te muc' ajwalil awu'unique.

² Li' ayix te muc' ajwalil awu'unic te ya swentainexe. Te jo'one mamalonix, saquix jol, te jnich'nabe ay ta awolilic. Jo'on te la jwentainex ta jqueremil to tel c'alal ora.

³ Yo'tic li' ayon ta atojolic. Teme ay mach'a la jpojbey swacax o sburro, teme ay mach'a ay swocol cu'un, teme ay mach'a la jtojol-lebey smul, teme ay ma tojuc la jchajban ta swenta sbic'tal co'tan yu'un taq'uin, ya xju' ya awalbonic jmul ta stojol te Cajwaltic soc ta stojol te muc' ajwalil te ja' nix stsaoje. Ya me jtojbey te mach'a ay jbet yu'une —xi'.

⁴ La yalic te israeletic: —Ma'yuc la awac' jwocoltic, ma'yuc la awuts'inotic. Ma'yuc banti ma lecuc la achajbanotic ta swenta sbic'tal awo'tan yu'un taq'uin —xiic.

⁵ La yal xan te Samuele: —Te Cajwaltic soc te muc' ajwalil stsaoje, ja' testigoetic te ma'yuc bi la atabonic jmul a —xi'. —Jich nix a —xiic xan.

⁶ Cha'c'opoj xan te Samuel, jich la yalbey te yajwal lum: —Te Cajwaltic la yabatin Moisés soc Aarón, la sloq'ues tel ta Egipto te antiguo jts'umbaltique.

⁷ Yo'tic lamana abaic, ya me jtijex ta stojol te Cajwaltic, yu'un te jayeb bitic spasbeyejex ta atojolic soc te antiguo jts'umbaltique:

⁸ Te Jacob soc te mach'atic ay yu'une, bajt'ic ta Egipto. Te patil alnich'anetic yu'un jajch'ic ta buen uts'inel yu'un te egipcioetique; jich la yalic wocol ta stojol te Cajwaltic. Ja' yu'un la sticun Moisés soc Aarón. Ja'ic la yac'bey yiq'uic loq'uel tel ta Egipto te antiguo me'il-tatiletic cu'untic, soc la yac' ainicuc ta lumq'uinal in to.

⁹ Pero patil la yijq'uitayic te Cajwaltic te Dios cu'untique, ja' yu'un ac'otic ta sc'ab Sísara, te swentainej te soldadoetic yu'un Jabín te muc' ajwalil yu'un Hazor, soc ta sc'ab filisteoetic, soc ta sc'ab muc' ajwalil ta Moab. Ja'ic la stsac sbaic ta guerra soc.

¹⁰ Pero la sna'ic te staoj smulic ta stojol Cajwaltic te bit'il la yijq'uitayic, ta scaj xch'uunel sloc'ombail Baal soc sloc'ombail Astarté. La xcha'albeyic xan wocol te yacuc xcoltayotic loq'uel ta sc'ab te scontroique. La yal sbaic ta jamal te ja' xanix stuquel te Cajwaltic te ya xch'uunique.

¹¹ “Patil te Cajwaltic la sticun Jerobaal, Barac, Jefté soc jo'on te Samuelon, swenta yu'un ya jcoltaytiquex loq'uel ta sc'ab te acontroic, jich jun awo'tanic ya x'ainex.

¹² Pero te ja'exe, te c'alal la awaiyic te ya xtal yac'beyex guerra te Nahas te muc' ajwalil yu'un amonetic, la ac'anbonic muc' ajwalil yu'un ya swentainex, manchuc me ja' muc' ajwalil awu'unic stuquel te Cajwaltic te Dios cu'untique.

¹³ Pero li' ay te muc' ajwalil te tsabil awu'unique, te Cajwaltic la yac'beyex te muc' ajwalil la ac'anbeyique.

¹⁴ Yo'tic, ja'ex me ya awich'ic ta muc' te Cajwaltic, ya me ach'uunic stuquel. Ya me ach'uunbeyic smandal, ma me xac'axintaybeyic; tojuc me x'ainex ja'ex, soc nix te muc' ajwalil awu'unique. Lecuc me ya x'ainex, pasbeyaic me sc'anjel yo'tan te Cajwaltic te Dios cu'untique. Jich me lec ya xc'oex.

¹⁵ Yan teme ma ba ya ach'uunbeyic smandal, teme ya ac'axintaybey smandal, ya me yac'beyex castigo te ja'exe, soc ya me yac'bey castigo te muc' ajwalil awu'unique.

¹⁶ “Ja' yu'un, ma me xjajch'ex bael te banti ayexe, ya me awilic te muc' señail ya spasbeyex awilic te Cajwaltique.

¹⁷ Yo'tic yorail set' trigo, ma yorailuc ja'alel q'uinal, jna'ojtic ta jpisiltic. Pero ya me jc'opon te Cajwaltic, ya me yac' tel buen tulan chawuquil ja'al, swenta yu'un jich me ya ana'ic xan, soc jich me ya awilic a te ma ba lequex ta sit Cajwaltic, yu'un te la ac'anic muc' ajwalil awu'unique —xi' te Samuele.

¹⁸ Jajch' ta sc'oponel Cajwaltic te Samuele. Ora la yac' tel buen tulan chawuquil ja'al te Cajwaltique. Jich jajch'ic ta buen xiwel te israeletic ta stojol te Cajwaltic soc ta stojol te Samuele.

¹⁹ Ja' yu'un, jich la yalbeyic te Samuel: —Albeya wocol te Cajwaltic te Dios awu'un, te manchuc ya xlajotic jo'otic te abatotic awu'un, melel bayal jmultic ta jpisiltic, soc ja' jmultic xan te la jc'antic muc' ajwalil cu'untique —xiic.

²⁰ La sjac' te Samuel: —Ma xiwex. Melel nix a te mero ma lecuc te bi apasojique, pero yo'tic ma me xapit loq'uel abaic ta stojol te Cajwaltique. Ch'uunaic ta spisil awo'tanic.

²¹ Ma xach'uunic lotil diosetic te melel ma'yuc bi ya yac'beyex soc ma xcoltaywan, melel ma Diosuc stuquelic.

²² Pero te Cajwaltic, yo'tan ya x'ich'ot ta muc' te xch'ul-biile, jich ma ba ya spijt'esex, ja' ya sc'an te ja'ex te lum ya xc'oex yu'une.

²³ Jich te jo'one, ac'a me scoltayon te Cajwaltic te manchuc ya jquejch'an yalel wocol ta stojol ta awentaique, melel teme jich ya jpase, ja' me jmul ta stojol te Cajwaltique. Ja' lec ya me cac'beyex anopic bit'il ya sc'an ya awac' abaic, soc te bit'il mero toj ya x'ainexe.

²⁴ Yan te ja'exe, ja' nax ya sc'an te ya ach'uunbeyic smandal te Cajwaltic, soc ya me ach'uuntayic ta mero melel soc ta mero spisil awo'tanic. Ja' me x'ana'ic te mero bayal bi spasojbeyex te Cajwaltique.

²⁵ Pero teme ya to apasic xan te bi amene, pajal me ya xlajex soc te muc' ajwalil awu'unique —xi' te Samuele.