Josué 17 - Bible in Tzeltal Bachajón

¹ Soc a'bot sq'uinal ta scuenta spasbeyel seña ta na'el te sts'umbal Manasés, como ha te sba-nich'an José. Te Maquir, te sba-nich'an Manasés soc ha stat Galaad te mero ya sna' guerra, ha c'oht te sq'uinal Galaad soc Basán.

² Soc la spasbeyic seña ta na'el te yantic snich'nab Manasés, ha chican te jaychahp ayic: ha te snich'nab Abiezer, Helec, Asriel, Siquem, Hefer, soc Semida. Ha'ic te squerem-nich'nab Manasés te snich'an José, ta jujuchahp.

³ Pero te Zelofehad snich'an Hefer, snich'an Galaad, snich'an Maquir, snich'an Manasés, mayuc squerem-nich'nab, ha nax yantsil-nich'nab, te hich ay sbihilic: Maala, Noa, Hogla, Milca soc Tirsa.

⁴ Te antsetic talic ta stojol te sacerdote Eleazar, te Josué snich'an Nun soc te jtsobawetic, hich la yalbeyic: Te Jehová la spas ta mandar te Moisés te ya me ya'botcotic jq'uinalcotic ta yohlil te quermanotac, xchihic. Ha yu'un te Josué la ya'be sq'uinalic ta yohlil te yermanotac te state, hich te bin ut'il yaloj te Jehová.

⁵ Ha c'oht ta scuenta Manasés lajunsehp q'uinal, soc nix te q'uinal yu'un Galaad soc yu'un Basán te ayic ta stojol banti ya xloc' tal c'ahc'al yu'un Jordán,

⁶ yu'un te yantsil-nich'nab Manasés pajal la yich' sq'uinalic soc te squerem-nich'nab. Te q'uinal ta Galaad ha yu'un te yan snich'nab Manasés.

⁷ Te sq'uinal Manasés hahch bahel ta Aser c'alal ta Micmetat te snuhp'usitayej sba soc Siquem; baht xan ta stojol sur c'alal ta sq'uinal mach'atic nahinemic ta Tapúa.

⁸ Te q'uinal yu'un Tapúa ha yu'un Manasés, pero te pubelo Tapúa te ay ta sti'il sq'uinal Manasés, ha yu'un te snich'nab Efraín stuquel.

⁹ Te mojon ya xco bahel ta stojol sur yu'un te uc'um yu'un Caná. Ay pueblohetic yu'un Efraín ta yohlil te pueblohetic yu'un Manasés; te mojon yu'un Manasés ay ta stojol norte yu'un te uc'um soc ya xc'oht ta loq'uel ta mar.

¹⁰ Te Efraín ay ta stojol sur, te Manasés ay ta stojol norte, soc ha smojonic te mar; soc slac'oj sba soc Aser ta stojol norte soc Isacar ta stojol banti ya xloc' tal c'ahc'al.

¹¹ Soc te Manasés ay tut pueblohetic yu'un ta sq'uinal Isacar soc Aser, ha te Bet-seán, Ibleam, te mach'atic nahinemic ta Dor, Endor, Taanac soc Meguido, soc te tut pueblohetic yu'unique; oxsehp q'uinal.

¹² Pero te snich'nab Manasés ma ba hu' yu'unic yu'untayel te pueblohetic, como te cananeohetic la yaq'uic fuersa te ya xnahinic tey a.

¹³ Pero te c'alal la yich' yipic te snich'nab Israel, la sujic ta a'tel te cananeohetic, pero ma ba jc'axel la stenic loq'uel.

¹⁴ Te snich'nab José la yalbeyic te Josué: ¿Bin yu'un la awa'botcotic junax seña ta na'el soc jsehp nax q'uinal, te bin ut'il muc'ul pueblohotcotic, como a'botcotic bendición yu'un Jehová c'alal ora? xchihic.

¹⁵ Hich la sjac' te Josué: Teme muc'ul pueblohex, bahanic ta banti tohyem te'etic, c'altayahic tey a te q'uinal yu'un te ferezeohetic soc te refahetic, teme ma tic'uquex a te witsiltic yu'un Efraín, xchi.

¹⁶ La yalic te snich'nab José: Ma ba tic'otcotic a te witsiltic ini. Soc spisil te cananeohetic te nahinemic ta spamlej ay scarretahic pasbilic ta taq'uin, ha te ayic ta Bet-seán soc te tut pueblohetic yu'un, soc te ayic ta spamlej yu'un Jezreel, xchihic.

¹⁷ Ha yu'un te Josué la suhtbe sc'opic te mach'atic yu'un José, ha te Efraín soc Manasés, hich la yalbe: Ha'ex muc'ul pueblohex soc bayel awipic, ma ba jsehp nax q'uinal yac awich'ic,

¹⁸ ha awu'unic ya xc'oht te wits, aunque tohyemic ste'el ya me ats'eticlanic soc ya me awu'untayic c'alal ta mero sti'il te q'uinale; yu'un ha'at yac aten loq'uel te cananeohetic aunque ay scarretahic yu'un guerra pasbilic ta taq'uin soc te ay yipic, xchi.