Jeremías 7 - Bible in Tzeltal Bachajón

Tojobtesahic te behetic awu'unic soc awa'telic

¹ Hich ay te sc'op Jehová te tal ta stojol Jeremías:

² Tehc'ana aba ta yochibal te sna Jehová, tey me yac awal a te c'op ini: A'iya awa'iyic te sc'op Jehová, spisil Judá te ya x'ochex tal ta ochibaletic ini yu'un yac ach'uhuntayic te Jehová.

³ Hich yaloj te Jehová te scuentahinej spisil, te Dios yu'un Israel: Tojobtesahic te behetic awu'unic soc te awa'telique, hich ya cac' te ya xnahinex li'i.

⁴ Ma me smuc'ulin awo'tanic te lotil c'opetic ini, te hich ya yal: ¡Ha templo yu'un Jehová, ha templo yu'un Jehová, ha templo yu'un Jehová! te xchihe.

⁵ Teme melel yac atojobtesic te behetic awu'unic soc te awa'telic, teme melel talel c'axel yac apasbe abahic te bin stojil,

⁶ teme ma ba yac awuts'inic te jyanlum, te me'ba' o te me'ba' ants, teme ma ba yac amalbe sch'ich'el ta lugar ini te mach'a mayuc smul, soc teme ma ba yac at'unic bahel jyanlum diosetic te yac ata awocolic yu'une,

⁷ ya cac' te ya xnahinex ta q'uinal ini, te q'uinal te la jca'be scuenta sbahtel q'uinal te ame'atatique.

⁸ Pero ha ya smuc'ulin awo'tanic te lotil c'op te ma xtuhune.

⁹ Yac awa'iyic elec', milaw, antsiwej, yalel ta jamal lot, yac achic' pom ta stojol Baal soc yac at'unic bahel diosetic te ma ba ana'beyejic sba,

¹⁰ ¿yu'un bal ya xtal atehc'an abahiquix ta jtojol li' ta jna ini te yich'beyejon te jbihile, te hich yac awalic: Libre ayotic, xchihex, yu'un yac apasulanic xan bahel spisil te bintic ilobtic sbahe?

¹¹ ¿Ha bal ch'en yu'un j'eleq'uetic ta atojolic te na ini te yich'beyejon te jbihile? Ho'on quilojix, xchi te Jehová.

¹² Bahanic ta lugar cu'un ta Silo ta banti la jcac' te jbihil ta shahchibal, ilawilic bin la jpasbe ta scaj schopolil te Israel te pueblo cu'une.

¹³ Yo'tic, te bin ut'il hich apasojic spisil ini, xchi te Jehová, soc te bin ut'il la jc'oponlanex, pero ma ba la awa'iyic, soc la jquiq'uex, pero ma ba la ajac'bonic,

¹⁴ hich nix ya jpasbe te na ini te yich'beyejon te jbihile, te ha smuc'ulinej awo'tanic, te la jca'beyex soc te ame'atatique.

¹⁵ Ya jch'ojticlanex loq'uel ta jtojol, hich te bin ut'il la jch'ojticlan loq'uel te awermanotac, spisil te sts'umbal Efraín.

¹⁶ Ha yu'un, Jeremías, ma xac'oponon yu'un te pueblo ini, ma me xhahchat ta aw yu'un yac ac'oponon, ma me xawalbon wocol yu'un, como ma ba ya ca'iybat ac'op.

¹⁷ ¿Ma bal awilojuc te bintic ya spasic ta pueblohetic yu'un Judá soc ta callehetic ta Jerusalén?

¹⁸ Te al-nich'anetic ya stsobic tal si', te tatiletic ya stsunic c'ahc', te antsetic ya swots'ic harina yu'un spasbeyel tut panetic te ajwalil-ants yu'un ch'ulchan; soc ya ya'beyic malbil mahtaniletic yantic diosetic, yu'un ya shachbonic quilimba a.

¹⁹ ¿Ho'on bal te ya shachbonic quilimba? ¿Ma bal ha'uquic nix te ya yac' sbahic ta q'uexlal?

²⁰ Ha yu'un hich yaloj te Cajwaltic Jehová: Te sc'ahc'al co'tan soc te quilimba ya xmahl cohel ta stojol te lugar ini, ta stojol te ants-winiquetic, chambahlametic, te'etic ta q'uinal soc ta sit awal-ts'unubileic. Ya xtihl, ma ba ya xtup', xchi.

²¹ Hich yaloj te Jehová te scuentahinej spisil, te Dios yu'un Israel: Ac'ahic te scohtol chic'bil mahtaniletic soc te milbil mahtaniletic, soc we'beyahic te sbaq'uetale.

²² Como te c'alal la jloq'ues tal ta Egipto te ame'atatic, ma ba la jpas ta mandar ta scuenta scohtol chic'bil mahtaniletic soc milbil mahtaniletic.

²³ Pero la jcalbe te mandar ini: Ch'uhumbonic te jc'ope, hich Dioson awu'unic ya xc'ohon soc ha'ex pueblo cu'un ya xc'ohex. T'unahic bahel spisil te behetic te la jcalbeyexe, scuenta yu'un lec ya xc'ohex a, xchihon.

²⁴ Pero ma ba la sch'uhunic, ma ba la yich'ic ta cuenta; ha la st'unic bahel te bintic snopojic ta scuenta tulan schopolil yo'tanic. Suht ta spatic, ma ba behenic xan bahel,

²⁵ c'alal bin ora loq'uic tal ta Egipto te ame'atatic c'alal yo'tic. Bayel buelta la jticonlambeyex spisil te a'batetic cu'un, ha te jalwanejetique.

²⁶ Pero ma ba la ya'iybonic jc'op, ma ba la yac' schiquinic, la stulanijtes yo'tanic, c'ax hich chopol c'ohtic a te bin ut'il te sme'statique.

²⁷ Ha'at, Jeremías, ya me awalbeyic spisil te c'op ini, pero ma ba ya ya'iybat ac'op; yac ac'oponlan, pero ma ba ya sjaq'uic.

²⁸ Ha yu'un hich yac awalbe: Ha te nación ini te ma ba la sch'uhumbeyic sc'op te Jehová te Dios yu'une, ma ba la sc'anic tojobtesel; ch'ayix te smelelil c'op, loq'uesbilix ta yehic, xchihat me.

²⁹ ¡Jerusalén, loq'uesa stsotsel ajol, ch'oja bahel, c'ayojtaya mel-o'tan c'ayoj ta toyol q'uinaletic, como te Jehová la sp'ajix soc la yihquitay te jcaj ts'umbalil te ilintayot yu'une!

³⁰ Como te swinquilel Judá spasojic te bin chopol ta jtojol, xchi te Jehová; la yaq'uic te bintic ilobtic sba ta na te yich'oj te jbihile, la sbohlobtesbeyic sc'oblal.

³¹ La spasic scajtajib ta chiq'uel mahtanil ta Tofet ta sjuclej yu'un Ben-hinom yu'un ya schiq'uic tey a te squerem-nich'anic soc yantsil-nich'anic, te bin ma hichuc calbeyej ta mandar, soc mayuc talem ta co'tan.

³² Ha yu'un ya me sta sc'ahc'alel, xchi te Jehová, te ma ba ya xhalbot sbihil Tofet o te sjuclej yu'un Ben-hinom; ha spamlej yu'un Miltamba ya xc'oht te sbihile. Ya me yich'ic muquel ta Tofet, yu'un mayuc yan lugar.

³³ Te chamen baq'uet yu'un te pueblo ini ya me xtuhun yu'un swe'el te mutetic te ya xwihlic ta toyol soc te chambahlametic ta lumq'uinal, soc mayuc mach'a ya xiwtesic bahel.

³⁴ Ya cac' te ya xquehchaj ta pueblohetic yu'un Judá soc ta callehetic yu'un Jerusalén te sc'op yutsil q'uinal soc tse'el-o'tanil, te sc'op te mamalalil soc sc'op ihnamil, como jochol ya xc'oht te q'uinale, xchi te Jehová.