Levítico 21 - Bible in Tzeltal Bachajón

Ch'uhltesbilic sacerdotehetic

¹ Te Jehová la yalbe te Moisés: Halbeya te sacerdotehetic, ha te snich'nab Aarón, te ma ba ya sbohlobtes sbahic ta scaj te ay jtuhl slumal te cham.

² Teme ma yanuc parte yu'une, ha teme snan o stat, snich'an, sbanquil o yihts'in,

³ swix o yihts'in te ach'ix to, te mayuc smamalal, te sjoquinej to ta nahinel, ya xhu' te bohloben sc'oblal ya xc'oht yu'un stuquel.

⁴ Ma ba ya sbohlobtes sba hich te bin ut'il yantic winiquetic ta pueblo yu'un, te hich bohloben sc'oblal ya xc'oht yu'un.

⁵ Ma me st'axan sjolic, ma me set' sni'il yisimic, soc ma me xyehchentes sbaq'uetalic.

⁶ Ch'uhltesbilic me ta stojol te Dios yu'unic, ma me xyac' bohlobuc sc'oblal te sbihil te Dios yu'unic, como ha ya yaq'uic te chic'bil mahtaniletic ta stojol Jehová, ha te we'elil yu'un te Dios yu'unique. Ha yu'un ya sc'an te ch'ultesbilique.

⁷ Ma xhu' ya xnuhpunic soc j'antsinel-ants o te mach'a yich'oj tsaquel, o te mach'a ihquitaybilix yu'un smamalal, como te sacerdote ch'ultesbil ta stojol te Dios yu'une.

⁸ Ch'ultesbiluc me ya xc'oht awu'un, como ha ya yac' te we'elil yu'un te Dios awu'une. Ch'ultesbiluc me ta atojol, como ho'on, Jehovahon, ch'ul Dioson te ya jch'ultesex.

⁹ Te yantsil-nich'an sacerdote teme ya sbohlobtes sba yu'un te ya xhahch yac' sba ta antsinel, ya sbohlobtesbe sc'oblal te state, ya me yich' chiq'uel.

¹⁰ Te muc'ul sacerdote te ay ta yohlil te yermanotac, te malot ta aceite yu'un ch'ultesel soc te yich'oj ch'ultesel yu'un ya xhu' ya slap te ch'ul c'u'ule, ma me sloq'ues smuhquil sjol soc ma me sch'i' sc'u',

¹¹ ma me x'och ta banti ay mach'a chamen, aunque ha stat o snan, ma xyac' bohlobuc sc'oblal yu'un.

¹² Ma me xloc' ta ch'ul awilal yu'un soc ma me xyac' bohlobuc sc'oblal te ch'ul awilal yu'un te Dios yu'une, como yich'oj malel ta aceite scuenta ch'ultesel yu'un te Dios yu'une. Ho'on, Jehovahon.

¹³ Ya me yic' yihnamin te mach'a ach'ix to.

¹⁴ Ma xhu' ya xnuhpun soc me'ba' ants o te ihquitaybil, te yich'oj tsaquel, o j'antsinel-ants; ya me yic' yihnamin te mach'a ach'ix to te slumal nixe,

¹⁵ scuenta yu'un ma ba ya xbohlob sc'oblal a te sts'umbal ta yohlil te slumale, como ho'on, Jehovahon, te ya jch'ultes, xchi.

Mach'a ma xhu' ya x'och ta sacerdotehil

¹⁶ Te Jehová la yalbe te Moisés:

¹⁷ Halbeya te Aarón: Ni jtuhluc te ats'umbal ta cajalcaj bahel te ay banti ma lecuc sbaq'uetal te ya xnohpoj tal ta yaq'uel te we'elil yu'un te Dios yu'une.

¹⁸ Como mayuc jtuhl winic te ay bin jihnem yu'un te ya xhu' ya xnohpoj tal: teme ts'o'sit, coxo', ay bin jihnem ta sit yelaw o ay bin sobra ta sbaq'uetal,

¹⁹ o winic te c'ajem yoc o c'ajem sc'ab,

²⁰ c'ujul spat, mero com, ay tocal ta sit, ay sac'al chinul, ay spintohil ta snuhculel, o teme t'usem te sbaq'ue.

²¹ Ma me ayuc jtuhluc te sts'umbal sacerdote Aarón te ay bin jihnem yu'un te ya xhu' ya xnohpoj tal ta yaq'uel te chic'bil mahtaniletic ta stojol Jehová. Ay bin jihnem yu'un, ma me xnohpoj tal ta yaq'uel te we'elil yu'un te Dios yu'une.

²² Ya xhu' ya swe' te we'elil yu'un Dios, te bin mero ch'ultesbil soc te bintic ch'ultesbile.

²³ Pero ma xhu' ya xnohpoj ta spat te tsalul pac', soc ma xhu' ya xnohpoj tal ta stojol te scajtajib ta chiq'uel mahtanil, como ay banti ma lecuc sbaq'uetal, scuenta yu'un hich ma ba ya sbohlobtesbe sc'oblal a te ch'ul awilal cu'une, como ho'on, Jehovahon, te ya jch'ultes, xchi.

²⁴ Te Moisés hich la yalbe ya'iyic te Aarón soc te snich'nab soc spisil te snich'nab Israel.