Números 13 - Bible in Tzeltal Bachajón

Ticonot lahchaytuhl jtsahtaywanejetic ta Canaán

¹ Te Jehová la yalbe te Moisés:

² Ticona bahel winiquetic ta stsahtayel te sq'uinal Canaán te ya ca'be te snich'nab Israel. Ticona bahel jtuhl príncipal ta jujuchahp yu'un Israel, xchi.

³ Ha yu'un te Moisés la sticonlan hahchel c'alal ta jochol taquin q'uinal Parán, hich te bin ut'il la yal te Jehová. Spisil te winiquetic ha príncipaletic yu'un te snich'nab Israel.

⁴ Hich ay te sbihilique: ta jchahp yu'un Rubén, ha Samúa snich'an Zacur;

⁵ ta jchahp yu'un Simeón, ha Safat snich'an Horí;

⁶ ta jchahp yu'un Judá, ha Caleb snich'an Jefone;

⁷ ta jchahp yu'un Isacar, ha Igal snich'an José;

⁸ ta jchahp yu'un Efraín, ha Oseas snich'an Nun;

⁹ ta jchahp yu'un Benjamín, ha Palti snich'an Rafú;

¹⁰ ta jchahp yu'un Zabulón, ha Gadiel snich'an Sodi;

¹¹ ta jchahp yu'un José (ha te sts'umbal Manasés), ha Gadi snich'an Susi;

¹² ta jchahp yu'un Dan, ha Amiel snich'an Gemali;

¹³ ta jchahp yu'un Aser, ha Setur snich'an Micael;

¹⁴ ta jchahp yu'un Neftalí, ha Nahbi snich'an Vapsi;

¹⁵ soc ta jchahp yu'un Gad, ha Geuel snich'an Maqui.

¹⁶ Ha sbihilic te winiquetic la sticon bahel te Moisés ta stsahtayel te q'uinale. Te Oseas snich'an Nun, a'bot sbihil Josué yu'un te Moisés.

¹⁷ Te Moisés la sticonlan bahel ta stsahtayel te sq'uinal Canaán, hich la yalbe: C'axanic bahel ta Neguev, mohanic xan bahel ta witsiltic.

¹⁸ Ila awilic bin yilel te q'uinal soc te ants-winiquetic nahinemic tey a, teme ay yipic o mayuc yipic, teme mayuc bayel o teme bayelique;

¹⁹ bin yilel te q'uinal banti ayic, teme lec o teme ma lecuc; bin yilel te pueblohetic, teme ha nax campamentohetic o teme joytaybilic ta ts'ahc;

²⁰ soc bin yilel te lumq'uinal, teme yaxal q'uinal o teme mayuc bin ya xcol tey a, teme ay te'etic o mayuc ste'el. Ayuc me yip awo'tanic, soc ich'ahic tal te sit ts'unub-awalil yu'un te q'uinale, xchi. Ha yorahil a te sba sit te ts'usube.

²¹ Hich mohic bahel soc la stsahtayic te q'uinal c'alal ta jochol taquin q'uinal Zin ha to ta Rehob, ta nopol yochibal Hamat.

²² Hich mohic bahel ta Neguev, c'ohtic ta Hebrón te banti ay Ahimán, Sesai soc Talmai, te sts'umbalic Anac. Te Hebrón shuquebal ha'bil shu'el a te chicnaj Zoán ta Egipto.

²³ C'ohtic c'alal ta spamlej Escol, tey la set'beyic jchej sit ts'usub te chebic ta sq'uechel tal ta te', soc la set'beyic granahetic soc higohetic.

²⁴ Ha spamlej Escol sbihil c'oht yu'unic, ta scaj te jchej ts'usub te la set'ic tey a te snich'nab Israel.

²⁵ Te c'alal ts'acay cha'winic (40) c'ahc'al stsahtaybelic a te q'uinal, suhtic talel.

²⁶ C'ohtic ta stojol te Moisés, Aarón soc spisil te pueblo yu'un te snich'nab Israel ta Cades ta jochol taquin q'uinal Parán. La yalbeyic te Moisés, Aarón soc spisil te pueblo bin la yilic, soc la ya'be yilic te sit ts'unub-awalil yu'un te q'uinale.

²⁷ Soc hich la yalbeyic: C'ohotcotic ta q'uinal te la aticonotcotic bahel ta yilel, te mero melel ya x'oquin leche soc chab; ha me ini te sit ts'unub-awalil yu'une.

²⁸ Pero te mach'atic nahinemic tey a ay yipic, soc te pueblohetic mero muq'uic soc joytaybilic ta ts'ahc; soc la jquilcotic tey a te sts'umbal Anac.

²⁹ Te amalequetic nahinemic ta sq'uinal Neguev; te heteo, jebuseo soc amorreo nahinemic ta witsiltic; te cananeo nahinemic ta ti'mar soc ta ti'ti' muc'ul-ha' Jordán, xchihic hulel.

³⁰ Ha yu'un te Caleb la scom ta c'op te pueblo ayic ta stojol Moisés, hich la yal: Mohucotic bahel ta ora, ya me quich'tic te q'uinal, yu'un ya xhu' cu'untic, xchi.

³¹ Pero te winiquetic te mohic bahel soc, la yalic: Ma xhu' cu'untic ya'beyel guerra te winiquetique, yu'un c'ax hich yipic a te bin ut'il te ho'otique, xchihic.

³² Hich la yalic chopol c'op ta stojol te snich'nab Israel sc'oblal te q'uinal te la stsahtayic, hich la yalic: Te q'uinal te c'oht jtsahtaycotic ya sbic'ticlan te mach'a ya xnahinic tey a; soc spisil te ants-winiquetic te la jquilcotic tey a ha mero nahtic.

³³ Soc la jquilcotic tey a c'ax nahtil muc'ul winiquetic, ha te snich'nab Anac. Hich la jca'iy jbahcotic bin ut'il c'ulub, soc ha nix hich la yilotcotic, xchihic.