Proverbios 11 - Bible in Tzeltal Bachajón

¹ Te Jehová ya yihlay te bin ma ts'acaluc ta p'isel, pero lec yo'tan yu'un teme ts'acale.

² Te c'alal ya xtal te toybahil, ha nix hich ya xtal te ma ba ya x'ich'ot ta muc', pero te mach'atic peq'uel ayic yich'ojic p'ijil-o'tanil.

³ Te mach'atic toj yo'tanic ya xtojobtesotic yu'un te lec stalelic, pero ya xlajinotic yu'un schopolil te mach'atic chopolic.

⁴ Ma xtuhun te c'ulejalil ta yorahil ilimba, pero te bin stojil ta pasel ya x'ac'awan ta libre yu'un te lajele.

⁵ Te bin stojil ya spas te mach'a toj yo'tan, ya xtojobtesot ta be yu'un, yan te mach'a chopol yo'tan, ha ya xyahltesot yu'un te bin chopol ya spase.

⁶ Te bin stojil ya spas te mach'atic toj yo'tanic, ya x'ac'otic ta libre yu'un, pero te bic'tal-o'tanil ya schuc te mach'atic ma junuc yo'tanic.

⁷ C'alal ya xcham te mach'a chopol yo'tan, ya xch'ay te bin yac ta smahliyel, soc ya xlaj te bin bayel sc'oblal ta yo'tan.

⁸ Te mach'a toj yo'tan ya xcol ta libre yu'un wocol, ha ya xc'oht ta scuenta te mach'a chopol yo'tane.

⁹ Te jchebal-o'tan ya yuts'in te spat-xuhc ta scuenta sc'op, pero te mach'atic toj yo'tanic ya x'ac'otic ta libre ta scuenta te p'ijil-o'tanil.

¹⁰ Te c'alal ay bin ay yu'un te mach'atic toj yo'tanic, tse'el yo'tan yu'un te pueblo; pero te c'alal ya xlaj te mach'atic chopol yo'tanic, ya spasic q'uin yu'un.

¹¹ Ya xtohybot sc'oblal te pueblo ta scuenta te bendición yu'un te mach'atic toj yo'tanic, pero ya sjin ta scuenta sc'op te mach'atic chopol yo'tanique.

¹² Te mach'a ma sna' q'uinal ya sp'aj te spat-xuhc, yan te mach'a p'ij yo'tan mayuc bin ya yal.

¹³ Te mach'a ya xlehawan ta c'op ya schicnajtes te bin muquen ay, yan te mach'a jun yo'tan ma ba ya schicnajtes te bin muquen ay.

¹⁴ Te banti mayuc tojobtesel ya xjihn te nación, pero ta scuenta tsobol j'ac'-o'taniletic ay me tsalaw.

¹⁵ Ya me sta swocol te mach'a ya stehc'an sba ta majan yu'un te mach'a ma sna'be sba, yan te mach'a ma sc'an ya stehc'an sba ta majan, jun me yo'tan ay stuquel.

¹⁶ Te ants te ay yutsil yo'tan ya sta ich'el ta muc', te winiquetic te ay yipic ya stahic c'ulejalil.

¹⁷ Te mach'a ya xc'uxultaywan, lec bin ya spasbe sba, yan te j'uts'inwanej ha nix ya yuts'in sba.

¹⁸ Te mach'a chopol yo'tan, ya sta stojol ya'tel te ma stojiluc, yan te mach'a ya sts'un bin stojil ta pasel, ya me yich' smahtan.

¹⁹ Te mach'a ya st'un te bin toj ta pasel, ya me sta scuxlejal, yan te mach'a ya st'un te bin chopol, ya sta lajel yu'un.

²⁰ Te Jehová ya yihlay te mach'atic chopol yo'tanic, pero lec yo'tan yu'un te mach'atic toj bin ya spasic.

²¹ Te mach'atic chopol yo'tanic, ya me yich'ic castigo ta mero melel, yan te mach'atic toj yo'tanic, libre ya xc'ohtic.

²² Hich te bin ut'il ch'ocowil pasbil ta oro ta sni' chitam, hich ay te t'ujbil ants te ma sna' q'uinal.

²³ Te bin ya sc'an te mach'atic toj yo'tanic lec me ya xc'oht ta loq'uel, pero te bin ya smahliy te mach'atic chopol yo'tanic, ha ya xc'oht ta loq'uel ta ilimba.

²⁴ Ay mach'a ay bin ya spucticlan, ay xan yan bin ya sta; ay mach'a te ay st'ut'il, ha ya x'och ta pobrehil.

²⁵ Te mach'a ma p'isbiluc nax ya yac', ya xp'ohl bintic ay yu'un; te mach'a ya ya'be te yane, ha nix ya x'a'bot.

²⁶ Te mach'a bayel ya sq'uej trigo, ya xbohlc'optayot yu'un te ants-winiquetic, pero ya xc'oht bendición ta stojol te mach'a ya schone.

²⁷ Te mach'a ya sle bin lec, ya sta lec sc'oblal, yan te mach'a ya sle bin chopol, ha nix ya xtahot yu'un.

²⁸ Te mach'a ha smuc'ulinej yo'tan te sc'ulejal ya me xch'ay, yan te mach'a toj yo'tan, hich ya xyaxub te bin ut'il sc'ab te'.

²⁹ Te mach'a ya yuts'in sna, ya snahin ic', soc te mach'a ma sna' q'uinal, ha a'bat ya xc'oht yu'un te mach'a p'ij yo'tan.

³⁰ Te sit ya yac' mach'a toj yo'tan ha te' yu'un cuxlejal, ha p'ij te mach'a ya x'ic'awan ta lequil be.

³¹ Teme ya x'a'bot stojol ta bahlumilal te mach'a toj yo'tan, ¡c'ax hich a te mach'a chopol yo'tan soc te jmulawile!