Proverbios 31 - Bible in Tzeltal Bachajón

C'opetic yu'un Lemuel

¹ Te c'opetic yu'un te ajwalil Lemuel, te sc'op-jalwanej te nohptesot yu'un te snane:

² Cal, te chicnajemat ta jch'uht, te ha'at suhtibat jc'op te la jcal ta jamal ta stojol Dios,

³ ma me xalajin awip ta scuenta antsetic, ta scuenta te mach'atic ya sjinic ajwaliletic.

⁴ Ma ha'uc yu'un ajwaliletic, Lemuel, ma ha'uc yu'un ajwaliletic te ya yuch'ic vino, ma ha'uc yu'un príncipaletic te ya sc'anic bin pajubtesbil;

⁵ yu'un ya xch'ay ta yo'tanic te ley teme yuch'ojique, hich ma stojiluc ya schahpanic te mach'atic ayic ta uts'inel.

⁶ A'beya yuch' bin pajubtesbil te mach'a chamelix, a'beya vino te mach'a pich'il yo'tan;

⁷ ac'a yuch'ic scuenta yu'un ya xch'ay ta yo'tanic a te spobrehilic, yu'un ma sna'ic te swocolique.

⁸ C'opojan yu'un te mach'atic ma xhu' yu'unic ya xc'opojic, yu'un te mach'atic ma xhu' scoltaybel sbahique.

⁹ C'opojan, chahpana ta stojil; coltaya te pobre soc te mach'a mayuc bin ay yu'un.

Yalbeyel yutsil sc'oblal lequil ants

¹⁰ ¿Mach'a ya xhu' ya sta ta lehel lequil ants? C'ax hich sc'oblal a te bin ut'il t'ujbil tonetic.

¹¹ Te smamalal ay smuc'ul yo'tan ta stojol, soc mayuc bin ma sta ta lehel.

¹² Te ants ya ya'be te bin lec, ma ha'uc te bin ma lecuc, ta spisil scuxlejal.

¹³ Ya sle stsotsel tuminchij soc lino, soc tse'el yo'tan ya spas ya'tel ta sc'ab.

¹⁴ Hich ay te bin ut'il barco yu'un jmambajel, ya yich' tal ta namal te we'elil yu'une.

¹⁵ Ihc' to a ya xhahch, ya yac'ticlambe swe'elic te mach'atic ay yu'un soc ya ya'be swe'el te criadahetic yu'une.

¹⁶ Ya stsahtaybe stojol te q'uinal, soc ya sman; ta scuenta stojol ya'tel ya sts'un sts'usubil.

¹⁷ Ya schuc sch'uht ta lec, ay yip a ya xbaht ta a'tel.

¹⁸ Ya yil teme lec ta bahel te chombajel yu'une; ma xtup' stsumbil c'ahc' yu'un ta ahc'abal.

¹⁹ Ha nix ta sc'ab ya ya'iy nahujel, soc ha nix ta sc'ab ya ya'iy jalab.

²⁰ Ya sjam sc'ab ta stojol te pobre, ya shach sc'ab ta stojol te mach'atic mayuc bin ay yu'unic.

²¹ Ma smel yo'tan yu'un te mach'atic ay yu'un te c'alal ya xtal me'sic, como spisilic ay lec sc'u'ic.

²² Ya spas sehnil swayib, ha sc'u'inej lino fino soc chi'in-yaxal pac'.

²³ Te smamalal na'bil sba ta yochibal te pueblo, c'alal ya shuhcan sba soc te mamaletic yu'un te q'uinale.

²⁴ Ya spasticlan paq'uetic soc ya schonticlan, soc ya schombe schuhquil sch'uhtic te jchombajeletique.

²⁵ Sc'u'inej yip soc ich'el ta cuenta; soc ya stse'ejin yu'un te bin talel yac.

²⁶ Ay sp'ijil yo'tan ya xc'opoj, soc yutsil yo'tan ya xnohpteswan.

²⁷ Ya yil teme lec chapal te mach'atic ay yu'un ta sna, ma ba ya swe' te pan yu'un ch'ajilal.

²⁸ Te yalatac ya xhahch yalbeyic yutsil sc'oblal; ha nix hich te smamalal ya yalbe yutsil sc'oblal:

²⁹ Ay bayel antsetic te lec bin ya spasic, pero c'ax hichat a te ha'ate, xchi.

³⁰ Ya xlo'loywan te bin mulantic sba yilel, soc c'axel nax te st'ujbilal, pero te ants te ya xi' te Jehová, ha me lec sc'oblal stuquel.

³¹ ¡A'beya stojol te sc'ab, soc ac'a yich' halbeyel yutsil sc'oblal ya'tel ta yochibal te pueblo!