San Juan 6 - Bible in Tzeltal Bachajón

Jesús la smac'lin lajunwinic yoxlajunbahc' (5,000) ta tuhl

¹ Patil te Jesús c'ax bahel ta jehch mar yu'un Galilea, te mar yu'un Tiberias yan sbihile.

² Bayel ants-winiquetic la st'unic bahel yu'un la yilic te señahiletic la spasbe te jchameletique.

³ Ha yu'un mo bahel ta wits te Jesús, tey huhcaj soc a te jnopojeletic yu'un.

⁴ Nopol sta yorahil Q'uin Pascua yu'un te judíohetique.

⁵ C'alal la shach sit te Jesús soc la yil te talemic ta stojol tsobol ants-winiquetic, hich la yalbe te Felipe: ¿Banti ya jmantic pan yu'un ya ca'betic swe'ic? xchi.

⁶ Pero hich la yal yu'un ya ya'iybe yo'tan, como sna'oj stuquel te bin ya x'och spase.

⁷ La sjac' te Felipe: Ma tic'uc ya xwe'ic jujutebuc a ta lajunwinic (200) denario pan, xchi.

⁸ Ay jtuhl jnopojel yu'un, Andrés sbihil, yihts'in Simón Pedro, la yalbe:

⁹ Li' ay jtuhl querem te yich'oj ho'pehch pan pasbil ta cebada soc cha'coht bic'tal chay; pero ¿tic' bal a ini yu'un te ipal ants-winiquetic? xchi.

¹⁰ La yal te Jesús: Ac'a shuhcan sbahic, xchi. Ay bayel aquiltic tey a, hich la shuhcan sbahic, ay wan lajunwinic yoxlajunbahc' (5,000) ta tuhl winiquetic.

¹¹ Te Jesús la stsac te pan, la sc'opon Dios yu'un soc la spucticlambe te mach'atic huhcajtique. Ha nix hich la spas soc te chay, la yac'ticlambe ha chican ban c'alal la sc'anic.

¹² C'alal noj sch'uhtic, la yalbe te jnopojeletic yu'un: Tsobahic te xeht'elul te hile, scuenta yu'un mayuc bin ya xch'ay, xchi.

¹³ Hich la stsobic, lahchayeb (12) moch noj a te xeht'elul te ho'pehch pan te hil yu'un te mach'atic we'ique.

¹⁴ Ha yu'un te winiquetic, c'alal la yilic te seña te la spas te Jesús, hich la yalic: Melel nix a te ha te Jalwanej te ya xtal ta bahlumilal, xchihic.

¹⁵ Pero la sna' te Jesús te c'an taluc ta otsesel ta ajwalil, hich stuquel xanix suht mohel ta wits.

Jesús behen ta ba ha'

¹⁶ C'alal ihc'ub q'uinal, cohic bahel ta mar te jnopojeletic yu'un,

¹⁷ ochic ta barco soc tojic bahel ta Capernaum. Ihq'uix q'uinal a, ma to ba talemic ta joquinel yu'un te Jesús.

¹⁸ Stselajan hahchel ta ixtalanel yu'un tulan ic' te mar.

¹⁹ C'alal c'axem wanix jun legua sbehelic ta mar a, la yilic yac ta behel tal ta ba ha' te Jesús, xnopet ta talel tey ta ban ay te barco, xiwic yu'un.

²⁰ Pero halbotic yu'un te Jesús: Ho'on me, ma me xiwex, xchi.

²¹ Hich tse'el yo'tanic la yiq'uic ochel ta barco, ora c'oht te barco te banti yaquic ta bahele.

Te ants-winiquetic yac slehbelic Jesús

²² Ta schebal c'ahc'al, te mach'atic hilic ta jehch mar la yilic te junax barco hilem tey a, soc te ma ba ochem tey a te Jesús soc te jnopojeletic yu'un, te bahemiquix stuquelic.

²³ Pero ay yan barcohetic talemic ta Tiberias te tey hulemic a ta nopol banti la swe'ic te pan te la yalbe wocol Dios yu'un te Cajwaltique.

²⁴ C'alal la yilic te ants-winiquetic te ma ba tey ay a te Jesús soc te jnopojeletic yu'un, ochic ta barcohetic, bahtic ta Capernaum ta slehel te Jesús.

Jesús ha pan scuenta cuxlejal

²⁵ C'alal c'oht stahic ta jehch mar te Jesús, hich la yalbeyic: Rabí, ¿bin ora hulatix li'i? xchihic.

²⁶ La sjac' te Jesús: Tulan sc'oblal ya calbeyex, ma ha'uc yac alehonic yu'un te la awilic te señahiletic, ha nax yac alehonic yu'un te la awe'ic te pan te noj ach'uhtic yu'un.

²⁷ Ma me x'a'tejex yu'un te we'elil te ya xlaj, a'tejanic me yu'un te we'elil te ya yac' cuxlejal sbahtel q'uinal, ha te ya ya'beyex te Nich'anil ay ta scuenta winic, como la yac' ta ilel te Dios Tatil te ha lec yo'tan yu'un, xchi.

²⁸ La sjoc'obeyic te Jesús: ¿Bin ya sc'an ya jpascotic scuenta yu'un ya jc'ohtescotic ta pasel te ya'tel te Diose? xchihic.

²⁹ La sjac' te Jesús: Ha ya'tel Dios te yac ach'uhunic te mach'a sticonej tal, xchi.

³⁰ La sjoc'obeyic xan te Jesús: ¿Bin señahil yac apas scuenta yu'un ya quilcotic soc hich ya jch'uhunatcotic a? ¿Bin a'telil yac apas?

³¹ Te jme'jtatic la swe'ic maná ta jochol taquin q'uinal, hich te bin ut'il ts'ihbabil hilel: La swe'ic pan te talem ta ch'ulchan, xchihic.

³² La yal te Jesús: Tulan sc'oblal ya calbeyex, ma ha'uc te Moisés te la ya'beyex te pan talem ta ch'ulchan, pero ha te Jtat te ya ya'beyex te smelelil pan talem ta ch'ulchan;

³³ como te pan yu'un Dios, ha te mach'a cohem tal ta ch'ulchan soc te ya ya'be scuxlejal mach'atic ayic ta bahlumilal, xchi.

³⁴ La yalbeyic: Cajwal, spisil me ora ha xawa'botcotic te pan yac awale, xchihic.

³⁵ Halbotic yu'un Jesús: Ho'on te panon scuenta cuxlejal. Te mach'a ya xtal ta jtojol, mayuc bin ora ya xwi'najix, soc te mach'a ya sch'uhunon, mayuc bin ora ya xtaquijix yo'tan.

³⁶ Pero hich te bin ut'il la jcalbeyexix, aunque la awiloniquix, pero ma ba yac ach'uhunic.

³⁷ Ya xtal ta jtojol spisil mach'a ya ya'bon ta jcuenta te Jtate, soc te mach'a ya xtal ta jtojol, ma ba ya jten loq'uel.

³⁸ Como cohemon tal ta ch'ulchan, ma ha'uc yu'un te ya jpas te bin ya sc'an co'tan, pero yu'un ya jpas te bin ya sc'an yo'tan stuquel te mach'a la sticonon tale.

³⁹ Te bin ya sc'an yo'tan te Jtat te la sticonon tal, ha te spisil mach'a ya ya'bon ta jcuenta ma me xch'ay cu'un jtuhluc, ha ya jcha'cuxajtes ta slajibal c'ahc'al.

⁴⁰ Hich ay te bin ya sc'an yo'tan te mach'a la sticonon tal: ha te ayuc scuxlejal sbahtel q'uinal spisil te mach'a ya yil te Nich'anil soc ya sch'uhun; soc ya jcha'cuxajtes ta slajibal c'ahc'al, xchi.

⁴¹ Te judíohetic hahchic wulajanel ta c'op yu'un te la yal: Ho'on te panon te cohemon tal ta ch'ulchan, te xchihe.

⁴² ¿Ma bal ha'uc te Jesús snich'an José, te ya jna'betic sba te sme'state? ¿Bin ut'il ay a te ya yal: Cohemon tal ta ch'ulchan? xchihic.

⁴³ La sjac' te Jesús: Ma x'ochex wulajanel.

⁴⁴ Mayuc mach'a ya xhu' ya xtal ta jtojol teme ma ba ic'bil tal yu'un te Jtat te la sticonon tale; soc ho'on ya jcha'cuxajtes ta slajibal c'ahc'al.

⁴⁵ Hich ts'ihbabil yu'un te jalwanejetic: Spisilic ya me xp'ijubtesotic yu'un Dios, xchihic. Ha yu'un spisil te mach'atic ya ya'iyic te Tatil soc te ya yich'ic p'ijubtesel yu'une, ya me xtalic ta jtojol.

⁴⁶ Ma yu'unuc te ay mach'a yiloj te Tatile, ha nax te mach'a talem ta stojol Dios, ha yiloj stuquel te Tatile.

⁴⁷ Tulan sc'oblal ya calbeyex, te mach'a ya sch'uhunon ay scuxlejal sbahtel q'uinal.

⁴⁸ Ho'on te panon scuenta cuxlejal.

⁴⁹ Te ame'atatic la swe'ic te maná ta jochol q'uinal, pero chamic stuquelic.

⁵⁰ Pero ha'i pan ini ha te cohem tal ta ch'ulchan, scuenta yu'un ma ba ya xcham te mach'a ya swe'.

⁵¹ Ho'on te cuxul pan te cohem tal ta ch'ulchan; teme ay mach'a ya swe' ha'i pan ini, sbahtel q'uinal ya xcuxaj yu'un. Te pan te ya cac', ha te jbaq'uetal, te ha ya cac' scuenta scuxlejalic te mach'atic ayic ta bahlumilal, xchi.

⁵² Ha yu'un hahch stij sbahic ta c'op te judíohetic, hich la yalic: ¿Bin ut'il ya xhu' ya yac' jwe'betic te sbaq'uetale? xchihic.

⁵³ Hich halbotic yu'un Jesús: Tulan sc'oblal ya calbeyex, teme ma ba yac awe'beyic te sbaq'uetal te Nich'anil ay ta scuenta winic soc teme ma ba yac awuch'beyic te sch'ich'ele, mayuc acuxlejalic.

⁵⁴ Te mach'a ya swe'bon te jbaq'uetal soc te ya yuch'bon te jch'ich'el, ay scuxlejal sbahtel q'uinal; soc ho'on ya jcha'cuxajtes ta slajibal c'ahc'al.

⁵⁵ Como te jbaq'uetal ha mero we'elil soc te jch'ich'el ha mero uch'balil.

⁵⁶ Te mach'a ya swe'bon te jbaq'uetal soc te ya yuch'bon te jch'ich'el, ya x'ayin ta jtojol soc ho'on ya x'ayinon ta stojol.

⁵⁷ Hich te bin ut'il la sticonon tal te cuxul Tatil soc te cuxulon ta scuenta, ha nix hich te mach'a ya swe'on ya xcuxaj ta jcuenta.

⁵⁸ Ha me te pan cohem tal ta ch'ulchan; ma pajaluc soc te maná la swe'ic te ame'atatic soc chamic. Te mach'a ya swe' ha'i pan ini, ya xcuxaj sbahtel q'uinal yu'un, xchi.

⁵⁹ Hich la yal ta p'ijubteswanej ta sinagoga ta Capernaum.

C'opetic scuenta cuxlejal sbahtel q'uinal

⁶⁰ C'alal hich la ya'iyic, tsobol te jnopojeletic la yalic: Tulan te c'op ini. ¿Mach'a c'an c'ohtuc ta yo'tan? xchihic.

⁶¹ Te Jesús la sna' te hahchic wulajanel yu'un te jnopojeletic yu'un, ha yu'un la yal: ¿Yu'un bal ma lecuc c'oht ta awo'tanic bin la jcal?

⁶² ¿Ha xan teme la awilic te ya xmo bahel ta banti nix ay ta nahil to te Nich'anil ay ta scuenta winic?

⁶³ Ha te Espíritu te ya yac' cuxlejal, mayuc sc'oblal stuquel te baq'uet. Te jc'op te la jcalbeyex, ha scuenta espíritu soc scuenta cuxlejal.

⁶⁴ Pero ay cha'oxtuhlex te ma ba yac ach'uhunic, xchi (como ta shahchibal to tal sna'oj te Jesús mach'atic a te ma ba ya sch'uhunic soc mach'a a te ya x'ac'ot ta c'abal yu'une).

⁶⁵ Hich la yal xan: Ha scuentahil te la jcalbeyex te mayuc mach'a ya xhu' ya xtal ta jtojol teme ma ba ic'bil tal yu'un te Tatile, xchi.

⁶⁶ Tey yorahil a tsobol te jnopojeletic yu'un suht ta spatic, ma ba la sjoquiniquix ta behel.

⁶⁷ Te Jesús la yalbe te lahchaytuhlic: ¿Ya bal ac'an ya suhtex bahel ec? xchi.

⁶⁸ La sjac' te Simón Pedro: Cajwal, ¿mach'a yan ya jt'uncotic? Ha'at awich'oj te c'op scuenta cuxlejal sbahtel q'uinal.

⁶⁹ Jch'uhunejcotic soc jna'ojcotic te ha'at te Mach'a Ch'ultesbil yu'un Dios, xchi.

⁷⁰ La sjac' te Jesús: ¿Ma bal lahchaytuhlex te tsahbilex cu'un? Pero ay jtuhl te ha pucuj, xchi.

⁷¹ Ha la yalbe sc'oblal te Judas Iscariote snich'an Simón, como ha te jtuhl ta slahchaytuhlulic te ya yac' ta c'abal te Jesús.