Números 33 - Bible in Tzeltal Bachajón

Banti behenic c'axel snich'nab Israel c'alal Egipto ha to ta muc'ul-ha' Jordán

¹ Hich ay te banti behenic c'axel te snich'nab Israel c'alal loq'uic tal ta Egipto ta jujuchahp, ta scuenta j'ic'aw Moisés soc Aarón.

² Te Moisés la sts'ihbay te banti behenic c'axel, hich te bin ut'il pasot ta mandar yu'un Jehová. Hich ay te banti behenic c'axel:

³ Loq'uic bahel ta Ramesés ta yo'lajunebal (15) c'ahc'al yu'un te shahchibal u yu'un te ha'bile. Ta schebal c'ahc'al yu'un te Q'uin Pascua, bayel yip yo'tanic a loq'uic bahel te snich'nab Israel ta sitic spisil te egipciohetic

⁴ te c'alal yac smucbelic a te ba-alaletic yu'unic te milotic yu'un Jehová. Te Jehová ha nix hich ya'beyej castigo te diosetic yu'unique.

⁵ Te snich'nab Israel loq'uic bahel ta Ramesés, c'oht spas scampamentohic ta Sucot.

⁶ Loq'uic bahel ta Sucot, c'oht spas scampamentohic ta Etam, te ay ta sti'il te jochol taquin q'uinal.

⁷ Loq'uic bahel ta Etam, bahtic ta stojol Pi-hahirot te ay ta stojol banti ya xloc' tal c'ahc'al yu'un Baal-zefón, c'oht spas scampamentohic ta stojol Migdol.

⁸ Loq'uic bahel ta Pi-hahirot, sohlic bahel ta mar, c'ohtic ta jochol taquin q'uinal; behenic bahel oxeb c'ahc'al ta jochol taquin q'uinal Etam, la spas scampamentohic ta Mara.

⁹ Loq'uic bahel ta Mara, c'ohtic ta Elim, te banti ay lahchayeb (12) sloq'uib ha'etic soc lajuneb schanwinic (70) ta tehc' xahnetic; tey c'oht spas scampamentohic a.

¹⁰ Loq'uic bahel ta Elim, la spas scampamentohic ta sts'ehl Mar Rojo.

¹¹ Loq'uic bahel ta Mar Rojo, la spas scampamentohic ta jochol taquin q'uinal Sin.

¹² Loq'uic bahel ta jochol taquin q'uinal Sin, la spas scampamentohic ta Dofca.

¹³ Loq'uic bahel ta Dofca, la spas scampamentohic ta Alús.

¹⁴ Loq'uic bahel ta Alús, la spas scampamentohic ta Refidim, ta banti ma ba la sta yuch'ic ha' te pueblo.

¹⁵ Loq'uic bahel ta Refidim, la spas scampamentohic ta jochol taquin q'uinal Sinaí.

¹⁶ Loq'uic bahel ta jochol taquin q'uinal Sinaí, la spas scampamentohic ta Kibrot-hataava.

¹⁷ Loq'uic bahel ta Kibrot-hataava, la spas scampamentohic ta Hazerot.

¹⁸ Loq'uic bahel ta Hazerot, la spas scampamentohic ta Ritma.

¹⁹ Loq'uic bahel ta Ritma, la spas scampamentohic ta Rimón-peres.

²⁰ Loq'uic bahel ta Rimón-peres, la spas scampamentohic ta Libna.

²¹ Loq'uic bahel ta Libna, la spas scampamentohic ta Rissa.

²² Loq'uic bahel ta Rissa, la spas scampamentohic ta Ceelata.

²³ Loq'uic bahel ta Ceelata, la spas scampamentohic ta wits Sefer.

²⁴ Loq'uic bahel ta wits Sefer, la spas scampamentohic ta Harada.

²⁵ Loq'uic bahel ta Harada, la spas scampamentohic ta Macelot.

²⁶ Loq'uic bahel ta Macelot, la spas scampamentohic ta Tahat.

²⁷ Loq'uic bahel ta Tahat, la spas scampamentohic ta Tara.

²⁸ Loq'uic bahel ta Tara, la spas scampamentohic ta Mitca.

²⁹ Loq'uic bahel ta Mitca, la spas scampamentohic ta Hasmona.

³⁰ Loq'uic bahel ta Hasmona, la spas scampamentohic ta Moserot.

³¹ Loq'uic bahel ta Moserot, la spas scampamentohic ta Bene-jaacán.

³² Loq'uic bahel ta Bene-jaacán, la spas scampamentohic ta wits yu'un Gidgad.

³³ Loq'uic bahel ta wits yu'un Gidgad, la spas scampamentohic ta Jotbata.

³⁴ Loq'uic bahel ta Jotbata, la spas scampamentohic ta Abrona.

³⁵ Loq'uic bahel ta Abrona, la spas scampamentohic ta Ezión-geber.

³⁶ Loq'uic bahel ta Ezión-geber, la spas scampamentohic ta jochol taquin q'uinal Zin, ha te Cades.

³⁷ Loq'uic bahel ta Cades, la spas scampamentohic ta wits Hor, ta smojonil sq'uinal Edom.

³⁸ Ta scuenta smandar Jehová, te sacerdote Aarón mo bahel ta wits Hor, tey cham a ta sba c'ahc'alil yu'un te yo'ebal u ta scha'winic (40) ha'bil sloq'uelic tal ta sq'uinal Egipto a te snich'nab Israel.

³⁹ Ayix oxeb shucwinic (123) ya'bilal a te Aarón c'alal cham ta wits Hor.

⁴⁰ Te cananeo, te ajwalil yu'un Arad, te nahinem ta Neguev ta sq'uinal Canaán, la ya'iy te hulemiquix te snich'nab Israel.

⁴¹ Te snich'nab Israel loq'uic bahel ta wits Hor, la spas scampamentohic ta Zalmona.

⁴² Loq'uic bahel ta Zalmona, la spas scampamentohic ta Punón.

⁴³ Loq'uic bahel ta Punón, la spas scampamentohic ta Obot.

⁴⁴ Loq'uic bahel ta Obot, la spas scampamentohic ta Ije-abarim, ta smojonil sq'uinal Moab.

⁴⁵ Loq'uic bahel ta Ije-abarim, la spas scampamentohic ta Dibón-gad.

⁴⁶ Loq'uic bahel ta Dibón-gad, la spas scampamentohic ta Almon-diblataim.

⁴⁷ Loq'uic bahel ta Almon-diblataim, la spas scampamentohic ta witsiltic Abarim, ta stojol Nebo.

⁴⁸ Loq'uic bahel ta witsiltic Abarim, la spas scampamentohic ta spamlej yu'un Moab, ta sts'ehl te muc'ul-ha' Jordán, te snuhp'usitayej sba soc Jericó.

⁴⁹ Ta slajibal la spas scampamentohic ta sts'ehl te muc'ul-ha' Jordán, c'alal Bet-jesimot ha to ta Abel-sitim, ta spamlej yu'un Moab.

Bin ut'il ya yich' puhquel te q'uinal, soc mojonetic yu'un

⁵⁰ Te Jehová hich la yalbe te Moisés ta spamlej yu'un Moab ta sts'ehl Jordán, te snuhp'usitayej sba soc Jericó:

⁵¹ Halbeya te snich'nab Israel: C'alal sohlemexix bahel ta muc'ul-ha' Jordán a, ha te ya x'ochex bahel ta sq'uinal Canaán,

⁵² ya me atenic loq'uel ta atojolic spisil te mach'atic nahinemic tey ta q'uinal. Jinticlanahic spisil te yahcananic pasbilic ta ton soc te loc'ombahetic pasbilic ta uhltesbil taq'uin, soc jinticlanahic spisil te toyol awilaletic yu'unique.

⁵³ Ya me atenic loq'uel te yajwal te q'uinale, ha'ex ya xnahinex tey a, como la jca'beyex te q'uinal yu'un awu'unic ya c'oht.

⁵⁴ Ya me awich'ic hilel te q'uinal ta scuenta seña ta na'el ta jujuchahp ats'umbalic; teme bayelic, muc' sq'uinal yac awa'beyic, teme mayuc bayelic, ma ba muc' yac awa'beyic. Ta banti ya yac' ta na'el te seña ta na'el, tey nix ya yich' sq'uinal a te jujuchahp. Ta scuenta jujuchahp sts'umbal te atatic ya me awich'ic hilel te q'uinale.

⁵⁵ Yan teme ma ba yac atenic loq'uel ta atojolic te yajwal te q'uinale, te mach'atic ya xhilic awu'unic hich ya xc'ohtic te bin ut'il c'a'pal ta asit soc hich te bin ut'il ch'ix ta amochbaquel; ya me yuts'inex ta q'uinal te banti ya xnahinex.

⁵⁶ Soc hich ya jpasbeyex te bin jnopoj te ya jpasbeyique, xchi te Jehová.