Josué 5 - Bible in Tzeltal Bachajón

Circuncisión soc Q'uin Pascua ta Gilgal

¹ Spisil te ajwaliletic yu'un te amorreohetic te ayic ta stojol smahlib c'ahc'al yu'un te muc'ul-ha' Jordán, soc te ajwaliletic yu'un te cananeohetic ta nopol mar, c'alal la ya'iyic bin ut'il Jehová la staquijtes te ya'lel Jordán ta stojol te snich'nab Israel ha to c'alal sohlic bahel, laj yip yo'tanic soc och bayel xiwel ta yo'tanic ta stojol te snich'nab Israel.

² Ha nix ta yorahil a te Jehová la yalbe te Josué: Pasa cuchillohetic ta tulan ton, ya me xhahchat xan ta ya'beyel circuncisión te snich'nab Israel, xchi.

³ Hich te Josué la spas cuchillohetic ta tulan ton, la ya'be yich'ic circuncisión te snich'nab Israel ta wits Aralot.

⁴ Hich ay scuentahil te la ya'be yich'ic circuncisión: como chamiquix ta be ta jochol taquin q'uinal spisil te winiquetic yu'un te pueblo te loq'uic tal ta Egipto, ha spisil te winiquetic te ya xhu' ya yaq'uic guerra.

⁵ Spisil te pueblo te loq'uic talel yich'ojic circuncisión stuquelic, yan te mach'atic ayinic ta be ta jochol taquin q'uinal te c'alal loq'uemiquix tal ta Egipto a ma ba yich'ojic circuncisión.

⁶ Como te snich'nab Israel behenic cha'winic (40) ha'bil ta jochol taq'uin q'uinal ha to c'alal cham spisil te winiquetic te ya xhu' ya yaq'uic guerra te loq'uic tal ta Egipto. Chamic ta scaj te ma ba la sch'uhumbeyic sc'op te Jehová. Ha yu'un la yal ta jamal te Jehová te ma ba ya ya'be yilic te q'uinal te la yalbe ta jamal te sme'static te ya ya'be, ha te q'uinal ta banti ya x'oquin leche soc chab.

⁷ Ha a'bot yich'ic circuncisión yu'un Josué te yal-snich'nabic, ha te a'botic sjelolin yu'un Jehová; ma ba yich'ojic circuncisión ta scaj te ayic ta be a.

⁸ Te c'alal laj yich'belic circuncisión spisilic a, hilic tey ta campamento ha to c'alal c'ax te yehchenique.

⁹ Te Jehová hich la yalbe te Josué: Yo'tic la jloq'ues bahel te q'uexlal yu'un Egipto, xchi. Ha scuentahil te Gilgal c'oht sbihil te lugar c'alal ora.

¹⁰ Te c'alal ayiquix ta campamento ta Gilgal a te snich'nab Israel la spasic te Q'uin Pascua ta schanlajunebal (14) c'ahc'al yu'un te u, ta stibiltayel q'uinal, ta spamlej yu'un Jericó.

¹¹ C'alal c'axix a te Q'uin Pascua, ta sc'ahc'alel nix, la swe'ic te sit ts'unub-awalil la yac' te q'uinal, soc pan te ma ba yich'oj levadura soc ch'ilbil trigo.

¹² Ta yan c'ahc'al quehchaj te maná, ha te bin ora hahch swe'ic te sit ts'unub-awalil la yac' te q'uinale. Te snich'nab Israel mayuc bin ora la swe'iquix xan te maná, ha la swe'ic te bin la yac' te q'uinal ta Canaán ta hich ha'bil.

Josué soc jtsobaw yu'un soldadohetic yu'un Jehová

¹³ Te c'alal nopol ay ta Jericó a te Josué, la shach sit, la yil jtuhl winic teq'uel ta stojol te yich'oj espada ta sc'ab. Te Josué hich baht sjoc'obe: ¿Ayat bal soc ho'otcotic o ayat soc te jcontracotic? la yut.

¹⁴ La sjac': Ma'uc, ha talemon scuenta jtsobaw yu'un te soldadohetic yu'un Jehová, xchi. Ha yu'un te Josué la spahcan sba ta lum, la sch'uhuntay soc hich la yalbe: ¿Bin yac awalbe te a'bat awu'un, Cajwal? xchi.

¹⁵ Te jtsobaw yu'un te soldadohetic yu'un Jehová hich la sjac'be sc'op te Josué: Loq'uesa atep, yu'un ch'ultesbil te banti ayat, xchi. Hich la spas te Josué.