Rut 4 - Bible in Tzeltal Bachajón

Booz ya xnuhpun soc Rut

¹ Patil, te Booz baht ta yochibal te pueblo, la shuhcan sba tey a. Ha yorahil te c'ax tey a te winic te ma yanuc parte yu'un te Rut, te halbot sc'oblal yu'un Booz. Hich la yalbe: A'iya awa'iy, la', huhcana aba, xchi. Hich tal shuhcan sba te winique.

² Hich te Booz la yic' tal lajuntuhl mamaletic yu'un te pueblo, hich la yalbe: Huclanic li'i, xchi. Hich la shuhcan sbahic.

³ Te Booz hich la yalbe te winic te ma yanuc parte yu'une: Te Noemí, te suhtemix tal ta sq'uinal Moab, ya schon sq'uinal te quermanotic Elimelec.

⁴ Ya jc'an ya ca'bat ana' yu'un yac aman te q'uinal ta stojol te mach'atic li' huhcajtic ini soc te mamaletic yu'un te pueblo cu'une. Teme yac ac'an yac aman te q'uinal, mana hiche; yan teme ma xac'an, halbon ca'iy scuenta yu'un hich ya jna' a, como mayuc yan mach'a ay ta scuenta te ya sman, ha'at nax, patil te ho'one, xchi. Ya jman, xchi.

⁵ Ha yu'un te Booz la yalbe xan: Te bin ora yac amambe te sq'uinal Noemí, ya me awic' te Rut te moab-ants, te yihnam chawinic, scuenta yu'un yac acha'hachbe sbihil ta sq'uinal te chawinic, xchi.

⁶ Hich la sjac' te mach'a ma yanuc parte yu'un: Ma xhu' ya jman, teme repente ya ya'bon jwocol soc te bintic ay cu'un. Mana ha'at, ich'a te bin ay ta jcuenta, como ma xhu' ya jman, xchi.

⁷ Ta namey hich ay te costumbre ta Israel, teme ya sman q'uinal soc teme ya xc'oht ta stojol yan, te jtuhle ya sloq'ues step, ya ya'be te yane, scuenta yu'un ya xchicnaj te chahpaj te c'ope; ha testigo ya xc'oht ta Israel.

⁸ Ha yu'un te winic te ma yanuc parte yu'un hich la yalbe te Booz: Mambeya ha'at, xchi. Hich la sloq'ues te step.

⁹ Te Booz la yalbe te mamaletic soc spisil te mach'atic tey ayic a: Ha'ex testigohex yo'tic te la jmambe te Noemí spisil te bintic ay yu'un Elimelec soc spisil te bintic ay yu'un te Quelión soc Mahlón.

¹⁰ Soc ha nix hich ya quic' quihnamin te Rut te moab-ants, te yihnam Mahlón, scuenta yu'un ya jcha'hachbe sbihil ta sq'uinal te chawinic, yu'un ma ba ya xch'ay sbihil ta yohlil te yermanotac o ta pueblo yu'une. Ha'ex testigohex yo'tic, xchi.

¹¹ Spisil te mach'atic ayic ta yochibal te pueblo soc te mamaletic hich la sjaq'uic: Ho'otcotic testigohotcotic yu'un. Te ants te ya x'och ta ana, hichuc ac'a c'ohtuc yu'un Jehová te bin ut'il Raquel soc Lea te la shachbeyic sna te Israel. Soc te ha'ate muc'uc me ac'oblal ta Efrata, soc na'biluc aba ta Belén.

¹² Ta scuenta te ats'umbal ya ya'bat Jehová ta scuenta te ants ini, hich ac'a c'ohtuc ana te bin ut'il te sna Fares te yal-snich'an Tamar soc Judá, xchihic.

¹³ Hich te Booz la yic' te Rut, ha yihnam c'oht; la sjoquin ta wayel. Te Jehová la yac' te ya xhahch yal, hich ayin tut querem yu'un.

¹⁴ Te antsetic hich la yalbeyic te Noemí: Bayel me yutsil te Jehová te la yac' te ay mach'a ma yanuc parte awu'un te ya scoltayat; muc' me sc'oblal sbihil ac'a c'ohtuc ta Israel te alale.

¹⁵ Ha ya smuc'ubtesbat awo'tan soc ya scoltayat te c'alal me'elatix a; como ha alatayotix yu'un te awalib te c'uxat ta yo'tan, te c'ax hich yutsilal ta atojol a te bin ut'il huqueb aquerem-al, xchihic.

¹⁶ Te Noemí la yic' te tut querem, la spet soc la scoltes.

¹⁷ Te antsetic te ha spat-xuhc hich la yalic: ¡Ayinix squerem-al te Noemí! xchihic. La ya'beyic sbihil Obed. Ha stat te Isaí, te ha stat te David.

Sts'umbal tal David

¹⁸ Hich ay te cajalcaj sts'umbal Fares: Te snich'an Fares, ha Hezrón;

¹⁹ te snich'an Hezrón, ha Ram; te snich'an Ram, ha Aminadab;

²⁰ te snich'an Aminadab, ha Naasón; te snich'an Naasón, ha Salmón;

²¹ te snich'an Salmón, ha Booz; te snich'an Booz, ha Obed;

²² te snich'an Obed, ha Isaí; te snich'an Isaí, ha David.