Números 24 - Bible in Tzeltal Bachajón

¹ Te c'alal la yil te Balaam te lec yo'tan Jehová yu'un te ya ya'be bendición te Israel, ma ba la sle jwoyaw, hich te bin ut'il ta shahchibal soc ta schebal buelta, ha la yil bahel ta stojol te jochol taquin q'uinal.

² C'alal la stoy mohel sit, la yil te Israel te chahpambil scampamentohic ta scuenta jujuchahp sts'umbalic, tal ta stojol te Espíritu yu'un Dios.

³ Ha yu'un hich la yal ta sc'op-jalwanej: Hich ya yal Balaam snich'an Beor, hich ya yal te winic te wiq'uil sit,

⁴ te mach'a ya ya'iy bin ya yal te Diose, te ya yil te nahalsitil yu'un te Mach'a spisil ya xhu' yu'une; yahlem ta lum, pero wiq'uil sit:

⁵ ¡Buen t'ujbil te nahilpaq'uetic awu'un, Jacob, te banti nahinemat, Israel!

⁶ Hich bin ut'il spamlejetic te spucoj sbahic, hich bin ut'il ts'unubiletic ta ti' muc'ul-ha', hich bin ut'il áloes ts'umbilic yu'un Jehová, hich bin ut'il cedrohetic ta ti'ti'ha'.

⁷ Ya xmal loq'uel ha' ta baldehetic yu'unic, ay bayel ha' yu'un te sts'umbale. Te ajwalil yu'unic c'ax hich sc'oblal a te bin ut'il Agag, ya xmuc'ub sc'oblal te ban c'alal ya xcuentahinwan.

⁸ Dios la sloq'ues tal ta Egipto; hich yipic te bin ut'il yip ha'mal toro. Ya sti'ticlan te nacionetic te ya xcontrahinot yu'un, ya swac'ticlambe sbaquel, tamp'as ya sohlteslambe te ya'tejibal st'ihmalte'.

⁹ Ya swuhts'an sba, ya spahcan sba hich te bin ut'il choj, hich te bin ut'il yantsilel choj, ¿mach'a ya stij hahchel? ¡Ayuc bayel bendición yu'un te mach'atic ya sc'ambat bendición, soc bohlobuc me sc'oblal te mach'a ya sbohlobtesbat ac'oblal! xchi.

Sc'op-jalwanej la yal Balaam

¹⁰ Ha yu'un te Balac bayel ilin ta stojol Balaam. La smajticlan sc'ab yu'un, hich la yalbe: La quic'at tal yu'un yac abohlobtesbe sc'oblal te jcontra, pero oxebix buelta la ac'ambe bendición.

¹¹ ¡Yo'tic, bahanix ta ahnel ta alumal! La jcalbat te bayel ya cac'at ta ich'el ta muc', pero te Jehová ma ba la yac' te ya x'ich'otat ta muc', la yut.

¹² Hich la sjac' te Balaam: ¿Ma bal hichuc la jcalbe te mach'atic la aticonlan bahel ta jtojol:

¹³ Aunque te Balac ya ya'bon te sna nojel ta plata soc oro, ma xhu' ya jc'axuntaybe sc'op Jehová, te jtuquel ya jnop ya jpas te bin lec o te bin ma lecuc. Te bin ya yal te Jehová, hich me ya cal?

¹⁴ Ha yu'un ya suhtonix bahel ta jlumal. Pero la' me, ya calbat awa'iy bin ya spas te pueblo ini ta stojol te pueblo awu'un ta patilal, xchi.

¹⁵ Hich c'opoj ta sc'op-jalwanej: Hich ya yal Balaam snich'an Beor hich ya yal te winic te wiq'uil sit;

¹⁶ hich ya yal te mach'a ya ya'iybe sc'op te Diose, te mach'a sna'oj te bin ya sna' te Mach'a toyol ay, te mach'a ya yil te snahalsit te Mach'a spisil ya xhu' yu'un, te mach'a yahlem ta lum, pero jamal te site:

¹⁷ Ha ya quil, pero ma ta orahuc; ha ya jna'ulan, pero ma nopoluc ay; ya xloc' tal ec' ta Jacob, ya xchicnaj bastón ta yohlil Israel; ya me swuybe sti'ba te Moab, soc ya me slajinlan spisil te sts'umbal Set.

¹⁸ Ya yich' u'untayel Edom, ya yich' u'untayel Seir yu'un te scontra, yan te Israel muc' bintic ya spas.

¹⁹ Ya xloc' jtuhl jtsalaw ta Jacob, ya slajinlan te mach'atic hilemic yu'un te pueblo, xchi.

²⁰ Te Balaam la yil te Amalec, hich la yal ta sc'op-jalwanej: Te Amalec ha jolal yu'un te nacionetic, pero ta patil jc'axel jimbil ya xc'oht, xchi.

²¹ Soc la yil te ceneohetic, hich c'opoj ta sc'op-jalwanej: Ay yip te banti ya xnahinat; ay apechech ta tontiquil;

²² pero te ceneo ya me xlaj, te c'alal ya schucat bahel te Asiria, xchi.

²³ C'opoj xan ta sc'op-jalwanej, hich la yal: ¡Ay! ¿Mach'a cuxul ya xhil te c'alal hich ya spas te Diose?

²⁴ Ya xloc' tal barcohetic ta sti'il mar ta Quitim, ya ya'be swocol te Asiria soc te Heber, pero ha'ic nix jc'axel me ya xlajic, xchi.

²⁵ Hich hahch te Balaam, suht bahel ta slumal, soc ha nix hich suht bahel te Balac.