Proverbios 6 - Bible in Tzeltal Bachajón

Tsitsel ta scuenta ch'ajilal soc lo'loyel

¹ Jnich'an, teme ay yac atehc'an aba ta majan ta scuenta apat-axuhc, teme ay awaloj ac'op ta stojol yan,

² achucoj aba a te ac'op la awale, chucbilat yu'un te bintic la awal ta awe.

³ Hich xapas ini, jnich'an, yu'un ya xcolat ta libre, te bin ut'il ipajatix ta sc'ab apat-axuhc: Bahan, pehc'ana aba, pastaytesbeya yo'tan te apat-axuhque.

⁴ Ma me xwayat, ma me xamuts' asit;

⁵ ahnan loq'uel, hich te bin ut'il gacela-chij ta stojol jnutsojel, hich te bin ut'il mut ya xcol loq'uel ta sc'ab jyaquiwej.

⁶ Bahan, ila awil te ts'isim, ha'at te ch'ajate, ila awil bin yac spasbelic, ayuc me sp'ijil awo'tan.

⁷ Mayuc mach'a ya xpasotic ta mandar yu'unic, mayuc jcuentahinwanej o ajwalil yu'unic,

⁸ pero ya schahpan swe'el ta yorahil sq'uepelal q'uinal soc ya stsob swe'elic ta yorahil stsobel sit.

⁹ Ha'at te ch'ajat, ¿jayeb xan ora ya xwayat? ¿Bin ora ya xhahchat ta wayel?

¹⁰ Jts'ihn nax wayel, jts'ihn nax cux-o'tan, ts'ihn nax yac apet ac'ab yu'un cux-o'tan,

¹¹ hich ya xtal apobrehil te bin ut'il jbehyom, hich ya xtal te aprobrehil te bin ut'il j'elec' te ay ya'tejib yu'un jmilaw.

¹² Te mach'a chopol yo'tan, te j'ixta'-o'tan, bayuc nax ya xbehen ta yalel bohlc'op;

¹³ ya xmuts'sitaywan, ya spas seña ta yoc, ya spasbe seña ta yalatac sc'ab;

¹⁴ chopol bintic ay ta yo'tan, ya snopilan bin chopol, ya shach c'op.

¹⁵ Ha yu'un ay ora nax ya xtal swocol; ora nax ya yich' jinel, ma xhu' ta coltayel.

¹⁶ Ay waqueb te bin ya sp'aj te Jehová, huqueb te bin ya yihlay:

¹⁷ ha te toyba ta sit, ya'iyel lot, te c'abaletic te ya smilic mach'a mayuc smul,

¹⁸ te o'tanil te ya schahpan bintic chopol, te ocal te ya x'ahnimaj ta spasel te bin chopol,

¹⁹ te lotil testigo te ma meleluc bin ya yal, soc te mach'a ya shach c'op ta stojol yermanotac.

Tsitsel ta scuenta antsiwej

²⁰ Jnich'an, ch'uhuna spasel te mandariletic yu'un atat soc ma me xawihquitay te nohpteseletic yu'un te anane.

²¹ Chuca ta awo'tan spisil ora, xoja ta anuc'.

²² Ya stojobtesat te c'alal ya xbehenat, ya scanantayat te c'alal wayalat, ya sc'oponat te c'alal ya xhahchat ta wayel.

²³ Como ha tsumbil c'ahc' te mandariletic, ha sacal q'uinal te jnohptesel, soc ha sbehlal cuxlejal te tojobteseletic,

²⁴ ya scanantayat ta stojol te chopol ants, ta stojol te st'ujbil c'op te j'antsinel-ants.

²⁵ Ma me xbic'taj awo'tan yu'un te st'ujbilal, ma me xawac' yu'untayat te site,

²⁶ como te j'antsinel-ants ya sc'ambe jxeht' pan te winique, yan te nuhpunem ants te ya sc'an yajmul, ya snutsbe scuxlejal te winique.

²⁷ Te winic ¿ya bal xhu' ya yac' c'ahc' ta stahn te ma ba ya xc'ahc' sc'u' yu'un?

²⁸ ¿Ya bal xhu' ya xbehen ta ba ac'al te ma ba ya xchic'bot yoc yu'une?

²⁹ Hich ay te mach'a ya yantsibe yihnam te spat-xuhc; te mach'a ya ya'iy antsiwej ya me yich' castigo.

³⁰ Ma ba ya yich' ihlayel te j'elec' te ya x'elc'aj ta scaj swi'nal.

³¹ Pero teme ya xtahote, ya me suhtes huqueb buelta te bin la yelc'ane, ya me yac' spisil te bintic ay yu'un ta sna.

³² Soc te mach'a ya ya'iy antsiwej, mayuc snopojibal yu'un; te mach'a hich ya spas ha nix ya sjin sba.

³³ Ya me sta ehchen soc q'uexlal, mayuc bin ora ya xtup' te sq'uexlale.

³⁴ Como te xut'et-o'tanil ya shachbe yilimba te winique, mayuc perdón ta yo'tan te c'alal ya suhtbe spacol;

³⁵ mayuc bin ya yich' yu'un ya xlecub yo'tan yu'un, ma ba ya spasbe perdón aunque ya xp'ohl te smahtane.