Jueces 2 - Bible in Tzeltal Bachajón

Te ch'ul a'bat yu'un Jehová ta Boquim

¹ Te ch'ul a'bat yu'un Jehová loc' tal ta Gilgal, baht ta Boquim, hich la yal: Ho'on la jloq'uesex tal ta Egipto soc la jquiq'uex tal ta q'uinal te la jcalbe ta jamal te ame'atatic te ya ca'be, hich la jcalbe: Mayuc bin ora ya jlajimbe sc'oblal te chapbil-c'op cu'un ta atojolic;

² te ha'exe ma me xachap ac'opic soc te mach'atic nahinemic ta q'uinal ini, ya me ajimbeyic te scajtajib ta chiq'uel mahtaniletic yu'unic, xchihon. Pero ma ba la awa'iybonic te jc'ope. ¿Bin yu'un hich la apasic?

³ Ha yu'un hich ya cal: Ma ba ya jloq'ueslan bahel ta atojolic, hich ya xc'ohtic te bin ut'il ch'ix ta amochbaquel, soc te diosetic yu'unic ha ac'ohchinojibalic ya xc'ohtic, xchi.

⁴ C'alal laj yo'tan ta c'op te ch'ul a'bat yu'un Jehová, spisil te snich'nab Israel hahchic ta tulan aw ta oq'uel.

⁵ Ha scuentahil Boquim c'oht sbihil yu'unic te lugar. Tey la ya'beyic milbil mahtaniletic te Jehová.

Cham Josué

⁶ C'alal la yac' bahel te pueblo te Josué, te snich'nab Israel baht yu'untayic te q'uinal te c'oht ta scuentahic jujuchahp.

⁷ Te pueblo yac'oj sbahic ta a'batinel yu'un Jehová te jayeb c'ahc'al cuxul te Josué, soc te jayeb xan c'ahc'al cuxulic hilel yu'un Josué te mamaletic te la yilic te bintic muc' la spasbe Israel te Jehová.

⁸ Cham te Josué snich'an Nun, te a'bat yu'un Jehová, te c'alal ay lajuneb swacwinic (110) ya'bilal a.

⁹ La smuquic ta sq'uinal ta Timnat-sera, ta witsiltic yu'un Efraín, ta stojol norte yu'un te wits Gaas.

¹⁰ Soc ha nix hich chamic spisil te mach'atic pajal scolelic soc; pero te patil al-nich'anetic ma ba la sna'beyic sba te Jehová soc te bintic la spas ta stojol Israel.

Israel ya yihquitay Jehová

¹¹ Ta patil, te snich'nab Israel la spasic te bin chopol ta stojol Jehová, la yac' sbahic ta a'batinel yu'un te baaletic.

¹² La yihquitayic te Jehová te Dios yu'un te sme'static te loq'uesotic tal yu'un ta sq'uinal Egipto, la st'unic bahel yantic diosetic yu'un te pueblohetic te ayic ta sjoyobalic; la squejan sbahic ta stojolic, hich la shachbeyic yilimba te Jehová.

¹³ La yihquitayic te Jehová, la sch'uhuntayic te Baal soc te Astarot.

¹⁴ Ha yu'un tihl yilimba Jehová ta stojol Israel, hich ac'otic ta sc'ab j'eleq'uetic te talic ta pojbeyel sbiluquic, soc chonticlanotic bahel ta stojol te scontrahic te ayic ta sjoyobal, te ma ba hu'ix yu'unic stsalele.

¹⁵ Bayuc banti bahtic ta yaq'uel guerra, contrahinotic yu'un te sc'ab Jehová yu'un ya ya'be swocolic, hich te bin ut'il yaloj te Jehová soc te jc'axel yaloj ta jamal. Ay bayel swocolic.

¹⁶ Te Jehová la yac' chicnajuc juecetic te la scoltayic loq'uel ta sc'ab te mach'atic la spojbeyic bintic ay yu'unic.

¹⁷ Pero ma ba la yich'ic ta cuenta te juecetic yu'unic, la st'unic bahel yantic diosetic, te ha la sch'uhuntayic. Ora nax la yihquitayic hilel te be banti behenic te sme'static te la sch'uhumbeyic te mandariletic yu'un Jehová; yan stuquelic ma hichuc la spasic.

¹⁸ Te c'alal ya yac' chicnajuc juecetic te Jehová, joquimbil yu'un Jehová te juez, soc ya scoltay loq'uel ta sc'ab scontrahic te jayeb c'ahc'al cuxul te juez; como te Jehová ya sna'be yo'bolil sbahic c'alal ya ya'iybe yacanic yu'un te mach'atic uts'inotic soc te a'botic swocolic yu'une.

¹⁹ Pero te c'alal ya xcham te juez, ya suht ta spatic, c'ax hich a te bin ut'il sme'static; ya st'unic yantic diosetic yu'un ya yac' sbahic ta a'batinel yu'un soc ya squejan sbahic ta stojolic. Ma ba ya yihquitayic te bin yac spasbelic o te tulan stalelique.

²⁰ Ha yu'un tihl yilimba Jehová ta stojol Israel, hich la yal: Te bin ut'il te pueblo ini yac sc'axuntaybel te c'op jchapoj soc te sme'static, soc te ma ba ya sch'uhumbonic te jc'ope,

²¹ ha nix hichon ma ba ya jtembe loq'uel ta stojolic jchahpuc te nacionetic te hilic yu'un Josué te c'alal cham.

²² Hich ya jpas ta prueba te Israel teme ya st'unic o ma ba ya st'unic te be yu'un Jehová, hich te bin ut'il la st'unic te sme'statique, xchi.

²³ Ha scuentahil te Jehová la yihquitay hilel te nacionetic, ma ba ora nax la stenticlan loq'uel, soc ma ba la yac'ticlambe ta sc'ab te Josué.