Sofonías 2 - Bible in Tzeltal Bachajón

Castigo ta stojol te nacionetic ta sjoyobal

¹ Tsoba abahic, jun xawac' abahic, ha'at nación te mayuc aq'uexlal,

² te c'alal ma to ba c'ohem ta pasel a te bin chapbil soc te hich ya xc'ax bahel te sc'ahc'alel te bin ut'il suhlil trigo; c'alal ma to ba c'ohem ta atojolic a te tulan sc'ahc'al yilimba te Jehová; c'alal ma to ba c'ohem ta atojolic a te sc'ahc'alel yilimba te Jehová.

³ Lehahic te Jehová apisilic te peq'uelex ta bahlumilal, ha'ex te la apasic te mandariletic yu'une; lehahic te bintic stojil ta pasel, lehahic bin ut'il peq'uel yac awac' abahic, ya wan xcolex ta sc'ahc'alel yilimba te Jehová.

⁴ Ihquitaybil ya xc'oht te Gaza, jimbil ya xc'oht te Ascalón, ta c'ahc'alel ya yich' pojbeyel sbiluc Asdod, soc ya yich' bulel loq'uel te Ecrón.

⁵ ¡Obol sbahic te mach'atic nahinemic ta sti'il mar, te pueblo yu'un te cereteohetique! Hich yaloj te Jehová ta scontrahimbelex: ¡Canaán, sq'uinal filisteohetic, ya jlajinat, mayuquix mach'a ya xnahin hilel tey a!

⁶ Te q'uinal ta ti' mar ya xc'atp'uj hilel ta aquiltic, ya xc'atp'uj ta corraletic yu'un tuminchijetic.

⁷ Ha yu'un ya xc'oht te mach'atic hilemic yu'un Judá, tey ya sta swe'elic a. Ya xwayic ta ahc'abal ta nahetic yu'un Ascalón, yu'un ya xna'botic yu'un te Jehová te Dios yu'unic, ha ya yac'ticlan tal te banti chuculique.

⁸ Ca'iybeyej te labanel yu'un Moab soc te stse'layel te amonetic te la spehc'ambeyic sc'oblal a te pueblo cu'un soc te muc' la yac' sbahic ta stojol te sq'uinalique.

⁹ Ha yu'un, ya cal ta jamal te bin ut'il cuxulon, xchi te Jehová te scuentahinej spisil, te Dios yu'un Israel, te Moab hich ya xc'oht te bin ut'il Sodoma, soc te amonetic hich ya xc'ohtic te bin ut'il Gomorra; ha q'uinal yu'un ch'ixetic ya xc'oht soc yawil banti ya xloc' ats'am, jimbil ya xhil sbahtel q'uinal. Te mach'atic cuxulic hilel yu'un te pueblo cu'un ya me spojbeyic sbiluquic soc ya me yich'beyic te sq'uinalique.

¹⁰ Hich ya x'a'botic yu'un te stoybahilic, como la yixta'c'optayic te pueblo yu'un Jehová te scuentahinej spisil, soc muc' la yac' sbahic ta stojol.

¹¹ Te Jehová xiweltic sba ya xc'oht ta stojolic, ya sjinticlan spisil te diosetic ta q'uinal; spisil te nacionetic ta sti'il te q'uinal ya me squejan sbahic ta stojol tey nix ta banti ayique.

¹² Ha nix hichex te ayex ta Etiopía, ya me xlajex ta espada cu'un.

¹³ Soc ya shach sc'ab ta scontrahinel te norte, ya sjin te Asiria, soc ya sc'atp'ujtes ta jimbil q'uinal te Nínive, taquin ya xc'oht hich te bin ut'il jochol taquin q'uinal.

¹⁴ Jtsohb tuminchijetic ya slahman sbahic tey a, soc spisil te ha'mal chambahlametique; te pelícano-mut soc te erizo-mut ya xwayic ta sba te oyetic yu'une, ya xchicnaj sc'opic ta ventanahetic, ay jinel ta ti'nahiletic, como jamal ya xhil te sts'amte'el pasbil ta cedro.

¹⁵ Ha ini te pueblo te ay yutsil q'uinal ya ya'iy, te smuc'ulinej sba yo'tan, te hich la yal ta yo'tan: Ho'on nax, mayuc yan, te xchihe. ¡C'ax jimbil c'oht, ha yawilix ti'awal chambahlametic! Spisil te mach'atic ya xc'axic tey a ya slabanic soc ya stij sc'abic yu'un.