Jueces 8 - Bible in Tzeltal Bachajón

Gedeón ya stsac ajwaliletic yu'un Madián

¹ Te winiquetic yu'un Efraín hich la yalbeyic: ¿Bin a te la apasbotcotic, te ma ba la awic'otcotic bahel te c'alal bahat ta ya'beyel guerra te madianetic? xchihic. Tulan la yutic.

² Pero te Gedeón hich la sjac'be sc'opic: ¿Bin jpasoj ho'on te pajal soc bin la apasic te ha'exe? ¿Ma bal ha'uc lec xan te bin hilem ta yawil ts'usub yu'un Efraín te bin ut'il spisil bin ya xloc' yu'un Abiezer?

³ Dios la ya'beyex ta ac'abic te Oreb soc Zeeb, te príncipaletic yu'un Madián. ¿Bin a te hu' cu'un spasel te pajal soc te bin la apasic te ha'exe? xchi. Hich lahmaj bahel te yilimbahic ta stojol Gedeón te c'alal hich halbotic yu'une.

⁴ Te Gedeón c'oht ta Jordán soc te ho'lajunwinic (300) ta tuhl winiquetic sjoquinej, sohlic bahel, aunque luhbenic, la to snutsic bahel te madianetique.

⁵ Hich la yalbe te winiquetic yu'un Sucot: Awocoluc, a'beyahic jtebuc pan te mach'atic st'unojonic tal, yu'un mero luhbeniquix, te ho'on yacon ta snutsel bahel te Zeba soc Zalmuna, te ajwaliletic yu'un Madián, xchi.

⁶ Te príncipaletic yu'un Sucot hich la sjaq'uic: ¿Ayic balix ta ac'ab te Zeba soc Zalmuna yu'un ya ca'becotic swe'elic te soldadohetic awu'une? xchihic.

⁷ La yal te Gedeón: C'alal Jehová la ya'bonix ta jc'ab a te Zeba soc Zalmuna, ya xtal jot'ticlambeyex abaq'uetalic ta ch'ix soc ch'ix-te'etic ayic ta jochol taquin q'uinal, xchi.

⁸ Hich loc' bahel tey a, mo bahel ta Peniel, hich nix la yalbe. Te mach'atic ayic ta Peniel hich nix la yalic te bin ut'il la yalic te mach'atic ayic ta Sucot.

⁹ Te Gedeón ha nix hich la yalbe te mach'atic ayic ta Peniel: Te c'alal ya suhton tal ta ya'iyel tsalaw, ya me jin cohel te ilo-q'uinal ini, xchi.

¹⁰ Te Zeba soc te Zalmuna ayic ta Carcor soc j'ohlil yoxbahc' scha'pic (15,000) ta tuhl soldadohetic, ha te mach'atic hilemic ta spisil te soldadohetic talemic ta stojol banti ya xloc' tal c'ahc'al, yu'un lajemiquix ho'lajunpic (120,000) soldadohetic.

¹¹ Te Gedeón mo bahel ta be yu'un te mach'atic nahinemic ta nahilpaq'uetic ta stojol banti ya xloc' tal c'ahc'al yu'un Noba soc Jogbeha, och ya'be guerra te campamento, yu'un mayuc jcanan yu'unic.

¹² Te Zeba soc Zalmuna loq'uic ta ahnel, pero te Gedeón la snuts bahel, la stsac te ajwaliletic, hich och xiwel ta yo'tanic spisil te soldadohetique.

¹³ Te Gedeón snich'an Joás, c'alal suht tal ta guerra ta banti mohel yu'un Heres,

¹⁴ la stsac jtuhl querem talem ta Sucot, la yich' ta c'op. Te querem la sts'ihbabe sbihilic te príncipaletic soc mamaletic yu'un Sucot: huclajuneb schanwinic (77) ta tuhl.

¹⁵ Ha yu'un och ta Sucot te Gedeón, hich la yalbe te mach'atic ayic ta pueblo: Li' ayic te Zeba soc Zalmuna te la alabanonic yu'un, te hich la awalic: ¿Ayic balix ta ac'ab te Zeba soc Zalmuna yu'un te ya ca'becotic swe'elic te luhben winiquetic awu'unic? xchi.

¹⁶ Hich te Gedeón la stsac ch'ix soc ch'ix-te'etic yu'un te jochol taquin q'uinal, la yac'ticlambe castigo a te mamaletic yu'un Sucot.

¹⁷ Ha nix hich la sjimbe cohel te ilo-q'uinal yu'un Peniel soc la smilticlan te mach'atic ayic ta pueblo.

¹⁸ Patil la sjoc'obe te Zeba soc Zalmuna: ¿Bin yilel te winiquetic la amilic ta Tabor? la yut. Hich yilelic te bin ut'il ha'at; jujutuhl hich yilel te bin ut'il snich'an ajwalil, xchihic.

¹⁹ Ha yu'un hich awon te Gedeón: ¡Ha te jbanquiltac, ha yalatac te jnane! ¡Yiloj Jehová, te ha'uc cuxul hilel awu'unic, ma ba ya jmilex te hichuque! xchi.

²⁰ Hich la yalbe te Jeter te sba-nich'an: Hahchan, milticlana, xchi. Pero te querem ma ba la sloq'ues te espada, yu'un ay xiwel ta yo'tan, como querem to.

²¹ Ha yu'un la yalic te Zeba soc te Zalmuna: Milawotcotic ha'at; yu'un hich te bin ut'il ay te winic, hich ay te yipe, xchihic. Hich hahch te Gedeón, la smilticlan te Zeba soc Zalmuna; soc la yich'be te sch'ahlel te ha yach'il u yilel te ay ta snuc' te camellohetic yu'une.

²² Te snich'nab Israel hich la yalbeyic te Gedeón: Ajwalil cu'uncotic me ya xc'ohat soc anich'an soc amam, te bin ut'il la acoltayotic loq'uel ta sc'ab Madián, xchihic.

²³ Pero la sjac' te Gedeón: Ma ajwalilucon ya xc'ohon awu'unic, ni ha'uc te jnich'an, ha me Ajwalil awu'unic ya xc'oht te Jehová, xchi.

²⁴ Soc la yal xan: Ay bin ya jc'ambeyex: jujutuhlex a'bonic te staq'uinal chiquinil te la apojic, xchi. (Yu'un ay staq'uinal chiquiniletic pasbilic ta oro, como ha'ic ismaeletic.)

²⁵ Hich la sjaq'uic: Jun co'tan ya ca'batcotic, xchihic. Hich la slimic pac', tey la sch'ojic a te staq'uinal chiquiniletic la spojic talel.

²⁶ Te yalal te staq'uinal chiquiniletic te la sc'ambe, ha ho'winic yo'bahc' (1,700) siclohetic yu'un oro; ma ba la yich' ahtayel stuquel spisil ta chahp te yantic sch'ahlelalic te ha yach'il u yilelic soc te chi'in-yax c'u'ul paq'uetic te yich'ojic te ajwaliletic yu'un Madián, soc te yuhal snuc' te camellohetic yu'unique.

²⁷ Te Gedeón la spas ta efod te la yac' ta slumal ta Ofra. Spisil Israel la yac' sbahic ta antsinel c'ohem ta stojol te efod tey a. Ha sc'ohchinojibal c'oht yu'un te Gedeón soc spisil mach'atic ay yu'un ta sna.

²⁸ Hich tsalotic yu'un Israel te madianetic, mayuc bin ora la stoy xan sjolic. Lamal q'uinal cha'winic (40) ha'bil te jayeb c'ahc'al cuxul te Gedeón.

Cham Gedeón

²⁹ Patil te Jerobaal snich'an Joás baht ta nahinel ta sna.

³⁰ Ay lajuneb schanwinic (70) ta tuhl snich'nab, como ay bayel ta tuhl antsetic yu'un.

³¹ Soc ay yan ants yu'un ta Siquem te la yalataybe jtuhl squerem-nich'an, te la ya'be sbihilin Abimelec.

³² Mamalix a cham te Gedeón snich'an Joás, la yich' muquel ta smuquenal Joás te stat te ay ta Ofra yu'un te abiezeretic.

³³ Pero te c'alal chamenix a te Gedeón, te snich'nab Israel suhtic xan yac'bel sbahic ta antsinel c'ohem ta stojol te baaletic, soc la sdiosinic te Baal-berit.

³⁴ Te snich'nab Israel ma ba la sna'iquix te Jehová te Dios yu'unic te coltayotic loq'uel ta sc'ab yu'un spisil scontrahic ta sjoyobalic.

³⁵ Soc mayuc yutsil yo'tanic ta stojol te mach'atic ay yu'un te sna Jerobaal, ha te Gedeón, aunque bayel te bintic lec la spasbe te Israel.