Nahúm 2 - Bible in Tzeltal Bachajón

¹ ¡Yac ta talel jinaw ta atojol, Nínive! ¡Chahpana jcananetic ta tulan ahnibal ts'ahc! ¡Ilawil te be! ¡Chuca ach'uht! ¡Tsoba tal spisil awip!

² Como te Jehová ya ya'be xan yutsilal te Jacob, hich te bin ut'il te yutsilal Israel, aunque j'eleq'uetic la spojbeyic sbiluquic soc la sjinic te sc'abc'ab ts'usubiletic yu'une.

³ Tsaj te smahquilic te soldadohetic yu'un, tsaj te sc'u' spaq'uic te winiquetic yu'un guerra. Te carretahetic hich ya xtihlic te bin ut'il c'ahc'; ta sc'ahc'alel te ya yich' chahpanel ya snihc sbahic te ciprés.

⁴ Te carretahetic tulan ya x'ahnimajic ta callehetic, xnilet ya xbehenic ta plazahetic; hich yilelic te bin ut'il tsumbil c'ahq'uetic, hich ya x'ahnimajic te bin ut'il tsantsehwal.

⁵ Ya stsob tal te mach'atic ay yipic, ya sc'ohchin sbahic ta behel talel, ya x'ahnimajic bahel ta ts'ahc, banti ya yich' chahpanel bin ya scoltay sbahic a.

⁶ Ya yich'ic jamticlanel te smahquil te muc'ul-ha', ya xjihn cohel te sna ajwalil.

⁷ Te yihnam te ajwalil ya x'ic'ot bahel ta chuquel, ya yalic mandar te ya xmo bahel, ya yiq'uic bahel te criadahetic yu'un, yaquic ta ahcan a hich te bin ut'il stsuhmutetic, soc yaquic ta smajulanel stahnic a.

⁸ Te Nínive hich ay te bin ut'il yawil ha' te yac ta loq'uel te ya'lele. Hich ya yalic: ¡Tehc'ana abahic, tehc'an abahic! xchihic, pero mayuc mach'a ya yil suhtel.

⁹ ¡Pojahic te plata, pojahic te oro! ¡Mayuc slajibal te c'ulejalil, bayel ta chahp bintic mulantic sba!

¹⁰ Jochol, jimbil, mayuquix bintic ay tey a, lajix yip yo'tanic, ya xnihc te sjol yacanic, c'ux sch'uhtic soc sacuben sit yelawic.

¹¹ ¿Bin ut'il hil te yawil te chojetic, banti canantaybil te alal chojetic, banti la stsob sbahic te tat choj soc te me' choj, soc te alal chojetic, te mayuc mach'a xiwtesot yu'une?

¹² Te choj bayel swe'el la stsacbe te alal chojetic yu'un, la sbutsticlambe te me' chojetic yu'un, noj ta ti'bal te ch'enetic yu'un, noj ta yelec' te yawilique.

Jc'axel ya xlaj Nínive

¹³ ¡Li' ayon yu'un ya jcontrahinat! xchi te Jehová te scuentahinej spisil, ya ca'be sc'ahc'al ya jc'atp'un ta ch'ahil te carretahetic awu'un, soc ya xlaj ta espada te alal chojetic awu'une; ya jtup' te elec' ay ta alumal, soc ma ba ya x'a'iyotix sc'op te jal-c'opetic awu'une.