Jonás 4 - Bible in Tzeltal Bachajón

Ilin Jonás

¹ Te Jonás ma ba lec la ya'iy, bayel ilin yu'un.

² La sc'opon te Jehová, hich la yal: ¡Jehová! ¿ma bal hichuc nix la jcal te c'alal ayon to ta jlumal? Ha scuentahil te ahnon bahel ta Tarsis, como jna'oj te ha'at Diosat te ay yutsil awo'tan soc yac ana'be yo'bolil sbahic, te ma orahuc ya x'ilinat soc ay bayel sc'uxul awo'tan, soc te yac asuht ac'op ta spasel te bin chopole.

³ Ha yu'un, Jehová, awocoluc lajimbonix te jcuxlejal, como ha lec te ya xchamon te bin ut'il cuxulone, xchi.

⁴ Pero hich la sjac' te Jehová: ¿Lec bal yac awa'iy te bayel ya x'ilinat? xchi sc'oblal.

⁵ Te Jonás loc' bahel ta muc'ul pueblo, la shuhcan sba ta stojol banti ya xloc' tal c'ahc'al yu'un te pueblohe. Tey la spas yaxna a, la shuhcan sba ta yaxinal ta smahliyel yil bin ya xc'oht ta pasel ta stojol te muc'ul pueblohe.

⁶ Te Jehová Dios la yac' coluc jtehc' ch'upac-te' te ya xtohy mohel ta sba te Jonás scuenta yu'un ya yac' yaxinal ta sjol, yu'un hich ya xlecub q'uinal ya ya'iy a. Te Jonás mero tse'el yo'tan yu'un te ch'upac-te'e.

⁷ Pero c'alal sacub q'uinal ta schebal c'ahc'al, te Dios la schahpan jcoht yol te la slajin te ch'upac-te', hich taquij.

⁸ C'alal loc' tal te c'ahc'ale, Dios la yac' taluc q'uixin ic' ta stojol banti ya xloc' tal c'ahc'al. Chic'bot sjol te Jonás yu'un te c'ahc'ale, laj yip yu'un. Ya sc'an ya xcham, hich la yal: Ha lec te yacuc xchamon te bin ut'il cuxulon, xchi.

⁹ Pero hich halbot yu'un Dios: ¿Lec bal te ya x'ilinat yu'un te ch'upac-te'? xchi sc'oblal. Bayel ya x'ilinon, ha to c'alal ya xchamon, xchi te Jonás.

¹⁰ Ha yu'un hich halbot yu'un Jehová: Yac ana'be yo'bolil sba te ch'upac-te' te ma ba a'tejat ta stojol soc ma ba la amuc'ubtes; ta junax ahc'abal col soc ta junax ahc'abal cham.

¹¹ ¿Ma bal yacuc jna'be yo'bolil sbahic te Nínive, te muc'ul pueblo banti c'axem ta ho'lajunpic (120,000) ta tuhl ants-winiquetic te ma sna'ic stsahtayel te swa'el-c'ab soc te sq'uexam-c'ab, soc te ay bayel chambahlametic tey a? xchi.