Proverbios 9 - Bible in Tzeltal Bachajón

Te p'ijil-o'tanil soc te sonsohil

¹ Te p'ijil-o'tanil la spas sna, la spasbe huqueb yoyal.

² La smil chambahlametic yu'un, la schahpan te vino soc la schahpan te mesa yu'une.

³ La sticon bahel te criadahetic yu'un te ya x'awonic c'alal ta stoyolil te pueblo:

⁴ La'ic li'i, ha'ex te ma xana'ic q'uinal, xchi. Hich ya yalbe te mach'atic ma sna'ic stsahtayel sbahic:

⁵ La'ic, we'anic te pan cu'un soc uch'anic te vino chapal cu'une.

⁶ Ihquitaya asonsohilic, hich me ya xcuxajex a; behenanic ta sbehlal te bintic ay ta na'el, xchi.

⁷ Te mach'a ya stojobtes te jlabanwanej, ya sta labanel; te mach'a ya stsits te mach'a chopol, ya sta il-o'tantayel.

⁸ Ma xatsits te jlabanwanej, ya me sp'ajat yu'un; teme yac atojobtes te mach'a p'ij yo'tan, c'ux me ya ya'iyat ta yo'tan yu'un.

⁹ A'beya snop te mach'a p'ij yo'tan, ya me xp'ijub xan yu'un; nohptesa te mach'a toj yo'tan, hich bayel xan bin ya sna' a.

¹⁰ Te shahchibal te p'ijil-o'tanil ha te xi'el te Jehová, soc ha snopojibal awu'un teme yac ana'be sba te Ch'ul Diose.

¹¹ Como ho'on ta jcuenta te ya xnahtij aworahil, bayel xan ha'bil ya xcuxajat a.

¹² Teme ay sp'ijil awo'tan, ay me bin yac ata a; teme jlabanwanejat, ya me awil awocol atuquel.

¹³ Te sonso ants ya shach c'op; mayuc bin ya sna' soc ma xq'uexaw.

¹⁴ Ya shuhcan sba ta huctajibal ta sti'il sna, ta banti stoyolil te pueblo,

¹⁵ yu'un ya yawtay te mach'atic yacalic ta c'axel bahel, te mach'atic toj ya xbehenic bahel:

¹⁶ Hich ya yalbe te mach'atic ma sna'ic stsahtayel sbahic: La'ic li'i, ha'ex te ma xana'ic q'uinal, xchi.

¹⁷ Mero chi' te elc'ambil ha': mero buhts'an te bin ya yich' we'el ta muquen, xchi.

¹⁸ Pero ma ba ya sna'ic te tey ayic a te mach'atic chamenic, te mach'atic sjoquinejic, ayic ta sc'ubulil yawil te mach'atic chamenique.