Jueces 12 - Bible in Tzeltal Bachajón

¹ Te winiquetic yu'un Efraín la stsob sbahic, c'axic bahel ta Safón soc hich la yalbeyic te Jefté: ¿Bin yu'un te la awa'be guerra te snich'nab Amón, te ma ba la awic'otcotic yu'un ya joquinatcotic? ¡Ya me jchic'atcotic soc ana! xchihic.

² Hich la sjac' te Jefté: Te ho'on soc te jlumal ay tulan c'op cu'uncotic soc te amonetique. La jquiq'uex pero ma ba tal acoltayonic loq'uel ta sc'abic.

³ C'alal la jquil te ma ba yac acoltayonic, la jloq'ues jba ta co'tan soc jcuxlejal, la jca'be guerra te amonetic, te Jehová la ya'bon ta jc'ab. ¿Bin yu'un hiche te tal awa'bonic guerra yo'tic te ha'exe? xchi.

⁴ Ha yu'un te Jefté la stsob spisil te winiquetic yu'un Galaad, la ya'be guerra te Efraín. Te winiquetic yu'un Galaad la stsalic te Efraín, como hich yalojic te efrainetic: Ha'ex galaad-winiquex te ya xnahinex ta yohlil te Efraín soc Manasés, la awihquitayiqux hilel te Efraín, xchihic.

⁵ Te winiquetic yu'un Galaad la yich'ic te banti ya xhu' ta teq'uel te muc'ul-ha' Jordán te ya xbahtic ta Efraín. Te mach'atic yu'un Efraín te yaquic ta ahnel bahel, c'alal ya yalic: Ac'awon sohlel, teme xchihique, te winiquetic yu'un Galaad ya sjoc'obeyic: ¿Ha'at bal efrain-winicat? xchihic. Teme ya yal te ma ha'uc,

⁶ ya yalbeyic: Hala jca'iycotic ‘Shibolet’, xchihic. Teme ya yal ‘Sibolet’, teme xchihe, ta scaj te ma xhu' yu'un te toj ya yale, ya stsaquic soc ya smilic ta banti ya xhu' ta teq'uel te Jordán. Hich lajic ho'pic soc ho'bahc' (42,000) ta tuhl yu'un Efraín.

⁷ Te Jefté waqueb ha'bil ay ta juez yu'un Israel. Cham te Jefté, te galaad-winic, la yich' muquel ta jun pueblo yu'un Galaad.

Yantic juecetic ta Israel: Ibzán, Elón, soc Abdón

⁸ Ta patil och ta juez yu'un Israel te Ibzán te talem ta Belén.

⁹ Ay lajuneb scha'winic (30) ta tuhl squerem-nich'nab soc lajuneb scha'winic (30) ta tuhl yantsil-nich'nab. Te yantsil-nich'nab la yac' nuhpunuc soc winiquetic te q'uejel talemic; te squerem-nich'nab la yac'ticlambe yic' lajuneb scha'winic (30) ach'ixetic te q'uejel talemique. Huqueb ha'bil ay ta juez yu'un Israel.

¹⁰ Cham te Ibzán, la yich' muquel ta Belén.

¹¹ Ta patil och ta juez yu'un Israel te Elón te zabulón-winic. Ha juez c'oht yu'un Israel lajuneb ha'bil.

¹² Cham te Elón te zabulón-winic, la yich' muquel ta Ajalón ta sq'uinal Zabulón.

¹³ Patil och ta juez yu'un Israel te Abdón snich'an Hilel, te piratón-winic.

¹⁴ Ay cha'winic (40) ta tuhl queremetic soc ay lajuneb scha'winic (30) ta tuhl smamatac te mohic ta lajuneb schanwinic (70) ta coht burro. Ha juez yu'un Israel waxaqueb (8) ha'bil.

¹⁵ Cham te Abdón snich'an Hilel, te piratón-winic, la yich' muquel ta Piratón te ay ta sq'uinal Efraín, ta witsiltic yu'un Amalec.