Jeremías 52 - Bible in Tzeltal Bachajón

Ya'tel ajwalil Sedequías

¹ Te Sedequías ayix jun scha'winic (21) ya'bilal a te c'alal och ta ajwalil, ay ta ajwalil ta Jerusalén bulucheb (11) ha'bil. Hamutal sbihil te snane, ha yantsil-nich'an Jeremías te talem ta Libna.

² La spas te bin chopol ta stojol te Jehová, hich te bin ut'il la spas te Joacim.

³ Ta scaj te yilimba Jehová ta stojol Jerusalén soc Judá la sloq'ueslan ta stojol. Te Sedequías la stoy sba ta scontrahinel te ajwalil ta Babilonia.

Laj Jerusalén

⁴ Ta slajunebal c'ahc'al yu'un te slajunebal u, ta sbalunebal ha'bil yochel ta ajwalil a te Sedequías, te ajwalil Nabucodonosor tal soc spisil soldadohetic yu'un ta Jerusalén, soc la sjoytayic. La sbut'ic mohel lum ta spat ts'ahc ta sjoyobal.

⁵ Hich joytaybil c'oht te pueblo ta sbuluchebal (11) ha'bil yochel ta ajwalil a te Sedequías.

⁶ Ta sbalunebal c'ahc'al ta schanebal u, c'alal bayel wi'nal ta Jerusalén a, te mayuquix bin ya swe'ic a te pueblo,

⁷ la yich' jamel te sts'ahcul te pueblo, spisil te soldadohetic loq'uic ta ahnel. Ta ahc'abal loq'uic bahel ta pueblo ta ochibal te ay ta yohlil te cheb ts'ahc te nopol ayic ta ts'umbil nichimetic yu'un te ajwalile, bahtic ta sbehlal Arabá, aunque joytaybil yu'un te caldeohetic te pueblohe.

⁸ Pero te soldadohetic yu'un te caldeohetic la snutsic bahel te ajwalil c'alal ta spamlej yu'un Jericó. Tey c'oht stahic a te Sedequías, ihquitayotix yu'un spisil te soldadohetic yu'une.

⁹ La stsaquic te ajwalil, la yiq'uic bahel ta stojol te ajwalil yu'un Babilonia te ay ta Ribla, ta sq'uinal Hamat, te banti halbot bin ya xpasbot.

¹⁰ Tey nix ta Ribla te ajwalil yu'un Babilonia la smilticlambe ta stojol sit Sedequías te snich'nab, soc la smilticlan spisil te príncipaletic yu'un Judá.

¹¹ Te ajwalil yu'un Babilonia la sloq'uesbe sit te Sedequías, la schuc ta cadena, la yic' bahel ta Babilonia ta banti la yotses ta cárcel ha to c'alal cham.

Judá ic'ot bahel ta chuquel

¹² Ta slajunebal c'ahc'al yu'un te yo'ebal u ta sbalunlajunebal (19) ha'bil yochel ta ajwalil a te Nabucodonosor ajwalil yu'un Babilonia, tal ta Jerusalén te Nabuzaradán, capitán yu'un te soldadohetic te ya scanantayic ajwalil, soc ha a'bat yu'un te ajwalil yu'un Babilonia.

¹³ La schic' te sna Jehová, te sna te ajwalil soc spisil te nahetic ta Jerusalén. La slajin ta c'ahc' spisil te muc'ul nahetic te ay sc'oblalique.

¹⁴ Spisil te caldeo soldado te sjoquinejic tal soc te capitán la sjinic spisil te ts'ahquetic ayic ta sjoyobal te Jerusalén.

¹⁵ Te Nabuzaradán, capitán yu'un te soldadohetic te ya scanantayic ajwalil, la yic'ticlan bahel ta chuquel te pobrehetic, te mach'atic ayic to ta pueblo, te mach'atic yac'ojix sbahic ta stojol te ajwalil yu'un Babilonia, soc te mach'atic ay bin ya sna'ic sch'ahlel ta pasel te tey to ayic a.

¹⁶ Pero te Nabuzaradán la yihquitay hilel te mach'atic c'ax pobrehetic scuenta yu'un ya x'a'tejic ta ts'usubiltic soc ta q'uinal.

¹⁷ Te caldeohetic la swuyic te muc'ul oyetic pasbilic ta bronce te ay ta sna Jehová, te scajtajib yawil ha'etic soc te muc'ul yawil ha' pasbil ta bronce te ay ta sna Jehová, la yich'ic bahel spisil te bronce ta Babilonia.

¹⁸ Soc la yich'ic bahel te yawil c'ahc'al tan, te palahetic, te sloq'uesojibal yac'alel mecha, te muc'ul tazahetic, cucharahetic soc spisil te biluquetic pasbilic ta bronce te tuhun ta sch'uhuntayel te Diose.

¹⁹ Te capitán la yich' bahel te yawil ta chiq'uel pom, te muc'ul tazahetic, copahetic, oxometic, scajtajib c'ahq'uetic, platohetic soc tazahetic, te bintic pasbil ta oro soc ta plata.

²⁰ Te cheb muc'ul oy, te muc'ul yawil ha' soc te lahchaycoht (12) torohetic pasbilic ta bronce te ayic ta ye'tal, soc te scajtajib yawil ha'etic te la spas te ajwalil Salomón yu'un te sna Jehová ma ba hu' ta p'isel te yalal te bronce yu'unique.

²¹ Te jujun muc'ul oy ha waxaclajuneb (18) xuhc'ubil te snahtil soc lahchayeb (12) xuhc'ubil ta sjoyobal; chanc'ab te spimile, soc hotol yohlil.

²² Te wolajtic sjol pasbil ta bronce te ay ta sba te oy, ha ho'eb xuhc'ubil stoyolil, soc ay loc'taybil chejchej taq'uin soc granadahetic ta sjoyobal, spisil pasbil ta bronce; soc ha nix hich yich'oj te schebal oy soc te granadahetic yu'une.

²³ Ay waclajuneb yo'winic (96) granadahetic ta jujujehch; ta spisil, ay ho'winic (100) granadahetic ta sjoyobal te loc'taybil chejchej taq'uin.

²⁴ Te capitán la stsac te Seraías te muc'ul sacerdote, te Sofonías te schebal sacerdote, soc te oxeb jcanan-amac'.

²⁵ Soc tey ta pueblo la stsac te capitán yu'un te soldadohetic, huctuhl winiquetic te ha j'ac'-o'taniletic yu'un te ajwalil te ayic ta pueblo, te príncipal jts'ihbajel te ay ta scuenta stsobel soldadohetic yu'un guerra, soc oxwinic (60) ta tuhl winiquetic te la sta ta yutil te pueblohe.

²⁶ Te Nabuzaradán la yic'ticlan bahel ta stojol te ajwalil yu'un Babilonia ta Ribla.

²⁷ Te ajwalil yu'un Babilonia la smilticlan tey ta Ribla ta sq'uinal Hamat. Hich te Judá ic'ot loq'uel ta chuquel ta sq'uinal.

²⁸ Te jayeb te la yic' bahel te Nabucodonosor hich ay: ta shuquebal ha'bil, lajunwinic swaxacbahc' soc oxeb scha'winic (3,023) ta tuhl winiquetic yu'un Judá;

²⁹ ta swaxaclajunebal (18) ha'bil yochel ta ajwalil a te Nabucodonosor la yic' loq'uel ta Jerusalén lahchayeb scha'winic scha'bahc' (832) ta tuhl;

³⁰ ta oxeb scha'winic (23) ha'bil yu'un te Nabucodonosor, te Nabuzaradán, capitán yu'un te soldadohetic te ya scanantayic ajwalil, la yic' loq'uel ta Judá ho'eb swaxaclajunwinic scha'bahc' (745) ta tuhl. Ta spisil ha lajunwinic slahchaybahc' (4,600) ta tuhl.

Joaquín loq'uesot ta cárcel soc la yich' ich'el ta muc' ta Babilonia

³¹ Ta shuclajunebal scha'winic (37) ha'bil sbahel ta chuquel a te Joaquín ajwalil yu'un Judá, ta shahchibal ha'bil yochel ta ajwalil yu'un Babilonia a te Evil-merodac, la ya'be yil yutsil yo'tan te Joaquín ajwalil yu'un Judá, la sloq'ues ta cárcel ta ho'eb scha'winic (25) c'ahc'al yu'un te slahchayebal (12) u.

³² La yutsil-c'opon, soc ha toyol xan la yac' huhcajuc te bin ut'il te yantic ajwaliletic te sjoquinejic ta Babilonia.

³³ Hich te Joaquín la sloq'ues hilel sc'u' spac' te slapoj c'alal ay ta cárcel, soc te jayeb xan c'ahc'al cuxul, we' ta smesa te ajwalile.

³⁴ Jujun c'ahc'al a'bot swe'el yu'un te ajwalil yu'un Babilonia te jayeb c'ahc'al cuxaj, ha to c'alal cham.