Jeremías 43 - Bible in Tzeltal Bachajón

Ochic bahel ta Egipto

¹ C'alal laj yo'tan te Jeremías ta yalbeyel spisil te pueblo spisil te bin la yal te Jehová te Dios yu'unic, spisil te bintic ticombil yu'un Jehová te ya yalbe ya'iyique,

² te Azarías snich'an Osaías, te Johanán snich'an Carea, soc spisil te toyba winiquetic hich la yalbeyic te Jeremías: ¡Lotil te bin yac awal! Te Jehová te Dios cu'untic ma ba hich la sticonat ta yalel: Ma me xbahex ta nahinel ta Egipto, ma xchihuc.

³ Ha te Baruc snich'an Nerías la sujat ta yalel ta jtojolcotic yu'un ya yac'otcotic ta sc'ab te caldeohetic, ya smilotcotic o ya yic'otcotic bahel ta Babilonia, xchihic.

⁴ Ha yu'un te Johanán snich'an Carea, spisil te capitanetic yu'un te soldadohetic soc spisil te ants-winiquetic ma ba la sch'uhunic te bin la yal te Jehová te ya me xhilic ta sq'uinal Judá.

⁵ Te Johanán snich'an Carea soc spisil te capitanetic yu'un te soldadohetic la stsobic spisil te mach'atic hilemic yu'un Judá, te suhtemiquix tal ta spisil te nacionetic te banti puhquemic yu'un ya xnahinic ta sq'uinal Judá,

⁶ ha te winiquetic, antsetic, alaletic, te yantsil-nich'nab te ajwalil, te jalwanej Jeremías soc Baruc snich'an Nerías soc spisil te mach'atic ihquitayotic hilel yu'un Nabuzaradán, capitán yu'un te soldadohetic te ya scanantayic ajwalil, ta stojol Gedalías snich'an Ahicam.

⁷ Hich ochic bahel ta sq'uinal Egipto, ma ba la sch'uhunic te bin la yal te Jehová. C'ohtic c'alal ta Tafnes.

⁸ Tal te sc'op Jehová ta stojol Jeremías ta Tafnes te hich la yal:

⁹ Ta sitic te ants-winiquetic yu'un Judá, tsaca cha'oxpis muc'ul tonetic, mucticlana ta ahch'al ta be pasbil ta ladrillo ta yochibal te sna faraón ta Tafnes.

¹⁰ Hich me xawalbe: Hich yaloj te Jehová te scuentahinej spisil, te Dios yu'un Israel: Ya jticon ta iq'uel tal te ca'bat Nabucodonosor ajwalil yu'un Babilonia, ya ca'be shuctajib ta sba te tonetic ini te la jmuque, soc ya slim bahel te axinal pac' yu'un ta sba.

¹¹ Ya me xtal sjin te sq'uinal Egipto. Ya xlajic te mach'atic sc'oblal ya xlajic, ya yich'ic chuquel te mach'atic sc'oblal ya xchucotic, soc ya xlajic ta espada te mach'atic sc'oblal ya xlajic ta espada.

¹² Ya me ya'be sc'ahc'al te templohetic yu'un te diosetic yu'un Egipto; ya me ya'be sc'ahc'al soc ya me yic'ticlan bahel ta chuquel te diosetic yu'unique. Ya me spoc te sq'uinal Egipto hich te bin ut'il jtuhl jcanan-tuminchij ya sac' te sc'u'e, hich jun yo'tan ya xloc' bahel.

¹³ Ya me swuyticlan te bahlal tonetic yu'un Heliópolis te ay ta sq'uinal Egipto, soc ya me ya'be sc'ahc'al te templohetic yu'un te diosetic yu'un Egipto, xchi.