Jueces 5 - Bible in Tzeltal Bachajón

Sc'ayoj Débora soc Barac

¹ Ta hich ora hich la yalic ta c'ayoj te Débora soc te Barac snich'an Abinoam:

² Te bin ut'il ha nahilij te j'ic'awetic yu'un guerra ta Israel, te bin ut'il jun yo'tan la yac' sbahic te pueblo, halbeyahic wocol Jehová yu'un.

³ ¡A'iya awa'iyic, ajwaliletic! ¡A'iya awa'iyic, príncipaletic! Ya jc'ayojtay te Jehová, ya jc'ayojtay c'ayojetic ta stojol Jehová te Dios yu'un Israel.

⁴ Te c'alal loc'at tal ta Seir, Jehová, c'alal behenat tal ta sq'uinal Edom, nihc te lum, nihc te ch'ulchan, soc la yaq'uic cohel tal ha'al te tocaletique.

⁵ Nihquic te witsiltic ta stojol Jehová, nihc te Sinaí ta stojol Jehová te Dios yu'un Israel.

⁶ Ta yorahil te Samgar snich'an Anat, ta yorahil te Jael, jochol hilic te behetic, como te jbeheletic behenic ta chuhcul behetic.

⁷ Jochol hilic te tut pueblohetic ta Israel, pehc'ajic ha to c'alal hahchon ho'on, Deborahon, hahchon scuenta snan Israel.

⁸ C'alal la stsahic yantic diosetic, hulix guerra a ta yochibal te pueblohetic; ma ba chicnaj mahquilal o lanza ta yohlil ho'pic (40,000) ta tuhl ta Israel.

⁹ Ayex ta co'tan, jtsobawex yu'un Israel, soc te mach'atic ta yohlil te pueblo te jun yo'tanic la yac' sbahic. ¡Halbeyahic wocol te Jehová!

¹⁰ Ha'ex te ya xmohex ta saquil burrahetic, ha'ex te huculex ta chahpanwanej, soc ha'ex te ya xbehenex ta awoquic, c'opojanic.

¹¹ Namal ta banti ay sc'op te j'ac'-t'ihmalte'etic, ta yohlil te yuch'ojibal-ha' chambahlametic, tey ya sc'ayojtayic a te tsalaw yu'un Jehová, te tsalaw yu'un te tut pueblohetic yu'un ta Israel. Hich te pueblo yu'un Jehová ya xbehen bahel ta stojol te yochibal te pueblo.

¹² ¡Cuxa awo'tan, cuxa awo'tan, Débora! ¡Cuxa awo'tan, cuxa awo'tan, c'ayojtaya c'ayoj! ¡Hahchan, Barac, ic'a bahel te jchuqueletic awu'un, ha'at snich'anat Abinoam!

¹³ Hich cohic tal te mach'a hilemic yu'un te mach'a ich'bilic ta muc'; te pueblo yu'un Jehová behenic bahel ta scuenta, ta scontrahinel te mach'atic ay yipique.

¹⁴ Ta Efraín talic te mach'atic nahinemic ta Amalec, talic ta apat, Benjamín, ta yohlil alumal. Ta Maquir cohic tal príncipaletic, soc ta Zabulón te mach'atic ay sbastonic.

¹⁵ Ha nix hich la sjoquinic Débora te jtsobawetic yu'un Isacar; te Isacar jun yac'oj sba soc Barac, ahnimal la st'un bahel ta spamlej. Ta yohlil te jujuchahp sna Rubén ay bayel bintic la snop ta yo'tanic.

¹⁶ ¿Bin yu'un te hilic ta corraletic ta ya'iybeyel yiq'uel te tuminchijetique? Ta yohlil te jujuchahp sna Rubén ay bayel stsahtayel yo'tanic.

¹⁷ Te Galaad hil ta jehch Jordán; te Dan, ¿bin yu'un hil ta banti te barcohetique? Te Aser hil ta sti'il mar, hil ta banti ya x'ochic barcohetic.

¹⁸ Te pueblo yu'un Zabulón chapal yu'unic ya yac' sbahic ta lajel, hich te bin ut'il Neftalí ta banti toyol witsiltic.

¹⁹ Tal ta yaq'uel guerra ajwaliletic; te ajwaliletic yu'un Canaán talic ta yaq'uel guerra ta Taanac ta nopol ha'etic yu'un Meguido, pero mayuc taq'uin la stahic.

²⁰ C'alal ch'ulchan la yaq'uic guerra te eq'uetic, c'alal ta sbehic la ya'beyic guerra te Sísara.

²¹ Te snojel ha' Cisón la smesticlan bahel, te antiguo snojel ha', te snojel ha' Cisón. ¡Behenan, jch'uhlel, soc awip!

²² Tulan xc'ojlajan slots' te cawuhetic, ahnimajic, ahnimajic bahel te muc'ul cawuhetic yu'unic.

²³ ¡C'ambeyahic chopol c'oblalil te Meroz! xchi te ch'ul a'bat yu'un Jehová, c'ambeyahic tulan chopol c'oblalil te mach'atic nahinemic tey a, xchi; como ma ba tal scoltayic te Jehová, ma ba tal scoltay Jehová ta scontrahinel te mach'atic ay yipique.

²⁴ Bayel me yutsil Jael ta yohlil te antsetic, te yihnam Heber te queneo-winic; bayel me yutsil ta yohlil te antsetic ya xnahinic ta nahilpac'.

²⁵ Te Sísara la sc'an yuch' ha', pero te Jael la ya'be yuch' leche; la ya'be crema ta t'ujbil taza yu'un mach'a ich'bilic ta muc'.

²⁶ Te Jael la stsac te ts'apbil yich'o-ip yu'un nahilpac', ta swa'el sc'ab la stsac te martillo yu'un j'a'teletic, la smaj te Sísara, la yehchentesbe sjol, la shutbe, jc'axel la slajimbe xuhc' schiquin.

²⁷ Yahl cohel ta ye'tal yoc, tey metsel hilel; yahl cohel ta ye'tal yoc; te banti yahl cohel, tey nix laj a.

²⁸ Te snan Sísara ya yil ta ventana, ta ventana hich ya x'awon: ¿Bin yu'un ma xtal ta ora te carreta yu'une? ¿Bin yu'un ma xchicnaj sc'op te carretahetic yu'un? xchi.

²⁹ Ya sjaq'uic te p'ijil antsetic yu'un, soc ha nix ya suhtbe sba sc'op:

³⁰ ¿Ma bal ha'uc la stahic pojbil biluquetic soc yaquic ta spucticlanel? ha jtuhl o cha'tuhl ach'ix yu'un te jujutuhle; yu'un Sísara te bombil paq'uetic, bombil paq'uetic te ch'albilic ta ts'isel; te bombil paq'uetic ch'albilic ta ts'isel ta jehch ta jehch, yu'un snehquelic te jtsalawetique, xchi.

³¹ Hich me ac'a lajuc spisil acontratac, Jehová; yan te mach'atic c'uxat ta yo'tanic, hichuc me te bin ut'il te c'ahc'al c'alal ya xloc' tal soc yip, xchihic ta c'ayoj. Cha'winic (40) ha'bil lamal te q'uinale.