Números 34 - Bible in Tzeltal Bachajón

¹ Te Jehová la yalbe te Moisés:

² Halbeya te snich'nab Israel: C'alal ochemexix bahel a ta sq'uinal Canaán, ha te q'uinal te yac awich'ic a'beyel, ha me smojonil ini:

³ Te mojon ta stojol sur, ya xhahch ta jochol taquin q'uinal Zin c'alal ta mojon yu'un Edom; ta stojol banti ya xloc' tal c'ahc'al ya xhahch ta sti'il Mar Salado ta stojol sur,

⁴ ya sut sba ta stojol sur ha to ta mohel yu'un Acrabim, ya xc'ax bahel ta Zin, ya xc'oht ta sur yu'un Cades-barnea, tey ya xc'ax xan bahel ta Hasar-adar c'alal ta Asmón,

⁵ tey ya sut sba a, ya xbaht ta uc'um yu'un Egipto, ya xhul ta loq'uel ta sti'il te Muc'ul Mar.

⁶ Te mojon ta stojol ban ya xmahl c'ahc'al, ha te sti'il te Muc'ul Mar.

⁷ Te mojon ta stojol norte hich ay: ya xhahch ta Muc'ul Mar, ya xc'ax bahel c'alal ta wits Hor;

⁸ ta wits Hor ya xc'ax bahel ta yochibal Hamat, tey ya xbaht c'alal ta Zedad,

⁹ ya xbaht xan ta Zifrón, ya xhul ta loq'uel ta Hazar-enán. Ha te mojon ta stojol norte.

¹⁰ Te mojon ta stojol banti ya xloc' tal c'ahc'al, ya xhahch ta Hazar-enán c'alal ta Sefam,

¹¹ ya xco bahel ta Sefam c'alal ta Ribla, te ay ta stojol banti ya xloc' tal c'ahc'al yu'un Aín, tey ya xco bahel ta stojol banti ya xloc' tal c'ahc'al yu'un te mar Cineret;

¹² patil ya st'un bahel ta muc'ul-ha' Jordán, ya xhul ta loq'uel ta Mar Salado. Ha te q'uinal awu'unic soc te mojonetic ta sjoyobal, xchi te Diose.

¹³ Te Moisés hich la yalbe te snich'nab Israel: Ha te q'uinal te yac apucbe abahic ta scuenta seña ta na'el, ha te q'uinal la yal te Jehová te ya yich'ic a'beyel te balunchahp soc j'ohlil,

¹⁴ como te jayeb sna te sme'static ta jchahp yu'un Rubén, ta jchahp yu'un Gad soc ta j'ohlil jchahp yu'un Manasés la yich'iquix te sq'uinalique.

¹⁵ Te cha'chahp soc j'ohlil la yich'iquix sq'uinalic li'i ta jehch Jordán, te snuhp'usitayej sba soc Jericó, ta stojol banti ya xloc' tal c'ahc'al, xchi.

¹⁶ Te Jehová hich la yalbe te Moisés:

¹⁷ Ha ini te sbihil te winiquetic te ya spuquic te q'uinal ta awohlilic: ha te sacerdote Eleazar soc Josué snich'an Nun.

¹⁸ Soc ic'ahic jujutuhl príncipal ta jujuchahp ta spuquel te q'uinale.

¹⁹ Hich ay sbihilic te winiquetic: Ta jchahp yu'un Judá, ha te Caleb snich'an Jefone.

²⁰ Ta jchahp yu'un Simeón, ha te Semuel snich'an Amiud.

²¹ Ta jchahp yu'un Benjamín, ha te Elidad snich'an Quislón.

²² Ta jchahp yu'un Dan, ha te príncipal Buqui snich'an Jogli.

²³ Ta snich'nab José: ha te jchahp yu'un Manasés, ha te príncipal Haniel snich'an Efod,

²⁴ soc ta jchahp yu'un Efraín, ha te príncipal Kemuel snich'an Siftán.

²⁵ Ta jchahp yu'un Zabulón, ha te príncipal Elizafán snich'an Parnac.

²⁶ Ta jchahp yu'un Isacar, ha te príncipal Paltiel snich'an Azán.

²⁷ Ta jchahp yu'un Aser, ha te príncipal Ahiud snich'an Selomi.

²⁸ Ta jchahp yu'un Neftalí, ha te príncipal Pedael snich'an Amiud, xchi te Diose.

²⁹ Ha'ic te pasotic ta mandar yu'un Jehová te ya scuentahinic spucbeyel te q'uinal ta Canaán te ya yich'ic hilel te snich'nab Israel.