1 Samuel 10 - Bible in Tzeltal de Oxchuc y Tenejapa

Samuel la yac'bey seña swenta muc' ajwalil Saúl

¹ Te Samuel la stsac jun ch'in oxom aceite, la smalbey ta sjol te Saule. Te c'alal yac ta smalbeyel ta sjol a, jich la yal: —Yo'tic la awich'ix aseña yu'un Cajwaltic, swenta yu'un ya me awich'ix awat'el ta ajwalil ta stojol te lum Israel yu'une. Ja'at me ya awentainotic, soc ya me acoltayotic ta sc'ab te jcontrotic te ay ta sjoylejal. Jich me ya ana' te la yalatix ta jamal te Cajwaltic te ya x'ochat ta ajwalil ta stojol te lum yu'une:

² te c'alal ya xloc'at bael ta jtojol, ya me ata cheb winiquetic ta nopol smuquenal Raquel, ta Selsa, ta sq'uinal Benjamín. Ya me yalbat: “Chicnajix te burraetic yacat sleele, ja' yu'un ma'yuquix sc'oplal ta yo'tan te atate. Ja'ex te yac sna'belexe, yac ta sna'el bila ya spas ta awentaic”, xi' me.

³ Soc ya me xc'ubat bael. C'alal ya xc'oat ta jijte' yu'un Tabor, ya me xjul tel ta atojol oxeb winiquetic te yacalic ta moel bael ta Betel ta xch'uunel Dios. Te jtule yic'oj oxeb tentsunetic, te xchebale yich'oj oxeb pan, te yoxebale yich'oj jun nujc'ul vino.

⁴ Ya me spatbat awo'tan, soc ya me yac'bat cheb pan. Tsacbeya me.

⁵ Patil ya me xc'oat ta Gabaa yu'un Dios ta banti nainem jchajp soldadoetic yu'un filisteoetic. Te c'alal ya x'ochat ta lume, ya me ata aba soc jchajp j'alwanejetic yu'un Dios te yacalic ta coel tel ta toyol ch'uunjibal. Yacalic ta aq'uel ta c'op yu'un Dios, soc ay me mach'atic neel te yacalic ta stijel salterio, pandero, flauta soc arpa.

⁶ Te espíritu yu'un te Cajwaltic ya me xnoj ta awo'tan. Jich me ya yac'at ta c'op te Diose, jich te bit'il yacal spasbel te j'alwanejetique. Jich me ya sjelbat awo'tan.

⁷ Te c'alal jich c'otix ta pasel ta atojol spisil a te bitic la calbatixe, pasa spisil te bila ya sc'an awo'tan ya apase, ja' me ya scoltayat te Diose.

⁸ Neelajan bael ta Gilgal, patil ya me xboon. Tey me ya xc'o jta jbajtic a, swenta yu'un ya me cac'bey chic'bil smajt'an soc milbil smajt'an Dios swenta seña te lamal-o'tanile. Ya me amaliyon juqueb c'aal tey a ja' to teme c'oone, soc teme la calbat te bila ya sc'an ya apase —xi' te Samuele.

⁹ Pero ja' nax te c'alal la yijq'uitay sba soc Samuel te Saule, ora nax jelbot yo'tan yu'un te Diose. Ja' nix jun sc'aalelal c'ot ta pasel spisil te bitic albot yu'un Samuel.

¹⁰ Patil c'alal c'ot ta Gabaa te Saúl soc te abat yu'une, la sta sba soc te jchajp j'alwanejetic yacalic ta aq'uel ta c'op yu'un te Diose. Te espíritu yu'un Dios noj ta yo'tan te Saúl, jich och ta aq'uel ta c'op yu'un Dios, jich nix te bit'il yantique.

¹¹ Pero spisil te mach'atic ya xna'bot sba ta namey yu'une, te c'alal la yilic te och ta aq'uel ta c'op yu'un Dios, jich la yalbey sbaic: —¿Bi wan la spasix a te snich'an Cis? ¿Ja' balix jun j'alwanej jiche? —xiic.

¹² Ay yan mach'a tey ay a te jich la yal: —¿Bi sbiil te jtsobwanej yu'unique? —xiic. Ja'ix te bila ya nax jmulantic yalel te: “¿Ja' balix j'alwanej jiche te Saule?” te xie.

¹³ C'alal laj yo'tan ta yalel te sc'op j'alwanej, te Saúl bajt' ta sna. C'alal c'ot ta sna

¹⁴ ta xchebal soc te yabate, jojc'obotic yu'un te stajune: —¿Banti c'oex? —xi'. —C'oon ta sleel burraetic, pero te c'alal ma ba chican te burraetic, ba quil Samuel —xi' te Saule.

¹⁵ La sjojc'o te stajun: —¿Bi la yalbeyex te Samuele? Wocoluc albon caiy —xi'.

¹⁶ —Jamal la yalbotic te la staiquix te burraetique —la yut te stajune. Pero ma ba la yalbey stuquel te albot yu'un Samuel te ya x'och ta ajwalile.

¹⁷ Patil te Samuel la stsob ta spisil te israeletic, yu'un la stsob sbaic ta Mizpa ta xch'uunel te Cajwaltique.

¹⁸ Jich la yalbey tey a te sjoy ta israel: —Te Cajwaltic te Dios cu'untic te israelotique, jich ya yal: “Jo'on la jloq'uesex tel ta Egipto ja'ex te israelexe. La jcoltayex loq'uel ta sc'ab te egipcioetic, soc ta sc'ab spisil yantic ajwaliletic te ay awocolic yu'une”, te xie.

¹⁹ Pero yo'tic ma'yuquix sc'oplal ta awo'tanic te Dios awu'unic, te la scoltayex te c'alal ay bitic ay awocolic yu'un a, soc te ay bitic c'ux obol abaic yu'une. Ma ba la ac'aniquix, melel ya ac'anic te ya jlebeyex muc' ajwalil yu'un ya x'och swentainex. Ja' yu'un, yo'tic tejc'ana abaic ta stojol Cajwaltic ta juju-jchajp ats'umbalic, soc ta juju-jchajp te mach'atic ay awu'unique —xi' te Samuele.

²⁰ La yal mandal te Samuel te ya xnoptsajic spisil ta jchajp te sts'umbal Israel. La spasbeyic snúmero ta na'el, ja' tsabil c'ot te sts'umbal Benjamín.

²¹ Ta patil la yal mandal te ya xnoptsajic tel te sts'umbal Benjamín. Ja' tsabil c'ot xan ta xchajbal te mach'atic ay yu'un Matri, soc tey tsaotix loq'uel a te Saúl te snich'an Cis. Pero la sleic, ma ba la staic.

²² Jich la sjojc'obeyic xan te Cajwaltic teme tey nix ay a te Saule. La yal te Cajwaltic: —Tey nix ay a, snac'oj sba ta biluquetic —xi'.

²³ Jich ora bajt'ic ta animal, la stsaquic tel ta banti snac'oj sba. Te c'alal la stejc'an sba ta stojol te lum te Saúl, chicnaj te ma'yuc yan israel-winic ya xc'ax ta snejq'uel.

²⁴ Jich la yal te Samuel: —¿La bal awilic te mach'a la stsa te Cajwaltic te ya x'och ta ajwalile? Ma'yuc jtuluc yan israel te ya xpajot yu'un —xi'. —¡Viva muc' ajwalil cu'untic! —xiic ta aw te israeletique.

²⁵ C'alal laj yo'tanic, te Samuel la yalbey yaiyic te mandaliletic ya xtuun yu'un te ajwalile. La sts'ibuy ta jun, la spas ta libro, la yac' ta ch'ul templo ta stojol te Cajwaltique. Patil te Samuel la sticunlay bael ta sna spisil te israeletique.

²⁶ Soc nix te Saúl, bajt' ta sna ta Gabaa. Dios la stijbey yo'tanic tsobol ta jtul te winiquetic bayal yip yo'tanic, bajt'ic soc, swenta yu'un ya sjoinic.

²⁷ Pero te mach'atic amen yo'tanic, te spisil nax bi ya xloc' ta yeique, jich la yalic: —Eha. ¿Ja' bal ya scoltayotic? —xiic. Ma'yuc swentail ta yo'tanic, ma ba la yich'ic ta muc', pero te Saúl jich yilel te ma ba la yaiye.