Josué 7 - Bible in Tzeltal Bachajón

Smul Acán

¹ Pero te snich'nab Israel la sta smulic yu'un te bintic parte ac'bil scuenta lajel, como te Acán snich'an Carmi, snich'an Zabdi, snich'an Zera, te ha sts'umbal Judá, la stsac te bin parte ac'bil scuenta lajel; hich tihl yilimba Jehová ta stojol te snich'nab Israel.

² Patil te Josué la sticon hahchel winiquetic ta Jericó, bahtic ta Hai te nopol yiloj sba soc te Bet-avén, ta stojol sloq'uib c'ahc'al yu'un Bet-el, hich la yalbe: Mohanic bahel ta stsahtayel te q'uinale, xchi. Hich bahtic ta stsahtayel tal te Hai.

³ Te c'alal suhtic tal hich la yalbeyic te Josué: Ma fuersahuc ya xmohic bahel spisil te pueblo; ta cha'mil o oxmiluc winiquetic ya xhu' ya stsalic te Hai; ma xawa'be swocol ta lubel spisil te pueblo te ya xbahtic tey a, como mayuc bayelic, xchihic.

⁴ Ha yu'un ay wan j'ohlil swaxacbahc' (3,000) winiquetic te mohic bahel tey a, pero ahnic loq'uel ta stojol te mach'atic ayic ta Hai.

⁵ Te mach'atic ayic ta Hai la smilic waclajuneb scha'winic (36) winiquetic, la snutsic bahel c'alal ta yochibal te pueblo ha to c'alal ta Sebarim, la slajinic ta banti cohel bahel. Hich laj yip yo'tanic te israeletic, hich c'oht yo'tanic te bin ut'il ha'.

⁶ Ha yu'un te Josué soc te mamaletic yu'un Israel la sch'i' sc'u'ic yu'un soc la spahcan sbahic ta lum ta stojol te scaxahul te chapbil-c'op yu'un Jehová yalel c'alal ta stibiltayel, soc la yaq'uic tan ta sjolic.

⁷ Hich la yal te Josué: ¡Ay, Cajwal Jehová! ¿bin yu'un la awac' te c'ax ta Jordán te pueblo ini yu'un yac awac'otcotic ta sc'ab te amorreohetic yu'un ya slajinotcotic? ¡Ha lec te teyuc hilotcotic a ta jehch ha' Jordán!

⁸ ¡Ay, Cajwal! ¿bin ya cal yo'tic, te bin ut'il te Israel la yac' spat ta stojol te scontrahique?

⁹ Como te cananeohetic soc spisil te mach'a nahinemic ta q'uinal ya me ya'iyic, ya me sjoytayotcotic soc ya me stup'botcotic jbihilcotic ta bahlumilal. ¿Bin yac apas hiche yu'un te smuc'ul abihile? xchi.

¹⁰ Te Jehová la yalbe te Josué: ¡Hahchan! ¿Bin yu'un pacalat ta lum?

¹¹ Stahoj smul te Israel, la sc'axuntayic te chapbil-c'op cu'un, ha te la jpasex ta mandar. La stsaquic te bintic parte ac'bil scuenta lajel, la ya'iyic elec', la ya'iyic lot soc la sq'uejic ta yohlil te sbiluquique.

¹² Ha scuentahil te ma xhu' ya stsalic te scontra te snich'nab Israel, te ha ya xloq'uic ta ahnel ta stojol te scontra, como ha'ic nix parte ac'biliquix ta scuenta lajel. Ma ba ya joquinexix teme ma ba yac alajin ta awohlilic te bintic parte ac'bil ta scuenta lajel.

¹³ Hahchan, ch'ultesa te pueblo, hich xawalbe: Ch'ultesa abahic yu'un chapalex pajel, como hich ya yal te Jehová te Dios yu'un Israel: Ay bin ay ta awohlilic, Israel, te parte ac'bil ta scuenta lajel; ma xhu' yac atsal te acontra ha to teme la aloq'ues ta awohlilic te bin parte ac'bil ta scuenta lajel.

¹⁴ Pajel ya me xnohpojex tal ta jujuchahp; te jchahp te ya stsa Jehová ya me xnohpoj tal te jujuchahp na; te jchahp na te ya stsa Jehová ya me xnohpoj tal te jujuchahp sme'stat; te jchahp sme'stat te ya stsa Jehová ya me xnohpoj tal te jujutuhl winic.

¹⁵ Te mach'a yich'oj te bin parte ac'bil ta scuenta lajel ya me yich' chiq'uel soc spisil bintic ay yu'un, ta scaj te la sc'axuntay te chapbil-c'op yu'un Jehová soc la spas te bin c'ax chopol ta yohlil Israel, xchi te Jehová.

¹⁶ Hich te Josué sab hahch, la yac' ya xnohpoj tal Israel ta jujuchahp; la yich' tsahel te jchahp yu'un Judá.

¹⁷ La yac' ya xnohpoj tal te jchahp yu'un Judá, la yich' tsahel te sts'umbal Zera; la yac' ya xnohpoj tal te winiquetic yu'un te sts'umbal Zera, la yich' tsahel Zabdi.

¹⁸ La yac' ya xnohpoj tal jujutuhl te winiquetic yu'un, la yich' tsahel te Acán snich'an Carmi, te snich'an Zabdi, snich'an Zera, ta jchahp yu'un Judá.

¹⁹ Ha yu'un te Josué la yalbe te Acán: Jnich'an, halbeya yutsilal Jehová te Dios yu'un Israel, halbon ca'iy te bin apasoj, ma xamucbon ta awo'tan, la yut.

²⁰ Te Acán la sjac'be sc'op te Josué: Melel nix a, jtahoj jmul ta stojol Jehová te Dios yu'un Israel; te bin la jpas, ha ini:

²¹ Ta yohlil te biluquetic la jquil t'ujbil nahtil-c'u'ul talem ta Babilonia, soc lajunwinic (200) ta sehp plata soc jpehch oro te lajuneb yoxwinic (50) siclo yalal, bic'taj co'tan yu'un, hich la jtsac. Nac'bilix ta lum ta ye'tal te jnahilpac', soc ay ta ye'tal xan te taq'uine, xchi.

²² Ha yu'un te Josué la sticon bahel winiquetic te ahnumal bahtic ta snahilpac'; hich nix a, nac'bil c'oht stahic ta snahilpac', soc ay ta e'tal te plata.

²³ La stsaquic loq'uel ta snahilpac', la yich'ic tal ta stojol Josué soc spisil te snich'nab Israel, la yaq'uic ta stojol Jehová.

²⁴ Hich te Josué soc spisil Israel la stsaquic te Acán snich'an Zera, soc te plata, nahtil-c'u'ul, jpehch oro, te snich'nab queremetic soc ach'ixetic, te wacaxetic, burrohetic soc tuminchijetic yu'un, te snahilpac' soc spisil bintic ay yu'un, la yiq'uic bahel ta spamlej yu'un Acor.

²⁵ Te Josué hich la yalbe: ¿Bin yu'un la awac' jwocolcotic? Te Jehová ac'a ya'bat awocol yo'tic, xchi. Hich spisil te snich'nab Israel la sch'ojic ta ton soc la schiq'uic te c'alal laj sch'ojbelic ta ton.

²⁶ La sbusambeyic bayel tonetic ta sba te chican c'alal ora. Hich lahmaj te yilimba Jehová. Ha scuentahil te spamlej yu'un Acor sbihil te lugar c'alal ora.