Oseas 2 - Bible in Tzeltal Bachajón

Te sc'uxul yo'tan Jehová ta stojol te pueblo yu'un te ma junuc yo'tan

¹ Halbeyahic te awermanotac winiquetic: Pueblo cu'un, xchihex, soc halbeyic te awermanatac antsetic: Na'bil yo'bolil sba, xchihex.

² ¡Halbeyahic smul ananic, halbeyahic smul, como ma quihnamuc, soc ma smamalalucon! Ac'a yihquitay hilel ta stojol te antsinel yu'un, te yajmul ta banti stahn.

³ Teme ma'uque, ya jwahtan, hich watal ya xhil cu'un te bin ut'il te c'alal ayine; hich ya cac' te bin ut'il jochol taquin q'uinal, ya jc'atp'un ta taquin q'uinal, soc ya jmil ta taquinti'il.

⁴ Ma ba ya jna'be yo'bolil sba te yalatac, como ha alaletic yu'un antsinel.

⁵ Como la yac' sba ta antsinel te snanic, q'uexlaltic sba te mach'a la yalatay. Como hich la yal: ya jt'un bahel te mach'atic ya smulanon, te ya ya'bonic jwe'el soc ha', stsotsel tuminchij soc lino, aceite soc te bin ya cuch', xchi.

⁶ Ha yu'un ya joybe ta ch'ix te be yu'une, ya ca'be ts'ahc ta sjoyobal scuenta yu'un ma ba ya sta te behetic yu'une.

⁷ Ya st'un te mach'atic ya xmulanot yu'un, pero ma ba ya sta; ya sle, pero ma ba ya sta ta lehel. Hich me ya yal: Ya suhton bahel ta stojol te jmamalal ta nahilal, como ha lec xan ayon a te bin ut'il ta ora ini, xchi.

⁸ Ma ba la sna' te ho'on la jca'be te trigo, vino soc te aceite; te la jp'ohltes te plata soc te oro te la smahtantesic a te Baal.

⁹ Ha yu'un ya jcha'ich' te trigo ta yorahil soc te vino cu'un te c'alal ya yich' pasel; ya jloq'uesbe te stsotsel tuminchij soc te lino cu'un te la jca'be yu'un ya smuc sba a.

¹⁰ Yo'tic ya cac' chicnajuc te sq'uexlal ta stojol te mach'atic mulanot yu'une, mayuc mach'a ya xcoltayot loq'uel ta jc'ab yu'un.

¹¹ Ya jch'aybe spisil te stse'elil yo'tan, te q'uinetic yu'un, te yach'il u, c'ahc'aletic yu'un cux-o'tanil, soc spisil te muc'ul q'uinetic ya spas.

¹² Ya jlajimbe te ts'usubiletic soc te higuerahetic yu'un, te hich la yalbe sc'oblal: Ha jtojol te la ya'bonic te mach'atic ya smulanon, te xchihe. Ya jc'atp'un ta spimil q'uinal, ya xwe'otic yu'un te ha'mal chambahlametique.

¹³ Ya ca'be castigo yu'un te jayeb c'ahc'al te la schic'be pom te baaletic, te c'alal la sch'ahl sba ta ch'ocowiletic soc uhaletic soc la st'un bahel te mach'atic mulanot yu'un, te la sch'ayon ta yo'tan, xchi te Jehová.

¹⁴ Ha scuentahil te ya jmon talel; ya quic' bahel ta jochol taquin q'uinal soc ya cutsil-c'opon.

¹⁵ Tey ya jsutbe a te ts'usubiletic yu'un, soc ya cac' te ha yochibal smuc'ul-o'tanil ya xc'oht te spamlej Acor. Tey ya xc'ayojin a hich te bin ut'il c'alal ach'ix to a, hich te bin ut'il te bin c'ahc'alil loc' tal ta Egipto.

¹⁶ Ta hich ora, xchi te Jehová, ya ya'bon jbihilin Ishi, ma ba ya ya'bonix jbihilin Baali.

¹⁷ Como ya jloq'uesbe ta ye te sbihilic te baaletic, mayuquix bin ora ya yalbe te sbihilique.

¹⁸ Ta hich ora ya jchap c'op ta scuenta soc te ha'mal chambahlametic, te mutetic ya xwihlic ta toyol, soc te chanetic ta q'uinal. Ya jloq'ues ta q'uinal te t'ihmalte', te espada soc te guerra, soc ya cac' te jun awo'tan ya xwayat.

¹⁹ Ya quihnaminat sbahtel q'uinal, ya quic'at ta scuenta bin stojil ta pasel, stojil chahpanel, cux-o'tanil soc sna'beyel yo'bolil aba.

²⁰ Ya quihnaminat ta scuenta jun co'tan ta atojol, ya me ana'be sba te Jehová.

²¹ Ta hich ora ya jac'be sc'opic, xchi te Jehová; ya jac'be sc'op te ch'ulchan, te ch'ulchan ya sjac'be sc'op te lumq'uinal,

²² te lumq'uinal ya sjac'be sc'op te trigo, vino soc aceite, ha'ic ya sjac'beyic sc'op te Jezreel.

²³ Ya jts'un ta q'uinal yu'un cu'un ya xc'oht; ya jna'be yo'bolil sba te Lo-ruhama, hich ya calbe te Lo-ami: Ha'at pueblohat cu'un, xchihon, soc hich ya yalbon: Ha'at Diosat cu'un, xchi.