Jeremías 9 - Bible in Tzeltal Bachajón

¹ ¡Te ha'uc ha' te jol soc te ha'uc sloq'uib-ha' te jsite, yu'un ya coq'uetay c'ahc'al ahc'abal te mach'atic chamic yu'un te jlumale!

² ¡Te ayuc cu'un ta jochol taquin q'uinal wayibal na yu'un mach'atic ya xbehenic, scuenta yu'un ya quihquitay hilel te jlumal, te namal ya xbohon ta stojolic! Como spisilic j'antsiwejetic soc jchahp j'ac'awetic ta c'abal.

³ Chapal yu'unic yalel lot hich te bin ut'il t'ihmalte'; ha ya ya'iy tsalaw te lot ta q'uinal, ma ha'uc te smelelile; yac ta p'ohlel yu'unic te bin chopole. Ma sna'bonic jba, xchi te Jehová.

⁴ Tuhlutuhl ac'a stsahtay sba ta stojol te mach'a sjoquinej sba soc, ma me ha'uc ya smuc'ulin yo'tan te yermano, como spisil yermano ya xlo'loywan, soc spisil mach'a sjoquinej sba soc ya xlehawan ta c'op.

⁵ Jujutuhl ya slo'loy te mach'a sjoc sba soc, mayuc mach'a ya yal te bin smelelil. La ya'beyic snop yalel lot te yehique, ya ya'telinic spasel te bintic chopol.

⁶ Ay ta yohlil lo'loywanej te snahique; te bin ut'il jlo'loywanejetic ma ba la sc'anic te ya sna'bonic jba, xchi te Jehová.

⁷ Ha yu'un hich ya yal te Jehová te scuentahinej spisil: Ilawil, ya cac'ticlan ta c'ahc' scuenta lecubtesel soc ya jtsahticlan, como ¿bin yan ya xhu' ya jpas ta stojol te pueblo cu'une?

⁸ Te yehique, ha ya'tejibalul t'ihmalte' te ya xlajinwan, ha nax ya ya'iy lot. Ta ye ya yalbeyic lamal q'uinal te mach'a jun yo'tan soc, pero ta yo'tanic ya schahpambe syacol.

⁹ ¿Ma bal yacuc cac'ticlambe castigo yu'un spisil ini? ¿Ma bal yacuc ca'be stoj te nación te hich ya spas? xchi te Jehová.

¹⁰ Ya x'oc'on soc ya x'ahcanajon yu'un te witsiltic, ya jc'ayojtay mel-o'tan c'ayoj yu'un te aquiltic ta jochol taquin q'uinal, como la yich'ic jinel, mayuc mach'a ya xc'axix tey a, soc ma ba ya xchicnajix yoq'uel wacaxetic; te mutetic ta ch'ulchan soc te chambahlametic ta q'uinal bahtic ta ahnel.

¹¹ Te Jerusalén ya jsutp'in ta busul tontiquil, sna ha'mal ts'i'etic ya xc'oht; soc ya jsutp'in ta jihnem q'uinal te pueblohetic yu'un Judá, mayuc mach'a ya x'ayin tey a, xchi te Jehová.

Ya me yich'ic jinel soc chuquel bahel

¹² ¿Mach'a a te ay sp'ijil yo'tan te ya xhu' ya sna'be scuentahil ini? ¿Mach'a c'oponot yu'un Jehová scuenta yu'un ya xhu' ya spuc ta halel? ¿Bin yu'un te jihnem te q'uinale, te jimbil hich te bin ut'il jochol taquin q'uinal te mayuc mach'a ya xc'axix tey a?

¹³ Hich la yal te Jehová: Como la yihquitaybon te ley cu'un te la jcac' ta stojolic; ma ba la sch'uhumbonic te jc'op soc ma ba la st'unic bahel.

¹⁴ Ha la st'unic te bin la snop ta yo'tanic soc la st'unic bahel te baaletic, hich te bin ut'il a'bot snopic yu'un te sme'statique.

¹⁵ Ha yu'un hich ya yal te Jehová te scuentahinej spisil, te Dios yu'un Israel: Ilawil, te pueblo ini ya ca'be swe' ch'ahco' soc ya ca'be yuch'ic ha' te ay svenenohil.

¹⁶ Ya jpucticlan bahel ta yohlil nacionetic te ma ba sna'beyejic sba ni ha'uc te sme'statique; soc ya jticombe espada ta stojolic ha to c'alal ya xlajic, xchi te Jehová.

¹⁷ Hich ya yal te Jehová te scuentahinej spisil: Nopa me awa'iyic soc ticonahic ta iq'uel tal te antsetic te ya ya'telinic oq'uel, ticonahic ta iq'uel tal te mach'atic ay bin ya xhu' yu'unic.

¹⁸ ¡Ac'a suj sbahic, ac'a yoq'uetayotic! ¡Ac'a nojuc ta ya'lel te jsitique, ac'a maluc loq'uel ha' ta stsotsel jsitic!

¹⁹ Como ya xchicnaj oq'uel ta Sión: ¡Jihnemotiquix! Bayel quich'ojtic q'uexlaltesel, yu'un la jquihquitaytic hilel te jq'uinaltic, la sjinic te jnatique.

²⁰ Antsetic, a'iybeya awa'iyic sc'op te Jehová; ac'a ya'iy achiquinic te sc'op te ya xloc' ta ye. A'beyahic snop oq'uel te awantsil-nich'anic; a'beyahic snop mel-o'tan c'ayoj mach'a jun awo'tan soc,

²¹ como te lajel mohemix tal ta ventanahetic cu'untic soc ochemix talel ta nahetic yu'un ajwalil cu'untic, yu'un ya slajinlan te alaletic ta callehetic soc te jcolel queremetic ta plazahetic.

²² Hich me xawal: Hich ya yal te Jehová: Te schamen baq'uetalic te ants-winiquetic limilic ya xhil ta lum, hich te bin ut'il stsa' chambahlam ta sba aquiltic, hich te bin ut'il tohmoltohm ya xhil ta spat te jset'-trigo, te mayuc mach'a ya stsob, xchihat me.

Ha yutsilal te winic teme ya sna'be sba te Diose

²³ Hich ya yal te Jehová: Te mach'a ay sp'ijil ma me stoybe sba ya'iy q'uinal yu'un te sp'ijile, soc te mach'a ay yip ma me stoybe sba ya'iy q'uinal yu'un te yipe, te mach'a ay sc'ulejal ma me stoybe sba ya'iy q'uinal yu'un te sc'ulejale.

²⁴ Te mach'a ya stoybe sba q'uinal ya'iy, hich me ac'a stoybe sba q'uinal ya'iy yu'un ini: ha te ya sna' bin ut'il ayon soc te ya sna'bon jba, te ya sna' te ho'on Jehovahon, te ya ca'iy c'uxultaywanej, te toj ya ca'iy chahpanwanej soc te ya jpas te bin stojil ta pasel, como ha ya sc'an co'tan ini, xchi te Jehová.

²⁵ Ya me sta sc'ahc'alel, xchi te Jehová, te ya ca'be castigo spisil te mach'atic ha nax yich'ojic circuncisión ta scuenta sbaq'uetalic:

²⁶ ha te Egipto, te Judá, Edom, Amón soc Moab, soc spisil te mach'atic ya xnahinic ta jochol taquin q'uinal te ya sloq'ues te stsotsel sjolic ta xuhc schiquinique. Como spisil te nacionetic ini ma ba yich'ojic circuncisión ta smelelil, soc ha nix hich te pueblo Israel ma ba yich'ojic circuncisión ta yo'tanic, xchi.