Josué 18 - Bible in Tzeltal Bachajón

Sq'uinal yantic snich'nab Israel

¹ Spisil te pueblo yu'un te snich'nab Israel la stsob sbahic ta Silo, la schahpanic tey a te Nahilpac' Templo yu'un tahojibal. U'untaybilix spisil a te q'uinal,

² pero ay to hilem huc-chahp xan te snich'nab Israel te ma to a'bibilic te sq'uinalique.

³ Ha yu'un te Josué hich la yalbe te snich'nab Israel: ¿Bin to ora yac amahliyic te ya xtal awu'untayic te q'uinal ya'beyejex Jehová te Dios yu'un te ame'atatique?

⁴ Tsahahic oxtuhl winiquetic ta jujuchahp scuenta yu'un ya jticon bahel; ya xhahchic ta sbehentayel te q'uinal, soc ya spasbe shunal bin yilel te q'uinal ya yich' te jujuchahp, patil ya suhtic tal ta jtojol.

⁵ Ya sloq'uesic huc-sehp a te q'uinale. Te Judá ya xhil ta sq'uinal ta sur, soc te sts'umbal José ya xhil ta sq'uinalic ta norte.

⁶ Te ha'ex yac awac' ta huc-sehp te q'uinal, ya me awich'bonic tal shunal bin yilel, scuenta yu'un ya jpasbeyex seña ta na'el ta stojol Jehová te Dios cu'untique.

⁷ Yan te levitahetic mayuc bin ya yich'ic ta awohlilic stuquel, como ha ya yich'ic stuquel te sacerdotehil yu'un Jehová. Soc te sts'umbal Gad, Rubén soc te j'ohlil sts'umbal Manasés yich'ojiquix sq'uinalic ta stojol banti ya xloc' tal c'ahc'al yu'un te muc'ul-ha' Jordán, te a'botic hilel yu'un Moisés te a'bat yu'un Jehová, xchi.

⁸ Hich loq'uic bahel te winiquetique. Te Josué hich la spas bahel ta mandar te mach'atic ya xbaht yilic bin yilel te q'uinale: Bahanic, behentayahic te q'uinal, ts'ihbayahic bin yilel te q'uinal soc suhtanic tal ta jtojol, scuenta yu'un ya jpasbeyex seña ta na'el ta stojol Jehová li' ta Silo, xchi.

⁹ Ha yu'un bahtic te winiquetic, la sbehentayic te q'uinale. La sts'ihbayic tal ta hun bin yilel te jujun pueblo ta huc-sehp te q'uinal, hich suhtic tal ta stojol Josué ta campamento ta Silo.

¹⁰ Te Josué la spasbe seña ta na'el ta stojol Jehová ta Silo; tey la spucbe a te q'uinal te snich'nab Israel, chican bin yilel la yich' te jujuchahp.

¹¹ Hich loc' scuenta spasbeyel seña ta na'el te jchahp yu'un sts'umbal Benjamín, chican te jaychahp ayique; te q'uinal te c'oht ta scuenta, ha te ay ta ohlil yu'un te sts'umbal Judá soc te sts'umbal José.

¹² Te smojonil ta stojol norte hahch bahel ta Jordán, mo bahel ta norte yu'un Jericó; mo xan bahel ta witsiltic ta stojol banti ya xmahl c'ahc'al, c'oht ta loq'uel ta jochol taquin q'uinal yu'un Bet-avén.

¹³ Tey baht xan ta stojol Luz, c'ax bahel ta sur yu'un Luz (ha te Bet-el), co bahel ta Atarot-adar baht ta wits te ay ta stojol sur yu'un Ahlan Bet-horón.

¹⁴ La yac' buelta ta stojol banti ya xmahl c'ahc'al ta stojol sur yu'un te wits te snuhp'usitayej sba soc Bet-horón, c'oht ta loq'uel ta Quiriat-baal (ha te Quiriat-jearim), ha te pueblo yu'un te sts'umbal Judá. Ha te mojon ta stojol banti ya xmahl c'ahc'al.

¹⁵ Te mojon ta stojol sur loc' bahel ta sti'il Quiriat-jearim, baht ta stojol bahel banti ya xmahl c'ahc'al c'alal ta sloq'uib-ha' yu'un te ha'etic yu'un Neftoa;

¹⁶ tey co bahel c'alal ta ye'tal wits te ay ta stojol te sjuclej yu'un Ben-hinom, te ay ta norte ta jucul q'uinal yu'un Refaim; co bahel ta sjuclej yu'un Hinom, ta stojol sur yu'un jebuseo, tey co bahel ta sloq'uib-ha' yu'un Rogel.

¹⁷ Patil la yac' buelta ta stojol norte, baht ta En-semes, tey baht ta Gelilot te snuhp'usitayej sba soc te mohel yu'un Adumín, co bahel ta ton yu'un Bohán snich'an Rubén;

¹⁸ c'ax bahel ta mohel q'uinal ta norte te snuhp'usitayej sba soc te Arabá, hich co bahel ta Arabá;

¹⁹ c'ax bahel ta stojol norte yu'un Bet-hogla, c'oht ta loq'uel ta c'ab-ha' ta stojol norte ta Mar Salado, te banti ya xc'oht ta loq'uel te muc'ul-ha' Jordán ta sur. Ha te mojon ta stojol sur.

²⁰ Te muc'ul-ha' Jordán ha smojonil c'oht ta stojol banti ya xloc' tal c'ahc'al. Ha te q'uinal soc smojonil ta sjoyobal yu'un te sts'umbal Benjamín, ha chican te jaychahp ayique.

²¹ Te pueblohetic yu'un te sts'umbal Benjamín, ha chican te jaychahp ayic, ha te Jericó, Bet-hogla, Emec-quesis,

²² Bet-arabá, Zemaraim, Bet-el,

²³ Avim, Pará, Ofra,

²⁴ Quefar-haamoni, Ofni soc Geba, ha lahchayeb (12) pueblohetic soc te tut pueblohetic yu'unic;

²⁵ Gabaón, Ramá, Beerot,

²⁶ Mizpa, Cafira, Mozah,

²⁷ Requem, Irpeel, Tarala,

²⁸ Zela, Elef, Jebús (ha te Jerusalén), Gabaa soc Quiriat; chanlajuneb (14) pueblohetic soc te tut pueblohetic yu'unique. Ha te q'uinal te c'oht ta scuenta te sts'umbal Benjamín, ha chican te jaychahp ayique.