Joel 3 - Bible in Tzeltal Bachajón

Castigo yu'un Jehová ta stojol nacionetic

¹ Ta hich sc'ahc'alel soc ta hich ora, te c'alal ya ca'be xan yutsil slequil te Judá soc te Jerusalén,

² ya jtsob tal spisil te nacionetic, ya quic'ticlan cohel ta spamlej yu'un Josafat; tey ya jchahpan a ta scaj te pueblo cu'un, ha te Israel, te ha cu'un, te la spucticlanic bahel ta yohlil te nacionetic, soc la spucbe sbahic te jq'uinale.

³ La spasic seña ta na'el ta stojol te pueblo cu'un, la sjelic tut queremetic ta j'antsinel ants, soc la schonic tut ach'ixetic yu'un ya smanic vino a te ya yuch'ique.

⁴ ¿Bin cochelex a, Tiro, Sidón, soc spisil sq'uinal Filistea? ¿Ya bal ac'an yac asutbonic spacol? Teme yac asutbonic spacol, ho'on ya cac' c'ohtuc ta atojolic ta ora te bin yac apasique.

⁵ Como la awich'bonic bahel te plata soc te oro cu'un, soc la awotsesic ta templohetic awu'unic te t'ujbil c'ulejaliletic cu'une;

⁶ la achombeyic te griegohetic te mach'atic yu'un Judá soc yu'un Jerusalén, yu'un namal ya xhil a te slumalique.

⁷ Ilawil, ya quic'ticlan loq'uel tal ta banti achonojic, soc ya cac' c'ohtuc ta atojolic te bin apasojique.

⁸ Ya jchombeyic te mach'atic yu'un Judá te aquerem-nich'nabic soc te awantsil-nich'nabic, ha ya schombeyic bahel te sabeohetic te namal slumalic; como hich yaloj te Jehová.

⁹ ¡Pucahic ta halel ta stojol te nacionetic, chahpana abahic yu'un guerra, tijahic hahchel te soldadohetique! ¡La'ic, ac'a taluc spisil te winiquetic yu'un guerra!

¹⁰ Pasahic ta espada te asadonetic awu'unic, pasahic ta lanza te hocetic awu'unique; hich ac'a yal te mach'a mayuc yip: Ho'on bayel quip, xchihuc.

¹¹ Tsoba abahic, la'ic me, ha'ex nacionetic ta ajoyobalic, tsoba abahic. ¡Jehová, ac'a taluc tey a te mach'atic awu'un te ay yipique!

¹² Ac'a stij sbahic te nacionetic, ac'a mohuquic bahel ta spamlej yu'un Josafat, como tey ya juhcan jba ta schahpanel a spisil te nacionetic ta sjoyobal.

¹³ Otsesa te hoz, como syijilix te trigohe. La'ic, ts'o'ts'o'tec'ahic te sit ts'usubil, como nojelix te spits'ojibal, c'ax nojel ay te yawil como c'ax bayel te schopolilique.

¹⁴ C'ax bayel pueblohetic ta spamlej yu'un Chahpanel; como nopolix te sc'ahc'alel yu'un Jehová ta spamlej yu'un Chahpanel.

¹⁵ Ya x'ihc'ub te c'ahc'al soc te u, ya xtup' sts'anabul te eq'uetique.

Ya xcol ta libre Judá

¹⁶ Ya x'awon te Jehová c'alal Sión, ya yac' ta a'iyel sc'op c'alal Jerusalén, ya xnihc te ch'ulchan soc te lumq'uinale; pero te Jehová ha ahnibal yu'un te pueblo yu'un, ha toyol ts'ahc yu'un ahnibal yu'un te snich'nab Israel.

¹⁷ Hich me yac ana'ic a te ho'on Jehovahon te Dioson awu'unic, te nahinemon ta Sión, te ch'ul wits cu'une. Te Jerusalén ha ch'ul pueblo ya xc'oht, ma me ayuquix bin ora ya x'u'untayotix yu'un jyanlumetic.

¹⁸ Ya xc'oht ta pasel ta hich ora, te witsiltic ya xt'uhlajic ya'lel ts'usub, ya x'oquin leche ta tsehletic, soc ta spisil te uc'umetic yu'un Judá ya x'oquin ha'. Ya xloc' tal sloq'uib-ha' ta sna Jehová te ya yahts'es te spamlej yu'un Sitim.

¹⁹ Jimbil ya xc'oht te Egipto soc ya sutp'ij ta jochol taquin q'uinal te Edom, ta scaj te la yuts'in te sts'umbal Judá, como ta slumalic la smalbeyic sch'ich'el te mach'atic mayuc smulic.

²⁰ Pero te Judá spisil ora ya xnahinic tey a, soc ta Jerusalén ta cajalcaj ts'umbalil.

²¹ Ya ca'be spacol te ch'ich' malem te ma ba ca'beyej spacol. Soc ya xnahin ta Sión te Jehová.