1 Samuel 11 - Bible in Tzeltal de Oxchuc y Tenejapa

Saúl la stsal amonetic

¹ Nahas, muc' ajwalil yu'un Amón, bajt' ta Jabes-yu'un-Galaad, c'o xchajban te soldadoetic yu'une swenta yu'un ya me yac'beyic guerra te lum Jabes. Pero te yajwal te lum Jabes jich la yalbeyic: —Jpastic trato, jich me ya cac' jbajtic ta ac'ab —xiic.

² Te amon-winic Nahas jich la yal: —Ya jpas trato soc ja'ex, pero teme ya ach'uunic te bi ya cale: Ya me jloq'uesbeyex awa'el-sitic ta apisilic, swenta yu'un jich me ya cac' ta q'uexlal spisil israeletic —xi'.

³ Te mamaletic yich'oj yat'elic ta Jabes, jich la yalic: —Ac'botic juquebuc c'aal, swenta yu'un ya me jpuctic ta alel ta spamal sq'uinal israeletic. Teme ma'yuc mach'a tal scoltayotic, ja' to me ya cac' jbajtic ta atojol a —xiic.

⁴ Te jpuc-c'opetic yu'unic c'otic c'alal ta Gabaa te banti nainem te Saúl, la yalbey yaiyic te yajwal lume. C'alal la yaiyic, jajch'ic ta buen oq'uel yu'un.

⁵ Ja' yorail yac ta julel ta at'el soc swacax a te Saule. La sjojc'o: —¿Bi la spas te jlumaltique? ¿Bi yu'un te yacalic ta oq'uele? —xi'. Te yajwal lum la yalbey yaiy te c'op tal yalic te winiquetic talemic ta Jabes.

⁶ C'alal la yaiy te Saúl, ora noj ta yo'tan te yip yu'el te Diose, ilin yo'tan yu'un te c'ope.

⁷ Jich la stsac cheb wacaxetic, la sesen. La yac'bey ta sc'ab jpuc-c'opetic, jich pujc' yu'un ta spamal sq'uinal israel te sesenbil wacaxetic. Soc jich la yalic te jpuc-c'opetique: —Jich me ya yich' pasel swacaxic te mach'atic ma ba ya yac' sbaic ta stojol Saúl soc Samuel, soc teme ma ba ya st'unique —xiic ta yalel. Och xiwel ta yo'tanic ta spisil te israeletic, la syom sbaic ta jun nax, ta spisilic bajt'ic ta stojol te Saúl soc te Samuele.

⁸ Te c'alal la yajtay te swinictac ta Bezec te Saúl, la yil tsojbaj yu'un jo'lajunwinic ta jmil (300,000) te israeletic, soc lajuneb xcha'winic ta jmil (30,000) talic ta Judá.

⁹ Jich la yalbey te jpuc-c'opetic julemic tele: —Albeya te yajwal Jabes te pajel ta olil c'aal ya me jcoltaytic —la yut. Bajt'ic te jpuc-c'opetique, c'o yalbeyic te yajwal Jabes. Bin nax yo'tanic yu'un.

¹⁰ Jich la smaquic ta c'op te Nahas: —Pajel ya me cac' jbajtic ta ac'ab, swenta yu'un ya me apas te bila ya sc'an awo'tan ya apasbotique —la yutic.

¹¹ Ta xchebal c'aal te Saúl la xchap te soldadoetic yu'une, oxchajp la yac'. Ma to ba sacuben q'uinal a, ochic bael ta yolil te campamento yu'un te scontroique. Och smilic ta spisil te amonetic, yacalic ta smilel a la sta olil c'aal. Te jayeb xan cuxinic jilel, la spuc sbaic ta anel ta jyalel, ma'yuquix mach'a cheb sjoinej jilel sbaic.

¹² Patil ay cha'oxtul te israeletic te jich la yalbeyic te Samuel: —¿Mach'atic a te la yalic te ma lecuc ta muc' ajwalil cu'untic te Saule? Ac'botic ta jc'abtic yu'un ya jmiltic —xiic.

¹³ Pero jich la yal te Saúl: —Yo'tic ma'yuc mach'a ya xju' ya xlajix, melel te Cajwaltic la scoltayotiquix te jo'otic te israelotique —xi'.

¹⁴ Soc la yal te Samuel: —Conic ta Gilgal, swenta yu'un tey me ya jchajbanbeytic xan yan buelta a te yat'el te muc' ajwalile —xi'.

¹⁵ Ja' yu'un spisil yajwal lum bajt'ic ta Gilgal. Tey ta stojol te Cajwaltic la yac'beyic yich' xan yan buelta yat'el ta muc' ajwalil te Saule. Soc ora la yac'beyic milbil smajt'an swenta seña lamal-o'tanil te Cajwaltique. Te Saúl soc ta spisil te israeletic mero bayal yutsil yo'tanic yu'un.