Jueces 7 - Bible in Tzeltal Bachajón

Gedeón ya stsal te madianetic

¹ Te Jerobaal, ha te Gedeón, soc spisil te mach'atic sjoquinej, sab hahchic soc baht spas scampamentohic ta sloq'uib-ha' yu'un Harod. Te campamento yu'un te madianetic hil ta stojol norte ta spamlej ta nopol te tsehl yu'un More.

² Te Jehová hich la yalbe te Gedeón: Mero bayel winiquetic sjoquinejat yu'un te ya ca'beyex ta ac'abic te madianetic, ya wan stoy sbahic ta jtojol te Israel, hich wan ya yalic: Hu' cu'untic la jcoltay jbahtic, xchihic wan.

³ Ha yu'un halbeya te pueblo: Te mach'a ya xiw soc ya xnihc yo'tan ac'a yihquitay hilel te wits Galaad, ac'a suhtuc bahel ta sna, xchi. Hich suhtic bahel cha'pic soc ho'lajunbahc' (22,000) winiquetic, pero hil xan jpic soc ho'bahc' (10,000) ta tuhl.

⁴ La yal xan te Jehová: Mero bayelic to; ic'ticlana bahel ta ha', tey ya jpas ta prueba quil a. Te mach'a hich ya calbat sc'oblal: Ac'a sjoquinat bahel ini, teme xchihone, ha me ya sjoquinat bahel; pero te mach'a ya calbat sc'oblal: Ma ba ya sjoquinat bahel ini, teme xchihone, ma ba ya xbaht stuquel, xchi.

⁵ Ha yu'un te Gedeón la yic' bahel te winiquetic ta ha', hich halbot yu'un te Jehová: Mach'ayuc a te ya slec' ha' ta yac' hich te bin ut'il ts'i', parte me xawac'. Ha nix hich parte xawac' mach'ayuc a te ya squejan sbahic ta yuch'el ha', xchi.

⁶ Te jayeb la sleq'uic ha' te la sloch' mohel ta sc'abic, ha ho'lajunwinic (300) ta tuhl; te yantique la squejan sbahic ta yuch'el te ha'e.

⁷ Ha yu'un te Jehová la yalbe te Gedeón: Ta scuenta te ho'lajunwinic (300) ta tuhl winiquetic te la sleq'uic ha' ya jcoltayex soc ya ca'beyex ta ac'abic te madianetique. Ac'a suhticuc ta snahic spisil te yantique, xchi.

⁸ Hich te Gedeón la yich'be hilel te biluquetic soc te xulubiletic yu'unic, la sticonlan bahel spisil te snich'nab Israel ta snahilpaq'uic, pero la yac' ya xhilic te ho'lajunwinic (300) ta tuhl winiquetic. Te campamento yu'un te madianetic hil ta ahlan ta spamlej.

⁹ Ta ahc'abal nix, te Jehová hich la yalbe: Hahchan, cohan bahel ta ya'beyel guerra te campamento, yu'un la jca'batix ta ac'ab.

¹⁰ Teme ya xiwat te ya xcohat bahel, cohan bahel soc te awa'bat Fura,

¹¹ ya me awa'iy bin ya yalic. Hich me ya yich' yip awo'tan te ya xcohat bahel ta ya'beyel guerra, xchi. Hich te Gedeón co bahel soc te ya'bat Fura c'alal ta ti'campamento banti ay jcanan-soldadohetic.

¹² Te madianetic, amalequetic soc te mach'atic talemic ta stojol banti ya xloc' tal c'ahc'al spucoj sbahic ta spamlej hich te bin ut'il ipal c'ulubetic, soc te camellohetic yu'unic ma hu' ta ahtayel hich te bin ut'il shi'al sti'il mar.

¹³ Ta mero yorahil te c'oht tey a te Gedeón ay jtuhl winic yac ta yalbeyel ya'iy swayich te smohlol, hich la yal: Ay jwayich. La jquil jpehch pan pasbil ta cebada te stselet tal ta campamento yu'un Madián, c'oht ta nahilpac', la smaj, puch' yu'un; la sbot'q'uin, hich laj te nahilpac', xchi.

¹⁴ Hich la sjac' te smohlol: Mayuc bin yan scuentahil, ha nix te espada yu'un Gedeón snich'an Joás, te israel-winic. Dios ya'beyej ta sc'ap Gedeón te madianetic soc spisil te campamento, xchi.

¹⁵ Te Gedeón c'alal la ya'iybe sc'oblal te wayichil soc te bin scuentahile, la squejan sba ta stojol Dios. Patil suht bahel ta campamento yu'un Israel soc la yal: Hahchanic, como te Jehová la ya'beyexix ta ac'abic te campamento yu'un Madián, xchi.

¹⁶ Te Gedeón la yac' ta oxchahp te ho'lajunwinic (300) ta tuhl winiquetic, la yac'ticlambe xulubil ta spisilic, soc jochol q'uibetic te yac ta tihlel c'ahc' ta yutile.

¹⁷ Hich la yalbe: Ilawonic soc hich me xapasic te bin ya jpas ho'on. C'alal ya xc'ohon ta sti'il te campamento, hich me xapasic te bin ya jpas te ho'one.

¹⁸ C'alal ya coq'uesin xulubil, soc nix te mach'atic ya sjoquinon, ya me awoq'uesinic te xulubiletic ta sjoyobal ta spisil te campamento, soc awonanic: ¡Ta scuenta Jehová soc ta scuenta Gedeón! xchihex me ta aw.

¹⁹ Hich te Gedeón soc te ho'winic (100) ta tuhl winiquetic sjoquinejic c'ohtic ta sti'il te campamento ta yorahil a te ya sjel sbahic ta j'ohlil ahc'abal te jcananetic. La yoq'uesinic te xulubiletic soc la swuyic te q'uibetic yich'ojic ta sc'abique.

²⁰ Ta yoxchahpalic la yoq'uesinic te xulubiletic soc la swuyic te q'uibetic, la stsaquic ta sq'uexam-c'abic te sc'ahq'uic soc ta swa'el-c'abic te xulubiletic te ya yoq'uesinic, soc hich awonic: ¡Ta scuenta te espada yu'un Jehová soc Gedeón! xchihic ta aw.

²¹ Te snich'nab Israel tey nix hilic a ta banti tec'ajtic ta sjoyobal te campamento, spisil te soldadohetic yu'un Madian awonic soc loq'uic ta ahnel.

²² C'alal yacalic ta yoq'uesinel xulubiletic a te ho'lajunwinic (300) ta tuhl winiquetic, te Jehová la yac'ticlambe smil sbahic ta spisil te campamento. Soc te soldadohetic loq'uic bahel ta ahnel c'alal ta Bet-sita, ta stojol Zerera, ha to ta sti'il sq'uinal Abel-mehola ta nopol Tabat.

²³ La yich'ic iq'uel tal te winiquetic yu'un Israel, ha ta Neftalí, Aser soc spisil Manasés, la snutsic bahel te madianetique.

²⁴ Soc te Gedeón la sticon bahel winiquetic ta spisil witsiltic yu'un Efraín te hich la yalic: Cohanic tal ta ya'beyel guerra te madianetic; macahic te banti ya xhu' ta teq'uel ha' ta Bet-bara soc ta muc'ul-ha' Jordán te c'alal ma to xc'ohtic tey a, xchihic. Hich la stsob sbahic spisil te winiquetic yu'un Efraín, la smaquic te banti ya xhu' ta teq'uel ha' ta Bet-bara soc ta muc'ul-ha' Jordán.

²⁵ La stsaquic cheb príncipaletic yu'un te madianetic, ha te Oreb soc Zeeb. La smilic te Oreb ta muc'ul ton yu'un Oreb, soc te Zeeb la smilic ta sp'e'ojibal sts'usub Zeeb. C'alal laj yo'tanic ta snutsel te madianetic, la yich'beyic tal sjol te Oreb soc Zeeb ta stojol Gedeón te ay ta jehch ha' Jordán.