Números 5 - Bible in Tzeltal Bachajón

Ya yich' loq'uesel mach'atic bohloben sc'oblalic

¹ Te Jehová la yalbe te Moisés:

² Pasa ta mandar te snich'nab Israel te ya me sloq'uesic ta campamento spisil mach'atic ay sc'a'el-chamelic, spisil mach'atic ay bin ya xmal loq'uel yu'un, soc spisil mach'atic bohloben sc'oblalic yu'un spicojic te bin chamen.

³ Ya me aloq'uesic ta fuera teme winic o ants, ya me aloq'uesic ta fuera ta campamento scuenta yu'un hich ma ba ya xbohlob sc'oblal a te campamento te banti ya xnahinon ta yohlilic, xchi.

⁴ Hich la spasic te snich'nab Israel: la sloq'uesic ta fuera yu'un te campamento. Hich la spasic te bin ut'il halbot yu'un Jehová te Moisés.

Mandaril yu'un sutbeyel sjelol

⁵ Te Jehová la yalbe te Moisés:

⁶ Halbeya te snich'nab Israel: Te winic o ants te ay bin chopol ya spasbe yan, te hich ma junuc yo'tan ta stojol Jehová, ay smul ya xc'oht.

⁷ Ya me yal ta jamal te smul spasoj, ts'acal me ya ya'be sjelol te bin la sjin soc ya ya'be jun xan ta yo'ebal te mach'a la sta smul ta stojole.

⁸ Teme mayuc mach'a ay yu'un te ya yich'be te sjelol, ha ya yich' a'beyel Jehová te sjelol, ha ya yich' te sacerdote, soc ya yac' te tat tuminchij te ya yich' aq'uel scuenta stojel mulil, te ha ya yich' tojbeyel smul a.

⁹ Spisil mahtanil yu'un te bintic ch'uhltesbilic te ya yaq'uic te snich'nab Israel ta stojol sacerdote, ha yu'un ya xc'oht.

¹⁰ Spisil mach'a ay bin ch'ultesbil yu'un, ha yu'un stuquel; yan te bin ya ya'be te sacerdote, ha yu'un te sacerdote ya xc'oht, xchi.

Mandaril yu'un ich'mul

¹¹ Te Jehová la yalbe te Moisés:

¹² Halbeya te snich'nab Israel: Teme ay ants te ya xhowiy, te ma junuc yo'tan ta stojol smamalal,

¹³ te ay winic ya xway soc, teme ma ba sna'oj te smamalal, yu'un muquen la sbohlobtesbe sba sc'oblal, soc mayuc testigo yu'un te hich la spas soc ma ba yac ta spasel a te tahote;

¹⁴ teme ya xhahch ta ich'mul te winic, teme ya xhahch yich'multay te yihnam te la sbohlobtesbe sba sc'oblal; o teme ya xhahch ta ich'mul te winic, teme ya xhahch yich'multay te yihnam aunque ma ba la sbohlobtesbe sba sc'oblale,

¹⁵ te winic ya me yic' bahel te yihnam ta stojol sacerdote soc te mahtanil yu'un, ha jun ta slajunebal efa harina yu'un cebada. Ma ba ya smalbe aceite soc ma ba ya ya'be pom ta sba, como ha mahtanil yu'un ich'mul, ha mahtanil scuenta sna'el mulil.

¹⁶ Te sacerdote ya me yac' xnohpoj tal te ants, ya stehc'an ta stojol Jehová.

¹⁷ Te sacerdote ya slup jtebuc ch'ultesbil ha' ta pac'bil oxom soc ya sjohp ts'u'lum ay ta Nahilpac' Templo, ya yotses ta ha'.

¹⁸ Ya ya'be stehc'an sba ta stojol Jehová te antse, ya stil cohel stsotsel sjol te ants soc ya ya'be stsac ta sc'ab te mahtanil scuenta sna'el mulil, ha te mahtanil yu'un ich'mul. Te sacerdote ya spach ta sc'ab te ch'ahal ha' te ya xbohlobteswan.

¹⁹ Hich ya yalbe yu'un ya yal ta jamal te ants: Teme mayuc mach'a wayemat soc, teme mayuc howiyemat ta stojol amamalal te ya xbohlob ac'oblal yu'un, hich mayuc bin ya spasbat te ch'ahal ha' te ya xbohlobteswan;

²⁰ yan teme howiyemat ta stojol amamalal soc la abohlobtes ac'oblal, teme wayat soc yan winic te ma ha'uc amamalal,

²¹ (te sacerdote ya me yal ta stojol te ants te bohlobtesbeyel c'oblalil ini): Te Jehová ac'a yac' te bohlubuc ac'oblal ya xc'ohat ta yohlil te pueblo awu'un, te Jehová ac'a yac' lewts'ujuc acub soc siht'uc ach'uht;

²² te ha' te ya xbohlobteswan ac'a c'ohtuc ta ach'uht soc ac'a yac' siht'uc ach'uht soc lewts'ujuc acub, xchi. Hich me ya sjac' te ants: Hichuc, hich ac'a c'ohtuc ta pasel, xchi.

²³ Te sacerdote ya me sts'ihbay te chopol c'oblalil ini soc ya spoc loq'uel ta ch'ahal ha'.

²⁴ Ya ya'be yuch' te ants te ch'ahal ha' ya xbohlobteswan, hich ya x'och te ch'ahal ha' ta sbaq'uetal soc ya xhahch ta uts'inel yu'un.

²⁵ Patil te sacerdote ya stsacbe ta sc'ab te ants te mahtanil harina yu'un ich'mul, ya stuchilan ta stojol Jehová soc ya ya'be ta scajtajib ta chiq'uel mahtanil.

²⁶ Te sacerdote ya yich' johpuc te mahtanil harina scuenta sna'ojibal te ants, ya schic' ta scajtajib ta chiq'uel mahtanil; patil ya ya'be yuch' te ha' te antse.

²⁷ Teme melel te sbohlobtesej sc'oblal soc te ma junuc yo'tan ta stojol te smamalal, te ha' ya xbohlobteswan ya x'och ta sbaq'uetal soc ya xhahch ta uts'inel yu'un, ya me siht' sch'uht soc ya me slewts'uj scub; ha bohloben me sc'oblal ya xc'oht ta yohlil te pueblo yu'une.

²⁸ Yan teme ma ba sbohlobtesej sc'oblal te antse, teme lec aye, libre ya xhil soc ya xhu' ya x'alaj.

²⁹ Ha te mandaril yu'un ich'mul ini te c'alal ya xhowiy te ants ta stojol smamalal soc te ya sbohlobtes sc'oblal,

³⁰ o te c'alal ya xhahch ta ich'mul te smamalal, te ya yich'multay te yihname. Ya ya'be stehc'an sba ta stojol Jehová te ants, te sacerdote ya spasbe spisil te bin ya yal te mandaril ini.

³¹ Te winic ma me ayuc smul ya xc'oht, pero te antse ya me scuch smul stuquel, xchi.