Jeremías 40 - Bible in Tzeltal Bachajón

Hilic soc Gedalías te Jeremías soc mach'atic hilemic

¹ Ha te sc'op Jehová te tal ta stojol Jeremías te c'alal ac'otix ta libre ta Ramá yu'un te Nabuzaradán, capitán yu'un te soldadohetic te ya scanantayic ajwalil, te c'alal chucul ta cadena a c'oht sta ta yohlil spisil te jchuqueletic yu'un Jerusalén soc Judá te yaquic ta iq'uel bahel ta chuquel ta Babilonia.

² Te capitán la yic' tal te Jeremías, hich la yalbe: Te Jehová te Dios awu'un la schahpambe sc'oblal te bin chopol ini ta stojol te lugar ini.

³ Yo'tic la sc'ohtesix ta pasel te bin yaloje. Hich c'oht ta pasel ta atojolic como la ata amulic ta stojol te Jehová, ma ba la awich'beyic ta cuenta te sc'ope.

⁴ Pero yo'tic la jtilbatix te cadena te chucul ac'ab a. Teme lec yac awa'iy, joquinawon bahel ta Babilonia, ho'on ya jcanantayat. Pero teme ma ba yac ac'ane, hilan li'i. Ilawil, spisil te lumq'uinal ay ta atojol, bahan ta banti lec yac awa'iy.

⁵ Teme yac ac'an ya xhilate, bahan ta stojol Gedalías snich'an Ahicam, snich'an Safán, te a'bot ya'tel yu'un te ajwalil yu'un Babilonia ta stojol te pueblohetic yu'un Judá, ayinan soc ta yohlil te pueblo, o bahan ta banti lec yac awa'iy, xchi. Te capitán la ya'be swe'el soc smahtan, soc la spatbe hilel yo'tan.

⁶ Hich te Jeremías baht ta stojol Gedalías snich'an Ahicam ta Mizpa, tey nahin soc a ta yohlil te ants-winiquetic te hilemic ta q'uinal.

⁷ Spisil te capitanetic judiohetic soc te swinictac te ayic ta yohl q'uinal, c'alal la ya'iyic te otsesot ta gobernador te Gedalías snich'an Ahicam yu'un te ajwalil yu'un Babilonia, te a'bot ta scuenta te winiquetic, antsetic soc alaletic, ha te pobrehetic ta q'uinal te ma ba ic'otic bahel ta Babilonia,

⁸ talic ta stojol te Gedalías ta Mizpa. Te mach'atic te talic, ha te Ismael snich'an Netanías, Johanán soc Jonatán snich'nab Carea; Seraías snich'an Tanhumet; te snich'nab Efai te ay ta Netofa, soc Jezanías snich'an maacateo-winic, soc te swinictaque.

⁹ Te Gedalías snich'an Ahicam, snich'an Safán, hich la yal ta jamal ta stojolic soc te swinictac: Ma me xaxi' te yac awac' abahic ta a'batinel yu'un te caldeohetique. Nahinanic ta lumq'uinal, ac'a abahic ta a'batinel yu'un te ajwalil yu'un Babilonia, hich me lec ya xc'ohex a.

¹⁰ Te ho'one ya xhilon ta Mizpa scuenta yu'un ya xc'opojon awu'unic ta stojol te caldeohetic te ya xtalic ta jtojoltic. Te ha'exe tsobahic te vino, te sit te'etic yu'un te yorahil ha'alel q'uinal, soc te aceite, ac'ticlanahic ta yawil, nahinanic ta pueblohetic te awich'ojique, xchi.

¹¹ Ha nix hich spisil te judiohetic te ayic ta Moab, Amón, Edom soc te yantic nacionetic, c'alal la ya'iyic te ay mach'atic ihquitayotic hilel ta Judá yu'un te ajwalil yu'un Babilonia soc te la yac' te ya xcuentahinotic yu'un te Gedalías,

¹² spisil te judiohetic loq'uic tal ta spisil banti tenotic bahel, suhtic talel ta sq'uinal Judá ta stojol Gedalías ta Mizpa. La stsobic bayel vino soc sit ts'unub awaliletic.

Ismael la schapbe sc'oblal ta milel Gedalías

¹³ Te Johanán snich'an Carea soc spisil te capitanetic yu'un soldadohetic te puhquemic hilel ta q'uinal, talic ta stojol Gedalías ta Mizpa,

¹⁴ hich la yalbeyic: ¿Ya bal ana' te Baalis ajwalil yu'un te amonetic sticonej tal te Ismael snich'an Netanías yu'un ya smilat? xchihic. Pero te Gedalías ma ba la sch'uhun.

¹⁵ Ha yu'un te Johanán snich'an Carea hich la yalbe ta muquen te Gedalías ta Mizpa: Ac'awon bahel yu'un ya jmil te Ismael snich'an Netanías, mayuc mach'a ya sna'. ¿Bin yu'un ya smilat, te hich ya spuc sbahic spisil te judiohetic te stsoboj sbahic ta atojol, te hich ya xch'ayic te mach'atic hilemic yu'un Judá? xchi.

¹⁶ Pero te Gedalías snich'an Ahicam la yalbe te Johanán snich'an Carea: ¡Ma me hichuc xapas! Ma meleluc te bin yac awal yu'un te Ismael, xchi.