Números 30 - Bible in Tzeltal Bachajón

Mandariletic yu'un schapel c'op ta stojol Dios

¹ Te Moisés hich la yalbe te príncipaletic yu'un jujuchahp te snich'nab Israel: Hich ay te bin yaloj te Jehová:

² Teme ay mach'a ya schap sc'op ta stojol Jehová, o teme ay bin jc'axel ya yal ta jamal te ya spas, ma me sut sc'op; ya me spas spisil te bin yaloje.

³ Teme ay ach'ix te ay to ta sna stat te ya schap sc'op ta stojol Jehová o te jc'axel ya yal ta jamal te ay bin ya spas,

⁴ teme la ya'iy te stat te bin la schap o te bin la yal ta jamal te ya spas, teme mayuc bin ya yal yu'un, hich chapal ya xhil te bin la schap o te bin jc'axel la yal ta jamal te ya spase.

⁵ Yan teme ma ba ya x'a'bot spas yu'un te stat te bin ora la ya'iy, ma ba hich chapal ya xhil te bin xchapoj o te bin yaloj ta jamal te ya spase. Te Jehová ya spasbe perdón yu'un te ma hichuc yo'tan te state.

⁶ Teme nuhpunem a te ants te ya schap sc'op o te ora nax ay bin loc' ta ye te la schuc sba a,

⁷ teme la ya'iy te smamalal, teme mayuc bin ya yal yu'un, hich chapal ya xhil te bin la schap o te bin jc'axel la yal ta jamal te ya spase.

⁸ Yan teme ma hichuc yo'tan te smamalal te c'alal la ya'iy, ma ba hich chapal ya xhil te bin schapoj o te bin la yal ta jamal te la schuc sba a. Te Jehová ya spasbe perdón.

⁹ Teme me'ba' ants o teme ihquitaybil ta winic te ya schap sc'op te ya xchuc sba a, hich chapal ya xhil.

¹⁰ Teme ay ants te schapoj sc'op ta sna smamalal, o te jc'axel yaloj te ay bin ya spas,

¹¹ teme la ya'iy te smamalal, teme mayuc bin la yal yu'un, hich chapal ya xhil spisil te bin schapoj o te bin jc'axel yaloj ta jamal te ya spase.

¹² Yan teme la slajimbe sc'oblal te smamalal te bin ora la ya'iy, ma ba hich chapal ya xhil spisil te bin schapoj o te bin jc'axel yaloj ta jamal te ya spase; lajimbot sc'oblal yu'un te smamalal. Te Jehová ya spasbe perdón.

¹³ Spisil te bin schapoj o spisil te bin jc'axel yaloj ta jamal te ya spase, te smamalal ya xhu' ya yac' te chapal ya xhil o ya slajimbe sc'oblal.

¹⁴ Yan teme mayuc bin ya yal te smamalal ta jujun c'ahc'al, hich la yac' te chapal ya xhil spisil te bin schapoj o te bin jc'axel yaloj ta jamal te ya spase; chapal ya xhil yu'un te bin ut'il mayuc bin la yal te c'alal la ya'iy.

¹⁵ Yan teme ya slajimbe sc'oblal ta patil te la ya'iy, ha ya smulimbe smul te yihname, xchi te Moisés.

¹⁶ Ha mandariletic ini te Jehová la ya'be Moisés sc'oblal te winic soc yihnam, te tatil soc te yantsil-nich'an c'alal ach'ix to a, te ay to ta sna te state.