Jeremías 37 - Bible in Tzeltal Bachajón

Otsesot ta cárcel Jeremías

¹ Te Nabucodonosor ajwalil yu'un Babilonia la yotses ta ajwalil yu'un Judá te Sedequías snich'an Josías scuenta sjelol te Jeconías snich'an Joacim.

² Pero te Sedequías soc te a'batetic yu'un soc te mach'atic nahinemic ta q'uinal ma ba la yich'ic ta cuenta te sc'op Jehová te la yal ta scuenta te jalwanej Jeremías.

³ Te ajwalil Sedequías la sticon bahel te Jucal snich'an Selemías soc te sacerdote Sofonías snich'an Maasías yu'un hich ya yalbeyic te jalwanej Jeremías: Awocoluc, c'opombotic Jehová te Dios cu'untic, xchihic.

⁴ Te Jeremías bayuc behen ta yohlil te pueblo, como ma to ochemuc ta cárcel a.

⁵ Te c'alal loq'uemiquix tal ta Egipto a te soldadohetic yu'un faraón, la ya'iyic te caldeohetic te yac sjoytaybelic te Jerusalén, hich la yihquitayic hilel te Jerusalén.

⁶ Ha yu'un tal te sc'op Jehová ta stojol te jalwanej Jeremías, hich la yal:

⁷ Hich yaloj te Jehová, te Dios yu'un Israel: Te ajwalil yu'un Judá te la sticonex tal ta jtojol yu'un yac ajoc'obonic, hich yac awalbe: Te soldadohetic yu'un faraón te loq'uemiquix tal yu'un ya scoltayex, ya suhtic bahel ta Egipto.

⁸ Te caldeohetic ya me scha'suhtic tal ta ya'beyel guerra te pueblo ini, ya me yu'untayic soc ya me ya'beyic sc'ahc'al.

⁹ Hich yaloj te Jehová: Ma me xalo'loy abahic, te hich yac awalic: Ya me yihquitayotic te caldeohetic, ma me xchihuquex, como ma ba ya xbahtic.

¹⁰ Aunque yac atsalic spisil te soldadohetic yu'un te caldeohetic te yac ta yaq'uel guerra ta atojolic, teme ha xanix ya xhilic te mach'atic ehchenajemic, ta jujutuhl ya me xhahchic tal ta snahilpaq'uic, ya me ya'beyic sc'ahc'al te pueblo ini, xchi.

¹¹ C'alal loq'uemiquix bahel a ta Jerusalén te soldadohetic yu'un te caldeohetic ta scaj te soldadohetic yu'un faraón,

¹² loc' bahel ta Jerusalén te Jeremías yu'un ya xbaht ta sq'uinal Benjamín ta yich'el te sq'uinal ta yohlil te ants-winiquetic tey a.

¹³ Te c'alal c'oht ta Ochibal yu'un Benjamín, ay jtuhl capitán tey a, Irías sbihil, snich'an Selemías, snich'an Hananías, la stsac te jalwanej Jeremías, hich la yalbe: Te ha'ate yacat ta c'axel ta stojol te caldeohetic, xchi.

¹⁴ La sjac' te Jeremías: Ma meleluc, ma ba ya xc'axon ta stojol te caldeohetic, xchi. Pero ma ba a'iybot sc'op yu'un te Irías, la stsac te Jeremías, la yic' bahel ta stojol te príncipaletique.

¹⁵ Te príncipaletic ilinic ta stojol Jeremías, la smajic soc la yaq'uic ta chuquel ta sna Jonatán te jts'ihbajel, te c'atp'ujem ta cárcel te snahe.

¹⁶ Te Jeremías och ta hotbil ch'en yu'un jchuqueletic, halaj bayel c'ahc'al tey a.

¹⁷ Te ajwalil Sedequías la sticon ta iq'uel tal, muquen la sjoc'obe ta sna: ¿Ay bal bin yaloj te Jehová? xchi. Ay, xchi te Jeremías, ya me x'ochat ta sc'ab te ajwalil yu'un Babilonia, xchi.

¹⁸ Ha nix hich te Jeremías la sjoc'obe te ajwalil Sedequías: ¿Bin jmul la jta ta atojol, ta stojol te a'batetic awu'un o te pueblo ini, yu'un yac awotseson ta cárcel?

¹⁹ ¿Banti ayic te jalwanejetic awu'un te hich la yalbeyex: Ma ba ya xtal te ajwalil yu'un Babilonia yu'un ya yac' guerra ta atojolic soc ta q'uinal ini, te xchihique?

²⁰ Awocoluc, ajwalil cu'un, a'iybon awa'iy te bin ya jc'ambat ta atojol: Ma xawac' te ya suhton bahel ta sna Jonatán te jts'ihbajel, scuenta yu'un ma ba ya xlajon tey a, xchi.

²¹ Ha yu'un te ajwalil Sedequías la yal mandar te ya yich' canantayel te Jeremías ta yamaq'uil te cárcel soc te jujun c'ahc'al ya x'a'bot jpehch pimil pan ta calle yu'un te jpas-panetic ha to c'alal ya xlaj spisil te pan ta pueblo. Hich hil ta yamaq'uil te cárcel te Jeremías.