Jueces 4 - Bible in Tzeltal Bachajón

Débora soc Barac la stsalic Sísara

¹ C'alal chamenix a te Aod, te snich'nab Israel suhtic xan ta spasel te bin chopol ta stojol Jehová.

² Ha yu'un te Jehová la ya'be ta sc'ab Jabín ajwalil yu'un Canaán te la ya'iy cuentahinwanej ta Hazor. Te jtsobaw yu'un te soldadohetic yu'un, Sísara sbihil, nahinem ta Haroset-goim.

³ Ha yu'un te snich'nab Israel awonic ta stojol Jehová, como te Jabín ay ho'winic yoxbahc' (900) carretahetic yu'un te pasbilic ta taq'uin soc ay jtahb (20) ha'bil te la ya'be tulan swocol te snich'nab Israel.

⁴ Ha yorahil a te ay jtuhl ants te la scuentahin Israel, Débora sbihil, ha jalwanej, yihnam Lapidot.

⁵ Ya shuhcanlan sba ta ye'tal xahn yu'un Débora te ay ta ohlil yu'un Ramá soc Bet-el, ta witsiltic yu'un Efraín; te snich'nab Israel ya xbahtic ta stojol ta schahpanel te c'opetic yu'unique.

⁶ Te Débora la sticon ta iq'uel tal jtuhl winic Barac snich'an Abinoam te ay ta Cedes ta Neftalí, hich la yalbe: Hich ya spasat ta mandar te Jehová te Dios yu'un Israel: Bahan, tsoba te winiquetic awu'un ta wits Tabor, ac'a sjoquinat bahel jpic soc ho'bahc' (10,000) ta tuhl yu'un te jchahp yu'un Neftalí soc te jchahp yu'un Zabulón.

⁷ Ya quic' tal ta atojol ta uc'um Cisón te Sísara, te capitán yu'un te soldadohetic yu'un Jabín, soc te carretahetic soc soldadohetic yu'un, ya ca'bat ta ac'ab, xchi.

⁸ Hich la sjac' te Barac: Ya xbohon teme yac ajoquinon bahel te ha'ate. Yan teme ma ba yac ajoquinon bahel, ma ba ya xbohon, xchi.

⁹ Ya joquinat bahel; pero ma ba ya x'ich'otat ta muc' yu'un te bin yac apas, como te Jehová ya me yac' ta sc'ab jtuhl ants te Sísara, xchi. Hich te Débora baht soc Barac ta Cedes.

¹⁰ Te Barac tey la stsob tal te jchahp yu'un Zabulón soc yu'un Neftalí. Mo bahel soc te jpic soc ho'bahc' (10,000) ta tuhl winiquetic te ayic ta scuenta, soc joquinot bahel yu'un te Débora.

¹¹ Te Heber, te queneo-winic, te ha sts'umbal Hobab, snihal-mamal Moisés, ayix ora te loq'uem ta stojol te queneohetic soc te spasoj scampamento ta banti te jihte' ta Zaanaim, ta nopol Cedes.

¹² C'alal la ya'iy te Sísara te mohemix bahel ta wits Tabor te Barac snich'an Abinoam,

¹³ la stsob spisil te carretahetic yu'un, ha ho'winic yoxbahc' (900) carretahetic pasbilic ta taq'uin, soc la stsob spisil te winiquetic te sjoquinej, c'alal Haroset-goim ha to ta uc'um Cisón.

¹⁴ Ha yu'un te Débora la yalbe te Barac: Hahchan, como ha'i c'ahc'al ini te Jehová la ya'batix ta ac'ab te Sísara. Nahilijem bahel awu'un te Jehová, xchi. Hich te Barac co tal ta wits Tabor soc te jpic soc ho'bahc' (10,000) winiquetic te t'umbil yu'une.

¹⁵ Te Jehová la sten bahel ta espada te Sísara soc spisil carretahetic soc soldadohetic yu'un ta stojol Barac. Te Sísara co ta scarreta, baht ta ahnel ta yoc,

¹⁶ pero te Barac la snuts bahel te carretahetic soc soldadohetic c'alal ta Haroset-goim. Ta hich ora spisil te soldadohetic yu'un Sísara lajic ta espada, ni jtuhluc cuxul hil.

¹⁷ Te Sísara ta yoc ahn bahel ta snahilpac' Jael, yihnam Heber te queneo-winic, yu'un ha lamal q'uinal soc Jabín ajwalil yu'un Hazor soc te mach'atic ay yu'un Heber te queneo-winic.

¹⁸ C'alal loc' tal te Jael ta stahel te Sísara, hich la yalbe: La', cajwal, ochan, ma xiwat, xchi. Hich och bahel ta snahilpac', te Jael la smuc ta pac'.

¹⁹ Hich la yal te Sísara: Awocoluc, a'bon cuch' jtebuc ha', mero taquin co'tan, xchi. Hich te Jael la sjambe sti'il yawil leche pasbil ta nuhcul, la ya'be yuch', la smuc xan ta pac'.

²⁰ Te Sísara la yalbe te Jael: Tey xatehc'an aba ta sti'il nahilpac'; teme ay mach'a ya xtal sjoc'obat: ¿Ay bal mach'a li' ayi? teme xchihe, Mayuc, xchihan me, xchi.

²¹ Pero te Jael te yihnam Heber la stsac ts'apbil yich'o-ip nahilpac' soc la stsac tal martillo, muquen nohpoj bahel, la smajbe cohel te te' ta xuhc' schiquin c'alal ta lum, como bayel swayel te Sísara yu'un bayel luhben; hich laj.

²² C'alal c'oht te Barac ta slehel te Sísara, te Jael loc' bahel ta stahel, hich la yalbe: La', ya ca'bat awil te winic yacat ta slehel, xchi. Te Barac och bahel ta banti ay te ants, lajemix a c'oht sta te Sísara, ts'apal ta xuhc' schiquin te yich'o-ip nahilpac'.

²³ Ha yorahil a te Dios la yac' pehc'ajuc yip te Jabín ajwalil yu'un Canaán ta stojol te snich'nab Israel.

²⁴ Hich te snich'nab Israel xquechcon ta tulanijel ta scontrahinel te Jabín ajwalil yu'un Canaán ha to c'alal la slajinic.