Números 32 - Bible in Tzeltal Bachajón

Rubén soc Gad ya xnahinic ta jehch muc'ul-ha' Jordán

¹ Te snich'nab Rubén soc Gad mero bayel chambahlametic yu'unic. C'alal la yilic te sq'uinal Jazer soc Galaad te ha lequil q'uinal yu'un chambahlametic,

² tal sc'oponic te Moisés, te sacerdote Eleazar soc te príncipaletic yu'un te pueblo, hich la yalbeyic:

³ Te Atarot, Dibón, Jazer, Nimra, Hesbón, Eleale, Sebam, Nebo soc Beón,

⁴ te q'uinal te la yu'untay Jehová ta stojol te pueblo Israel, ha lequil q'uinal yu'un chambahlametic. Te a'batotic awu'un ay jchambahlamcotic.

⁵ Ha yu'un teme lecotcotic ta atojol, a'botcotic te q'uinal, ma me xawac'otcotic c'axel ta muc'ul-ha' Jordán, xchihic.

⁶ Pero te Moisés la sjac'be sc'op te snich'nab Gad soc te snich'nab Rubén: ¿Yu'un bal ya xhilex li'i te c'alal ya xbahtic ta guerra te awermanotac?

⁷ ¿Bin yu'un yac apehc'ambeyic yo'tan te snich'nab Israel te ma ba ya sohlic bahel ta q'uinal te ya'beyejic te Jehová?

⁸ Hich nix la spasic te atatic te la jticonic hahchel ta Cades-barnea ta stsahtayel te q'uinale.

⁹ Mohic bahel c'alal ta uc'um yu'un Escol, la stsahtayic te q'uinale, patil la schebantesbeyic yo'tanic te snich'nab Israel yu'un te ma ba ya x'ochic bahel ta q'uinal te a'bibilic yu'un Jehová.

¹⁰ Ha yu'un ilin te Jehová ta hich ora, soc jc'axel hich la yal ta jamal:

¹¹ Te mach'atic loq'uic tal ta Egipto te ayix jtahb ya'bilalic ma ba ya yilic te q'uinal te la jcalbe ta jamal te Abraham, Isaac soc Jacob te ya ca'beyic, yu'un ma ba jun yo'tan la st'unonic bahel;

¹² ha nax stuquel te Caleb snich'an Jefone, te Cenezeo-winic, soc te Josué snich'an Nun, te jun yo'tanic ta stojol Jehová, xchi.

¹³ Tihl yilimba Jehová ta stojol Israel, hich la ya'be sbehentayic te jochol taquin q'uinal cha'winic (40) ha'bil, ha to c'alal mayuquix mach'a cuxul hil te chopol bin la spasic ta stojol Jehová.

¹⁴ Yo'tic ha'ex la ajelolin atatic, ha'ex snich'nabex jmulawil winiquetic, yac awaq'uic tohyuc xan yilimba Jehová ta stojol Israel.

¹⁵ Teme yac awihquitayic hilel te Jehová, yan buelta ya me yihquitayex hilel ta jochol taquin q'uinal; ya me xlaj ta acuentahic te pueblo ini, xchi te Moisés.

¹⁶ Ha yu'un talic te snich'nab Ruben soc Gad ta stojol Moisés, hich la yalbeyic: Ya jpasbecotic corraletic yu'un te chambahlametic cu'uncotic, soc ya jpasbecotic pueblohetic yu'un te jnich'nabcotic.

¹⁷ Pero te ho'otcotic ya jchahpan jbahcotic yu'un guerra, ya xnahilijotcotic bahel yu'un te snich'nab Israel ha to c'alal ya cac'cotic te ya xc'ohtic ta lugar yu'unique. Te alaletic cu'uncotic ya xhilic ta pueblohetic te ay sts'ahcul, ta scaj te mach'atic nahinemic tey ta q'uinal.

¹⁸ Ma ba ya suhtotcotic tal ta jnahcotic ha to c'alal la stahic hilel sq'uinalic te snich'nab Israel.

¹⁹ Te bin ut'il quich'ojcotic hilel jq'uinalcotic li' ta jehch ha' ta stojol banti ya xloc' tal c'ahc'al yu'un Jordán, ma ba pajal ya quich'cotic q'uinal soc te yantic tey ta jehch muc'ul-ha' Jordán, xchihic.

²⁰ Ha yu'un hich la sjac' te Moisés: Teme hich yac apasic, teme yac achahpan abahic ta stojol Jehová ta yaq'uel guerra,

²¹ teme apisilic chapalex ta yaq'uel guerra a ya xc'axex bahel ta Jordán ta stojol Jehová ha to c'alal la stenticlanic loq'uel te scontratac

²² soc te u'untaybilix a te q'uinal ta stojol Jehová, hich ya xhu' ya suhtex bahel. Hich libre ya xhilex yu'un te bin ay ta acuentahic spasel ta stojol Jehová soc ta stojol Israel, soc ha awu'unic ya xc'oht te q'uinal ini ta stojol Jehová.

²³ Yan teme ma hichuc yac apasique, la ata amulic ta stojol Jehová. Na'a me te ya me stahex te amulique.

²⁴ Pasahic pueblohetic yu'un te anich'nabic soc corraletic yu'un te tuminchijetic soc tentsunetic awu'unic, soc c'ohtesahic ta pasel te bin awalojic, xchi te Moisés.

²⁵ Te snich'nab Gad soc Rubén la yalbeyic te Moisés: Te a'batetic awu'un ya me spasic te bin yaloj te cajwale.

²⁶ Te jnich'nabcotic soc quihnamcotic, te wacaxetic soc spisil te chambahlametic cu'uncotic ya xhilic li' ta pueblohetic yu'un Galaad.

²⁷ Te a'batetic awu'un, te chapaliquix yu'un guerra a, ya sohlic bahel ta stojol Jehová ta yaq'uel guerra, hich te bin ut'il yaloj te cajwal, xchihic.

²⁸ Ha yu'un te Moisés la spas ta mandar te sacerdote Eleazar, te Josué snich'an Nun, soc te príncipaletic yu'un te jujuchahp snich'nab Israel,

²⁹ hich la yalbeyic: Teme ya sjoquinotic ta sohlel te muc'ul-ha' Jordán te snich'nab Gad soc Rubén, te chapal spisilic soc ya'tejibic ta yaq'uel guerra ta stojol Jehová, te c'alal u'untaybilix a te q'uinal, hich yac awa'beyic yich'ic hilel te sq'uinal Galaad.

³⁰ Yan teme ma chapaluc ya xc'axic bahel soc ya'tejibic, ha me ya sta sq'uinalic ta awohlilic ta sq'uinal Canaán, xchi.

³¹ Te snich'nab Gad soc Rubén hich la sjaq'uic: Ya jpascotic te bin yaloj Jehová ta stojol te a'batetic awu'une.

³² Chapalotcotic soc ca'tejibcotic ta stojol Jehová a ya sohlotcotic bahel ta sq'uinal Canaán, soc ha ya xhil ta jcuentacotic te q'uinal li' ta jehch Jordán, xchihic.

³³ Hich te Moisés la ya'be te snich'nab Gad, te snich'nab Rubén soc j'ohlil te jchahp yu'un Manasés snich'an José te ban c'alal scuentahinej Sehón ajwalil yu'un te amorreohetic, soc te ban c'alal scuentahinej Og ajwalil yu'un Basán, spisil te q'uinal soc te pueblohetic yu'un soc te q'uinal ta sjoyobal.

³⁴ Te snich'nab Gad la spasic te Dibón, Atarot, Aroer,

³⁵ Atarot-sofán, Jazer, Jogbeha,

³⁶ Bet-nimra soc Bet-arán, ha pueblohetic joytaybilic ta ts'ahc; soc la spasbeyic scorral stuminchijic.

³⁷ Te snich'nab Rubén la spasic te Hesbón, Eleale, Quiriataim,

³⁸ Nebo, Baal-meón (la sjeltaybeyic te sbihilique), soc Sibma; la yac'ticlambeyic yach'il sbihilic te pueblohetic te la spasique.

³⁹ Te snich'nab Maquir te snich'an Manasés bahtic ta sq'uinal Galaad, la yu'untayic soc la stenic loq'uel te amorreohetic te tey ayic a.

⁴⁰ Ha yu'un te Moisés la ya'be te sq'uinal Galaad te Maquir te snich'nab Manasés, tey nahinic a.

⁴¹ Ha nix hich te Jair snich'an Manasés baht yu'untay te tut pueblohetic yu'un, la yac'ticlambe sbihilin Havot-jair.

⁴² Ha nix hich te Noba baht yu'untay te Kenat soc te tut pueblohetic yu'un, la ya'be sbihilin Noba, hich te bin ut'il te sbihile.