Jonás 2 - Bible in Tzeltal Bachajón

La sc'opon Dios Jonás

¹ Te c'alal ay ta sch'uht chay a te Jonás, la sc'opon te Jehová, te Dios yu'un,

² hich la yal: Te c'alal ayon ta wocol a, la jc'opon te Jehová, la ya'iybon jc'op; awonon c'alal ta yutil te stsobojibal mach'atic chamenic, la awa'iybon te jc'ope.

³ La ach'ojon cohel ta banti c'ubul, ta yohlil te maretic, la sjoytayon te yacan ha'; spisil te tulan stselajan awu'un c'ax ta jba.

⁴ Ha yu'un hich la jcal: Loq'uesbilon ta atojol, mayuquix bin ora ya quil te ch'ul templo awu'un, xchihon.

⁵ La sjoytayon te ha'etic c'alal ta jch'uhlel, la sjoytayon te xahab, la sjoytaybon jol te ya'malel mar.

⁶ Cohon bahel c'alal ta yich'o-ip te witsiltic, te q'uinal la smacon scuenta sbahtel q'uinal; pero ha'at, Jehová, Diosat cu'un, la aloq'uesbon jcuxlejal ta muquenal.

⁷ C'alal yac ta lajel yip te jcuxlejal la jna' te Jehová; te bin la jcalbat c'oht ta atojol, c'oht c'alal ta ch'ul templo awu'un.

⁸ Te mach'atic ya st'unic loc'ombahetic te tojol ayic, ma ha'uquix jun yo'tanic ta atojol.

⁹ Pero te ho'one, ta scuenta yalel wocol, ya ca'bat milbil mahtanil; ya jpas te bin caloj ta jamal ta atojol. ¡Yu'un Jehová te colele! xchi ta sc'oponel Dios.

¹⁰ Te Jehová la yalbe mandar te muc'ul chay, hich la xehtay loq'uel ta lumq'uinal te Jonás.