Jeremías 46 - Bible in Tzeltal Bachajón

Sc'op-jalwanej ta stojol Egipto

¹ Ha te sc'op Jehová te tal ta stojol te jalwanej Jeremías sc'oblal te nacionetique.

² Sc'oblal Egipto hich ya yal: ha sc'oblal te soldadohetic yu'un faraón Necao ajwalil yu'un Egipto, te ay ta Carquemis te ay ta ti' muc'ul-ha' Éufrates, te la yich' jinel yu'un te Nabucodonosor ajwalil yu'un Babilonia ta schanebal ha'bil yochel ta ajwalil a te Joacim snich'an Josías, te ajwalil yu'un Judá:

³ ¡Chahpana amuc'ul mahquil soc atut mahquil! ¡La'ic ta guerra!

⁴ ¡Chahpana te cawuhetic, mohanic! ¡Otsesa smahquil ajolic, chola abahic! ¡Ch'ula te lanzahetic, lapahic te smahquil atahnique!

⁵ ¿Bin yu'un ya quil te bayel ayic ta xiwel, te suhtic bahel? Tsalbilic te soldadohetic yu'unic, loq'uiquix bahel ta ahnimal, ma ba la yilic suhtel ta spatic. ¡Bayuc ay xiwel! xchi te Jehová.

⁶ Ma xhu' ya x'ahn bahel te mach'a tulan ya xhu' yu'un ahnimal, ma xhu' ya xloc' bahel ta ahnel te mach'a ay yip. Ta norte, ta sts'ehl te muc'ul-ha' Éufrates la sc'ohchin sbahic soc yahlic cohel.

⁷ ¿Mach'a a te yac ta nojel mohel hich te bin ut'il te Nilo, hich te bin ut'il muc'ul-ha' te ya syuc' sbahe?

⁸ Ha te Egipto, te ya xnoj mohel hich te bin ut'il te Nilo hich te bin ut'il muc'ul-ha' te ya syuc' sba. Hich la yal: Ya xnojon mohel, ya jmuc te q'uinal, ya jinticlan pueblohetic soc te mach'atic nahinemic tey a, xchi.

⁹ ¡Hahchanic ta ahnimal, cawuhetic! ¡Tulan x'ahnimajex, carretahetic! ¡Ac'a behenuquic bahel te soldadohetic te ay yipic: ha te winiquetic yu'un Etiopía soc yu'un Put te yich'ojic smahquilic; soc te winiquetic yu'un Lidia, te ya sna'ic yaq'uel t'ihmalte'!

¹⁰ Pero ha sc'ahc'alel yu'un Jehová, te Dios te scuentahinej spisil, ha sc'ahc'alel yu'un castigo, yu'un ya'beyel spacol te scontratac. Ya x'ehchenteswan te espada ha to c'alal ya xc'ax yo'tan, ha to c'alal ya xch'ay staquinti'il yu'un te ch'ich'e. Como ha milbil mahtanil ya xc'oht yu'un Jehová, te Dios te scuentahinej spisil, ta q'uinal ta norte, ta sti'il te muc'ul-ha' Éufrates.

¹¹ ¡Mohan bahel ta Galaad, ich'a bálsamo-te', yantsil-nich'anat Egipto! Tojol p'ohlem te spoxil awu'un, ma xlecubat.

¹² Te nacionetic ya'iybeyejic sc'oblal te q'uexlal awu'unic, ta spisil q'uinal chican awawic; talel c'axel la sc'ohchin sbahic te soldadohetic, pajal yahlic schebalic, xchi te Jehová.

¹³ Te sc'op Jehová te la yalbe te jalwanej Jeremías sc'oblal te ya xtal te Nabucodonosor ajwalil yu'un Babilonia yu'un ya yochintay te sq'uinal Egipto:

¹⁴ ¡Pucahic ta halel ta Egipto, a'beya sna'ic ta Migdol! ¡Ha nix hich a'beya sna'ic ta Menfis soc ta Tafnes! Hich xawalbe: ¡Tehc'ana abahic, chahpana abahic, como ya xlajinwan te espada ta ajoyobal! xchihanic me.

¹⁵ ¿Bin yu'un loc' ta ahnel te Apis? ¡Ma ba hu' la stehc'an sba, como tsulq'uinot yu'un Jehová!

¹⁶ Bayel buelta yahlic, jujutuhl yahl ta sba te yane; hich la yalic: ¡Hahchan! suhtucotic bahel ta jlumaltic, ta banti ayinotic, ahnucotic bahel ta stojol te espada te ya xtsalawan, xchihic.

¹⁷ Tey awonic a: ¡Te faraón ajwalil yu'un Egipto, ha nax xjuyet; la yac' c'axuc te tiempo te halbile! xchihic.

¹⁸ Hich te bin ut'il smelelil te cuxulon, xchi te Ajwalil, te ha Jehová te scuentahinej spisil te sbihile, ay mach'a ya xtal te ha pajal soc Tabor ta yohlil te witsiltic, te pajal soc Carmelo ta ti' mar.

¹⁹ Chahpana abiluc yu'un iq'uel bahel ta chuquel, ha'ex te nahinemex ta Egipto, como te Menfis ya xc'atp'uj ta jochol q'uinal, jimbil ya xhil, mayuc mach'a ya xnahinix tey a.

²⁰ Te Egipto ha t'ujbil alal wacax, pero ta stojol norte ya xtal xcach ta stojol.

²¹ Te tojbil soldadohetic yu'un te ayic ta yohlil, ha pajal soc juhp'en tut wacaxetic; ha nix hich suhtic ta spatic, spisilic loq'uic ta ahnel, ma ba quehchajic, como c'ohtix sc'ahc'alel te swocolic, te yorahil castigo yu'unique.

²² Te sc'op Egipto hich ay te bin ut'il sc'op chan te ya x'ahn bahel, como ya xnohpojic tal te scontratac, ya xtalic soc echej, hich te bin ut'il jxot'-si'.

²³ Ya me sts'eticlambe te tohyem te'etic yu'un, xchi te Jehová, aunque c'ax pim; como c'ax hich yipal a te bin ut'il c'ulubetic, ma xhu' ta ahtayel.

²⁴ Ya xq'uexaw te yantsil-nich'an Egipto; ya x'och ta sc'ab te pueblo ta norte, xchi.

²⁵ Hich yaloj te Jehová te scuentahinej spisil, te Dios yu'un Israel: Ya ca'be castigo te Amón te dios yu'un Tebas, te faraón, Egipto soc te diosetic soc te ajwaliletic yu'un, soc te mach'atic smuc'ulinej yo'tanic te faraón.

²⁶ Ya cac' ta sc'abic te mach'atic yac slehbelic te scuxlejalic, ta sc'ab te Nabucodonosor ajwalil yu'un Babilonia soc te swinictaque. Pero ta patil ya xnahinic tey a hich te bin ut'il ta nahil to, xchi te Jehová.

²⁷ Ma xiwat, Jacob, a'bat cu'un; ma me xlaj yip awo'tan, Israel. Ya jcoltayat loq'uel ta namal q'uinal, ha'at soc ats'umbal, ta q'uinal banti la awich'ic iq'uel bahel ta chuquel. Ya me suht xan tal Jacob, ya me sta cux-o'tanil, mayuc mach'a ya xiwtesot yu'un.

²⁸ Ha'at, Jacob, a'bat cu'un, ma xiwat, como joquinejat, xchi te Jehová. Ya jinticlan spisil te nacionetic te banti la jpuquex bahele. Pero te ha'ate ma ba jc'axel ya jinat; stojil ya ca'bat castigo, ma me hichuc nax ya quihquitayat, ya me ca'bat castigo, xchi te Jehová.