Números 17 - Bible in Tzeltal Bachajón

Nichin snahbate' Aarón

¹ Te Jehová la yalbe te Moisés:

² Halbeya te snich'nab Israel te ac'a yich'ic tal snahbate'ic jujutuhl príncipaletic ta jujuchahp, lahchayeb nahbate'eletic hich te bin ut'il te sna sme'statique. Ya me ats'ihbabe sbihilic jujutuhl ta snahbate'ic,

³ soc ya me ats'ihbabe sbihil Aarón ta snahbate' te sts'umbal Leví, como ya sc'an te ay jujuch'ix snahbate'ic te jtsobaw yu'un jujuchahp sna sme'static.

⁴ Yac awac'ticlan ta Nahilpac' Templo yu'un tahojibal ta stojol te Testigo-c'op.

⁵ Ha ya xnichin te snahbate' te mach'a tsahbil cu'un, hich ya cac' quehchajuc ta jtojol te spartehic te snich'nab Israel te la scontrahinexe, xchi.

⁶ Te Moisés hich la yalbe te snich'nab Israel, ha yu'un spisil te príncipaletic yu'unic la yac'ticlambe snahbate'ic, jujun nahbate'el ta jujutuhl príncipal ta jujuchahp, lahchaych'ix ta spisil; soc tey nix ay a te snahbate' Aarón.

⁷ Te Moisés la yac' hilel te nahbate'eletic ta stojol Jehová ta Nahilpac' yu'un te Testigo-c'op.

⁸ Ta yan c'ahc'al tal ta Nahilpac' yu'un te Testigo-c'op te Moisés, la yil te snahbate' Aarón te ay ta scuenta Leví, puhlinemix, yac'ticlanejix swolnich, snich soc almendra sit.

⁹ Ha yu'un te Moisés la sloq'ues tal spisil te nahbate'eletic te ay ta stojol Dios, la yac'ticlan ta stojol spisil te snich'nab Israel. La yilic, soc jujutuhl la stsaquic te snahbate'ique.

¹⁰ Te Jehová hich la yalbe te Moisés: Ac'a xan te snahbate' Aarón ta stojol te Testigo-c'op scuenta seña yu'un te mach'atic stoyoj sbahique. Hich yac awac' quehchajuc a te spartehic ta jtojol, scuenta yu'un ma ba ya xchamic, xchi.

¹¹ Te Moisés hich nix la spas te bin halbot yu'un Jehová.

¹² Pero te snich'nab Israel la yalbeyic te Moisés: ¡Yo'tic chamenotcotiquix! ¡Ch'ayemotcotiquix, ta jpisilcotic ch'ayemotcotiquix!

¹³ Ya xcham mach'ayuc a te ya xnohpoj tal ta Nahilpac' yu'un Jehová. ¿Yu'un bal jc'axel ya xchamotcotic ta jpisilcotic hiche? xchihic.