Proverbios 2 - Bible in Tzeltal Bachajón

Bin lec ta tahel ta p'ijil-o'tanil

¹ Jnich'an, teme yac awich' ta cuenta te c'opetic cu'un soc teme yac aq'uej ta awo'tan te mandariletic cu'un,

² teme yac awa'iy te p'ijil-o'tanil soc teme yac awac' awo'tan ta sna'beyel scuentahil,

³ teme yac awawtay te bin ay ta na'el soc tulan ya xc'opojat yu'un te yac ana'be scuentahil;

⁴ teme yac ale hich te bin ut'il plata soc teme yac ale ta lec hich te bin ut'il c'ulejalil,

⁵ hich me yac ana' a te xi'el te Jehová soc hich me yac ana'be sba a te Diose.

⁶ Como Jehová ya yac' te p'ijil-o'tanil, soc ya xloc' tal ta ye te p'ijil-o'tanil soc te bin ay ta na'el.

⁷ Ha ya sq'uejbe lequil p'ijil-o'tanil te mach'atic toj yo'tanic; ha smahquil te mach'atic toj ya xbehenic.

⁸ Ha ya scanantay te behetic yu'un te mach'atic toj bin ya spasic, soc ya scanantay te be yu'un te mach'atic yu'un te ch'ultesbilique.

⁹ Hich me yac ana' te bin toj, te stojil chahpanel, soc te spisil pajal ya x'ich'ot ta cuenta, soc spisil lequil behetic.

¹⁰ Como ya x'och ta awo'tan te p'ijil-o'tanil, soc lec ya ya'iy ach'uhlel te bin ay ta na'el.

¹¹ Ya me scanantayat te tsahtayel, soc ya me scanantayat te bin ay ta na'el;

¹² yu'un ya yac'at ta libre yu'un te chopol be, ta stojol winiquetic te chopol sc'opic,

¹³ ha te mach'atic ya yihquitayic te stojil behetic, yu'un ya xbehenic ta behetic ta yihc'al q'uinal,

¹⁴ te mach'atic tse'el yo'tanic yu'un spasel bin chopol soc bayel ya smulanic te bin chopol ay ta pasel,

¹⁵ te ha chuhcul te behetic yu'unic, ma tojuc te sbehique.

¹⁶ Ya me scoltayat ta sc'ab te j'antsinel-ants, te ants te ya xmonawan ta sc'op,

¹⁷ te ya sch'ay hilel te smohlol c'alal ach'ix to a, soc ya sch'ay ta yo'tan te bin c'opil la schap soc te Dios yu'une.

¹⁸ Te sna te ants yac ta cohel bahel ta lajel, te behetic yu'un ya xbahtic ta banti ay mach'atic chamenic.

¹⁹ Te mach'atic ya xbahtic banti ay, ma ba ya suhtiquix tal, ma ba ya st'uniquix te behetic yu'un cuxlejal.

²⁰ Hich me ya xbehenat ta be yu'un te mach'atic lec yo'tanic soc yac at'un bahel te behetic yu'un te mach'atic toj yo'tanique.

²¹ Como te mach'atic toj yo'tanic ya me xnahinic ta q'uinal, ya me xhalajic tey a te mach'atic jun yo'tanic.

²² Yan te mach'atic chopolic ya me yich'ic loq'uesel ta q'uinal, soc ya me yich'ic bulel loq'uel te jchebal-o'tanetique.