Números 6 - Bible in Tzeltal Bachajón

Mandaril yu'un nazareo

¹ Te Jehová la yalbe te Moisés:

² Halbeya te snich'nab Israel: Te winic o ants te ya schap sc'op te ya yac' sba ta nazareo, yu'un parte ya yac' sba ta stojol te Jehová,

³ ma ba ya yuch' vino soc te bin pajuben. Ma ba ya yuch' vinagre pasbil ta vino o te bin pajubtesbil, ma ba ya yuch' te ya'lel ts'usub soc ma ba ya slo'be sit ts'usub o te taquijtesbil.

⁴ Te jayeb tiempo ay ta scuenta nazareo, ma xhu' ya swe' biluc a te pasbil ta ts'usub, ni ha'uc sbac' o spat.

⁵ Te jayeb c'ahc'al schapoj te ay ta scuenta nazareo ma ba ya yich' loq'uesbeyel stsotsel sjol. Ch'ultesbil ya xc'oht soc ya yac' nahtubuc te sjol ha to c'alal ya sts'acay te jayeb tiempo schapoj te parte ya yac' sba ta stojol Jehová.

⁶ Te jayeb c'ahc'al te parte yac'oj sba ta stojol Jehová ma ba ya xnohpoj ta stojol mach'a chamen.

⁷ Aunque stat, snan, sbanquil, swix o yihts'in, ma ba ya sbohlobtes sba yu'un te c'alal ya xchamic, como ay ta sjol te ch'ultesel ta stojol te Dios yu'une.

⁸ Te jayeb c'ahc'al te parte la yac' sba, ha ch'ultesbil ta stojol Jehová.

⁹ Teme ay mach'a ora nax ya xcham ta sts'ehl, te hich ya xbohlobtesbot sc'oblal sjol te ch'ultesbile, huqueb c'ahc'al ta patil ya me squits' te stsotsel sjol, ha te bin c'ahc'alil ya yich' lecubtesel.

¹⁰ Ta swaxaquebal c'ahc'al ya me yic' tal cha'coht xpuliwoc o cha'coht colel stsuhmut ta stojol te sacerdote ta yochibal te Nahilpac' Templo yu'un tahojibal.

¹¹ Te sacerdote jcoht ya yac' scuenta mahtanil yu'un mulil, jcoht ya yac' scuenta scohtol chic'bil mahtanil scuenta stojel smul te la sta ta scuenta te mach'a chamene. Ha nix yorahil a te ya scha'ch'ultes xan te sjole:

¹² parte ya yac' sba ta stojol Jehová te jayeb tiempo schapoj te ha nazareo, soc ya yic' tal jcoht tat tuminchij te jun ya'bilal scuenta mahtanil yu'un stahel falta. Te jayebix tiempo te c'axix tale mayuc ta ich'el ta cuenta, como bohlob sc'oblal c'oht te tiempo te parte yac'oj sbahe.

¹³ Ha te mandaril yu'un nazareo ini te c'alal ts'acayix stiempohil te parte yac'oj sbahe: ya me xtal ta yochibal te Nahilpac' Templo yu'un tahojibal,

¹⁴ ya ya'be smahtanin te Jehová jcoht tat tuminchij te jun ya'bilal te mayuc bin jihnem yu'un scuenta scohtol chic'bil mahtanil, jcoht jcolel yantsilel tuminchij te jun ya'bilal te mayuc bin jihnem yu'un scuenta mahtanil yu'un stojel mulil, soc jcoht tat tuminchij te mayuc bin jihnem yu'un scuenta mahtanil yu'un lamal q'uinal.

¹⁵ Soc jun moch pan ma ba yich'oj levadura pasbil ta harina wots'bil ta aceite, jayal pan te ma ba yich'oj levadura te jaxbil ta aceite, mahtanil harina soc malbil mahtaniletic yu'un.

¹⁶ Te sacerdote ya me yac' ta stojol Jehová, ya yac' te mahtanil yu'un stojel smul soc te scohtol chic'bil mahtanil yu'une.

¹⁷ Patil te sacerdote ya yac' te tat tuminchij scuenta milbil mahtanil yu'un lamal q'uinal ta stojol Jehová, soc te jun moch pan ma ba yich'oj levadura; soc te sacerdote ya me yac' te mahtanil harina soc te malbil mahtanil yu'une.

¹⁸ Te nazareo ya me squits' te ch'ultesbil stsotsel sjol ta yochibal te Nahilpac' Templo yu'un tahojibal, ya stsob soc ya yotses ta c'ahc' te ay ta ye'tal te mahtanil yu'un lamal q'uinal.

¹⁹ Patil te sacerdote ya stsac te spech baquel sc'ab te tat tuminchij te ta'ajemix, te jpehch pan te ma ba yich'oj levadura te ay ta moch soc te jayal pan te ma ba yich'oj levadura, ya ya'be ta sc'ab te nazareo c'alal quits'bilix yu'un a te stsotsel sjol te ch'ultesbile.

²⁰ Te sacerdote ya stuchilambe ta stojol Jehová scuenta tuchilambil mahtanil; ha ch'ultesbil soc ha yu'un te sacerdote, soc nix te stahn te la yich' tuchilanel soc te spech baquel sc'ab te parte la yich' aq'uele. Ta patil te nazareo ya xhu' ya yuch'ix vino.

²¹ Ha mandaril yu'un te nazareo te schapoj sc'op te ya ya'be smahtan te Jehová scuenta nazareo, soc bintic xan te ya xhu' yu'un ya yac'. Ya me spas te bin schapoj, hich te bin ut'il ya yal te mandaril yu'un te nazareo, xchi.

Bendición ya yac' sacerdote

²² Te Jehová la yalbe te Moisés:

²³ Halbeya te Aarón soc snich'nab: Hich yac awa'beyic bendición te snich'nab Israel; hich yac awalic:

²⁴ Te Jehová ac'a ya'bat bendición soc ac'a scanantayat.

²⁵ Te Jehová ac'a tihluc yutsil sts'anabul sit yelaw ta atojol, soc ac'a sna'bat yo'bolil aba.

²⁶ Te Jehová ac'a yac' tal sit yelaw ta atojol, soc ac'a ya'bat lamal q'uinal ta atojol, xchihex.

²⁷ Hich ya yalbonic jbihil ta stojol te snich'nab Israel, hich ya ca'be bendición, xchi.