Nahúm 3 - Bible in Tzeltal Bachajón

¹ ¡Obol aba, pueblohat yu'un ch'ich', nojel ta lot soc elec'! ¡Mayuc slajibal te yac awa'iy pojel!

² ¡Tulan ya xc'opoj te chicote, xnilet sc'op ruedahetic, xpumlajan ta ahnimal cawuhetic, ya xwihlic carretahetic,

³ tulan ya x'ahnimajic jmoheletic ta cawu, xliplajan sts'anabul te espada, soc xliplajan sts'anabul te lanza! ¡Bayel ta tuhl te lajemic, busul schamen baq'uetalic, ma xhu' ta ahtayel te chamen baq'uetetic, ya sc'ohchin sbahic a!

⁴ Spisil ini ha ta scaj te yantsinel te j'antsinel-ants te lec ta ilel soc t'ujbil, te ha jnohpteswanej yu'un j'ac'-chamel, te ya smombe yo'tanic te nacionetic ta scuenta te antsinel yu'un, soc te pueblohetic ta scuenta te j'ac'-chamel yu'une.

⁵ ¡Li' ayon yu'un ya jcuentahinat! xchi te Jehová te scuentahinej spisil, ya jolbat mohel atsec c'alal ta awelaw, ya ca'be yil abaq'uetal te nacionetic, ya ca'be yil aq'uexlal te ban c'alal cuentahimbilic.

⁶ Ya jch'oj bahel ta atojol te bin bohloben sc'oblal, ya cac'at ta tse'layel, hich ya cac'at te bin ut'il tsa'.

⁷ Spisil te mach'a ya yilat, ya me x'ahnic bahel ta atojol soc hich me ya yalic: ¡Jimbilix te Nínive! ¿Mach'a ya sna'be yo'bolil sba? ¿Banti ya jtahbat mach'atic ya smuc'ubtesbat q'uinal awa'iy?

⁸ ¿C'ax bal hich lecat a te bin ut'il Tebas, te ay ta ti' muc'ul-ha' Nilo, te joytaybil ta ha', te ha smahquil te mar, soc ha ts'ahc c'ohem te ha'etique?

⁹ Te Etiopía soc Egipto ha yipinej, mayuc slajibal te yipique; te Fut soc Libia ha te schapoj sbahic soque.

¹⁰ Pero ha ic'ot bahel ta chuquel, te alaletic yu'un la yich'ic majel ta lum ta jujun xuhc callehetic; la spasbeyic seña ta na'el yu'un te mach'atic ich'bilic ta muc', soc spisil te mach'atic muc' sc'oblalic la yich'ic chuquel ta cadena.

¹¹ Ha nix hichat, Nínive, ya me xyacubat soc ya me awich' naq'uel; yac ale banti yac anac' aba, ta scaj te acontrahe.

¹² Spisil te tulan ahnibal ts'ahquetic awu'un hich c'ohemic te bin ut'il higuerahetic te nojel ta yuhninal sit, teme ya yich' yuq'uilanel, ya xluhbaj cohel ta ye te mach'a ya sc'an ya slo'.

¹³ Te soldadohetic awu'un hich ayic te bin ut'il antsetic. Te ochibaletic yu'un aq'uinal ya yich'ic jamel ta stojol te acontratac, soc te c'ahc' ya slajin te sc'atal-te'eletic awu'une.

¹⁴ Chahpana awa'al yu'un yac awich' joytayel ta guerra, a'beya xan yip te joyob-ts'ahquetic awu'un, ochan ta ahch'al, wots'a ta teq'uel, tsaca te spasojibal ladrillo.

¹⁵ Tey ya xlajat ta c'ahc', ya slajinat te espada, hich ya slajinat te bin ut'il te yole. ¡P'ohla abahic hich te bin ut'il c'ulubetic! ¡P'ohla abahic hich te bin ut'il yaxal c'ulub!

¹⁶ C'ax hich p'ohl a te jchombajeletic awu'un te bin ut'il eq'uetic ta ch'ulchan; te c'ulub ya suhlin, ya xwihl bahel.

¹⁷ Te jcananetic awu'un hich c'ohemic te bin ut'il c'ulubetic; te mach'atic muc' sc'oblalic awu'un hich c'ohemic te bin ut'il c'ax bayel c'ulubetic te ya slahman sbahic ta ts'ahc ta yorahil sic; c'alal ya xloc' tal te c'ahc'al, ya xbahtic, mayuc mach'a ya sna' banti.

¹⁸ ¡Wayalic te jcanan-tuminchijetic awu'un, ajwalilat yu'un Asiria! ya scux yo'tanic te mach'atic awu'un te ich'bilic ta cuenta, te soldadohetic awu'un puhquemic bahel ta witsiltic, mayuc mach'a ya stsobticlan tal.

¹⁹ ¡Mayuc spoxil te awehchen, ma xlecub! Spisil te mach'atic ya ya'iybat ac'oblal ya smaj sc'abic yu'un ajihnel, como ¿mach'a a te ma ba c'ax swocol yu'un te achopolile?