Levítico 20 - Bible in Tzeltal Bachajón

Castigo yu'un bintic ma lecuc ta pasel

¹ Te Jehová la yalbe te Moisés:

² Halbeya te snich'nab Israel: Mach'ayuc winiquil ta Israel, o jyanlum te nahinem ta Israel, teme ya ya'be smahtanin Moloc jtuhluc snich'an, ya me xlaj; ya yich' ch'ojel ta ton yu'un te slumale.

³ Ma lecuc co'tan yu'un te winique, ya jloq'ues bahel ta yohlil te slumal yu'un te la ya'be smahtanin Moloc te snich'ane, hich la yac' bohlobuc sc'oblal te ch'ul templo cu'un soc la yac' jihnuc sc'oblal te jch'ul bihile.

⁴ Teme ya smac sitic te pueblo ta stojol te winic te la ya'be smahtanin Moloc te snich'ane, teme ma ba la smilic,

⁵ ma lecuc co'tan ta stojol te winic soc te mach'atic ay yu'un, ya jloq'ues bahel ta yohlil te slumal soc spisil mach'atic te ha nix hich ya yac' sbahic ta antsinel yu'un Moloc.

⁶ Te mach'a ya xbaht ta stojol te mach'atic ya sc'oponic ch'uhlelal soc mach'atic jna'ojeletic, te ya yac' sbahic ta antsinel ta stojolic c'ohem, ma lecuc co'tan ta stojol te mach'a hich ya spas, ya me jloq'ues bahel ta yohlil te slumale.

⁷ Ch'ultesa abahic, ch'ultesbiluquex me, como ho'on, Jehovahon, te Dioson awu'unique.

⁸ Pasahic te bintic chapal cu'un, a'telinahic me spasel. Ho'on, Jehovahon, te ya jch'ultesex.

⁹ Mach'ayuc a te ya sbohlc'optay stat o snan, ya me xlaj; la sbohlc'optay te stat o snan, ha nix ta scuenta smul te ya xlaje.

¹⁰ Teme ay winic ya yantsimbe yihnam te spat-xuhc, te j'antsiwej soc te j'antsinel ya me xlajic yu'un.

¹¹ Teme ay winic ya xway soc yihnam stat, ya sbohlobtesbe sc'oblal te state; ya me xlajic schebalic, ha nix ta scuentahic te ya xlajique.

¹² Teme ay winic ya xway soc yalib, ya me xlajic schebalic; mero ilobtic sba te bin la spasic; ha nix ta scuentahic te ya xlajique.

¹³ Teme ay mach'a ya xway soc smohlol ta winiquil hich te bin ut'il ya xway soc ants, mero ilobtic sba te bin la spasic; ya me xlajic schebalic, ha nix ta scuentahic te ya xlajique.

¹⁴ Te winic te ya yic' yihnamin jtuhl ants soc snan, mero chopol bin ya spas; ya me yich'ic chiq'uel te winic soc te antsetic, scuenta yu'un mayuc hich schopolil ta awohlilic a.

¹⁵ Teme ay winic ya scuch sba soc chambahlam, ya me xlaj; soc ya me yich' milel te chambahlam.

¹⁶ Teme ay ants te ya yac' sba ta cuchel yu'un chambahlam, ya me amil te ants soc te chambahlam. Ha nix ay ta scuentahic te ya xlajique.

¹⁷ Teme ay winic ya yic' yihnamin swix o yihts'in, teme yantsil-nich'an stat o yantsil-al snan, teme la sjoquin sbahic ta wayel, mero q'uexlaltic sba; ha yu'un ya me yich'ic milel ta stojol te slumale; ha way soc swix o yihts'in, ya me scuch te smule.

¹⁸ Teme ay winic ya xway soc ants ta yorahil yac yilbel schamel, la yilix banti ya xtal schamel te ants, soc ha nix la yac' chicnajuc te antse, schebalic ya me yich'ic loq'uesel bahel ta stojol te slumalique.

¹⁹ Ma me xwayat soc te swix o yihts'in te anan, o te swix o yihts'in te atat, como la abohlobtesbe sc'oblal mach'a ma yanuc parte yu'un, ya me scuch smulic.

²⁰ Teme ay winic ya xway soc yihnam stajun, la sbohlobtesbe sc'oblal te stajun, ya me scuch te smulique; mayuc yal-snich'an a ya xchamic.

²¹ Teme ay mach'a ya yic'be te yihnam sbanquil o yihts'in, ya spas te bin chopol sc'oblal; la sbohlobtesbe sc'oblal te sbanquil o yihts'in; mayuc yal-snich'an ya xhilic.

²² Ch'uhunahic spasel spisil te bintic chapal cu'un soc te bintic caloj ta mandar; a'telinahic spasel, scuenta yu'un ma ba ya xehtayex loq'uel te q'uinal banti ya quiq'uex ochel ta nahinel.

²³ Ma me xapasic te bin ya spasic te nacionetic ya jtenticlan loq'uel ta atojolic; como ha'ic la spasic spisil ini, hich ihlaybil c'ohtic cu'un.

²⁴ Pero hich la jcalbeyex te ha'exe: Ya me awu'untayic te slum sq'uinalic, ho'on ya ca'beyex yu'un yac awu'untayic, ha te q'uinal te banti ya x'oquin leche soc chab. Ho'on, Jehovahon, te Dioson awu'unic te parte la jcaq'uex yu'un te yantic nacionetique.

²⁵ Ha yu'un te ha'exe ya me atsahtayic te bin chambahlamil te lec sc'oblal soc te bohloben sc'oblal, soc te mut te bohloben sc'oblal soc te lec sc'oblale. Ma me xabohlobtes ac'oblalic ta scaj chambahlametic, mutetic soc te chambahlametic te staslajan ya xbehenic ta lum, te parte la jcac' te ha bohloben sc'oblalique.

²⁶ Ch'ultesbiluquex me ta jtojol, como ho'on, Jehovahon, ch'ul Dioson, parte la jcaq'uex yu'un te yantic nacionetic scuenta yu'un ho'on cu'un ya xc'ohex.

²⁷ Te winic o ants te ya sc'opon sch'uhlel mach'atic chamenic o te ya x'ochic ta jna'ojel, ya me xlajic; ya yich'ic ch'ojel ta ton; ha nix ta scuentahic te ya xlajic, xchi te Jehová.