Jeremías 8 - Bible in Tzeltal Bachajón

¹ Ta hich ora, xchi te Jehová, ya yich' loq'uesbeyel ta muquenal te sbaquel te ajwaliletic soc te príncipaletic yu'un Judá, te sacerdotehetic, jalwanejetic soc te mach'atic nahinemic ta Jerusalén.

² Limil ya xhilic ta stojol te c'ahc'al, te u soc spisil te eq'uetic, te c'ux la ya'iyic ta yo'tanic soc te la yac' sbahic ta a'batinel yu'unic, te la st'unic bahel, te ay bin la sjoc'obeyic soc te la squejan sbahic ta stojolique. Ma ba ya yich'ic tsobel o muquel, hich ya xc'ohtic te bin ut'il stsa' chambahlam ta sba te lumq'uinale.

³ Ya slehic slajelic, ma ha'uc scuxlejalic, spisil te mach'atic cuxul ya xhilic yu'un te jcaj ts'umbalil ini te chopol yo'tanic, ta spisil banti ya jpucticlan bahel, xchi te Jehová te scuentahinej spisil.

⁴ Hich me yac awalbe: Hich yaloj te Jehová: Te mach'a ya xyahl, ¿ma bal yacuc xhahch? te mach'a ya xhowiy bahel, ¿ma bal yacuc suht xan tal?

⁵ ¿Bin yu'unix a te spisil ora howiyem bahel te pueblo Jerusalén ini? La smech'ic te lo'loyel, ma sc'anic ya suhtic talel.

⁶ La jca'iy ta lec, ma ba toj ya xc'opojic; mayuc mach'a ya suhtes yo'tan yu'un te bin chopol spasoj, te hich ya yal: ¿Bin jpasoj? ma xchihuc. Jujutuhl la st'unic bahel te be yu'unic hich te bin ut'il cawu te tulan ya x'ahnimaj ochel ta guerra.

⁷ Te cigüeña-mut ta sjamalil ch'ulchan ya sna' te jujucaj yorahil, soc te xpuliwoc, te ulich soc te smutil ha' ya sna'ic te bin ora ya suhtic talel; yan te pueblo cu'un ma sna'be sba te mandariletic yu'un Jehová.

⁸ ¿Bin ut'il ya xhu' yac awal: Ho'otic ay jp'ijiltic, ay ta jtojoltic te ley yu'un Jehová, te xchihexe? Melel ha la sutp'in ta lot te lotil pluma yu'un te mach'atic ya xts'ihbajic.

⁹ Ya x'ac'otic ta q'uexlal te mach'atic ay sp'ijilic, ya xlaj yip yo'tanic soc ya x'ochic ta yaquil. La sp'ajic te sc'op Jehová, ¿banti ay te sp'ijilique?

¹⁰ Ha yu'un te yihnamic ya cac' ta sc'ab yan winiquetic, soc yan yajwalic ya xc'oht te sq'uinalique. Como ta spisilic, muc' biq'uitetic, ya xbic'taj yo'tanic ta stahel taq'uin; te jalwanejetic soc sacerdotehetic, spisilic ya ya'iyic lo'loywanej.

¹¹ Ta sba nax ya spoxtaybeyic yehchen te pueblo cu'un, hich ya yalic: Lamal q'uinal, lamal q'uinal, xchihic, c'alal mayuc lamal q'uinal.

¹² ¿Q'uexawic bal yu'un te bin ihlaybil te spasojique? Ma'uc, jc'axel ma xq'uexawic; ma sna'ic bin a te q'uexlale. Ha yu'un ya xyahlic ta yohlil te mach'atic ya xyahlique; ya me xyahlic te c'alal ya ca'be castigo, xchi te Jehová.

¹³ Ya jlajimbe spisil, xchi te Jehová, ma ba ya xhil ts'usub ta sc'ab, mayuc higohetic ta ste'el, ya xluhbaj ya'binal, te bintic ca'beyej, ya xc'ax ta stojolic, xchi.

¹⁴ ¿Bin yu'un huculotic li'i? ¡Ac'a jtsohb jbahtic! ¡Ya x'ochotic bahel ta pueblohetic te joytaybilic ta sts'ahc, tey ya xlajotic a! Como te Jehová te Dios cu'untic ya yac'otic ta ch'ayel, soc la ya'botic cuch'tic ha' te ay svenenohil, como jtahoj jmultic ta stojol Jehová.

¹⁵ La jmahliytic lamal q'uinal, pero mayuc bin lec te tale, la jmahliytic yorahil poxtayel, pero ha nax ay tulan xiwel.

¹⁶ C'alal ta Dan chicnaj yic'al sni' scawuhic; c'alal x'ilajanic te scawuhic te ay yipic ya xnihc spisil te lumq'uinale. Tal sjinic te q'uinal soc spisil bintic ay tey a, te muc'ul pueblo soc te mach'atic nahinemic tey a, xchihic.

¹⁷ Ilawil, ya jticon tal ta atojolic ti'awal chanetic, chanetic te ma xhu' ta monel, ya me sti'ex, xchi te Jehová.

Oq'uel ta stojol Judá soc Jerusalén

¹⁸ Mayuc spoxil te jmel-o'tan, ya xlaj yip te co'tane.

¹⁹ A'iya awa'iy te yaw te yantsil-nich'an te pueblo cu'un te ya xchicnaj tal ta namal q'uinal: ¿Ma bal ayuc ta Sión te Jehová? ¿Ma bal teyuc ay a te ajwalil yu'une? xchi. ¿Bin yu'un la shachbonic quilimba ta scuenta te pasbil loc'ombahetic yu'unic, te jyanlum diosetic te mayuc scuentahil? xchi te Jehová.

²⁰ ¡C'axix yorahil stsobel te sit awal-ts'unubil, lajix yorahil q'uixin q'uinal, te ho'otic ma ba colemotic! xchihic.

²¹ Ay jwocol yu'un te swocol te jlumale; ayon ta mel-o'tan, la yu'untayon tulan xiwel.

²² ¿Ma bal ayuc bálsamo-te' ta Galaad? ¿Ma bal ayuc jpoxtaywanej tey a? ¿Bin yu'un hiche te ma ba lecub te jlumale?